Bibele yi vulavula kan’we hi ku tifungha nhlonge eka Levhitika 19:28, leyi nge: “Mi nga tshuki mi tifungha nhlonge.” Xikwembu xi nyike Vaisrayele xileriso lexi, lexi a xi ta va hambanisa ni vaakelani va vona lava a va tifungha nhlonge hi mavito kumbe mimfungho ya swikwembu swa vona. (Deteronoma 14:2) Loko Nawu lowu nyikiweke Vaisrayele wu nga bohi eka Vakreste, swi vula leswaku nawu lowu fambisanaka na wona wu fanele wu tekeriwa enhlokweni.

Xana Mukreste u fanele a tifungha nhlonge kumbe a titlhavela tinhlanga?

 Tindzimana ta Bibele leti landzelaka ti nga ku pfuna leswaku u anakanyisisa hi mhaka leyi:

•   “Vavasati va fanele va tisasekisa hi . . . xichavo.” (1 Timotiya 2:9, New American Bible) Nawu wolowo wu tirha eka vavasati ni vavanuna. Hi fanele hi xixima ndlela leyi van’wana va titwaka ha yona naswona a hi fanelanga hi tikokela mahlo swi nga fanelanga.

•   Van’wana va lava ku tikombisa leswaku hi vona va mani, kasi van’wana va lava ku komba leswaku va ni ntshunxeko wa ku endla xin’wana ni xin’wana hi miri wa vona. Hambiswiritano, Bibele yi khutaza Vakreste yi ku: “[Nyikelani] mimiri ya n’wina yi va xitlhavelo lexi hanyaka, xo kwetsima ni lexi amukelekaka eka Xikwembu, ku nga ntirho wo kwetsima, hi matimba ya n’wina ya ku anakanya.” (Varhoma 12:1) Tirhisa ‘matimba yo anakanya’ ku tikambisisa leswaku ha yini u lava ku tifungha nhlonge. Loko ku ri leswaku u lava ku landzela fexeni kumbe ku komba leswaku u wela eka ntlawa wo karhi, tsundzuka leswaku ndlela leyi u titwaka ha yona i ya nkarhinyana, kasi ku tifungha nhlonge i swa vutomi hinkwabyo. Ku kambisisa swiyimo swa wena swi nga ku pfuna leswaku u endla xiboho lexinene.—Swivuriso 4:7.

•   “Kunene makungu ya lava va gingiritekaka ma endla leswi pfunaka, kambe un’wana ni un’wana la hatlisaka ngopfu, hakunene u ta wela eku pfumaleni.” (Swivuriso 21:5) Hakanyingi xiboho xo tifungha nhlonge xi endliwa hi ku hatlisa kambe swi nga ha va ni vuyelo byo karhi emhakeni ya vunghana ni le ntirhweni. Naswona ku fungha nhlonge swi nga ha koxa mali yo tala naswona swa vava ku swi susa. Ndzavisiso—ku katsa ni ku andza ka bindzu ra ku susa swilo leswi nga funghiwaka enhlongheni swi kombisa leswaku vanhu lava nga fungha nhlonghe va hetelela va tisola hi leswi va swi endleke.