TATA wa John u khuvuriwe eku heleni ka va-1950, a va un’wana wa Timbhoni ta Yehovha exidorobanini xa Gujarat le Indiya. John ni vamakwavo vakwe va ntlhanu swin’we ni mana wa vona a va ri Makhatoliki lama tinyiketeleke naswona a va nga byi tsakeli vukhongeri bya Timbhoni ta Yehovha.

Siku rin’wana tata wa John u n’wi kombele leswaku a n’wi heleketela mvhilopho ekaya ra makwerhu un’wana. Hambiswiritano, mixo wolowo John u titseme rintiho loko a ri karhi a ringeta ku pfula diromu. Nilokoswiritano, leswi a lava ku yingisa tata wakwe u bohe rintiho leri a ri huma ngati hi xitlakati kutani a famba a heleketa mvhilopho.

Loko John a fika laha a rhumiwe kona, u kume nsati wa makwerhu loyi a rhumiwe eka yena kutani u n’wi nyike mvhilopho yoleyo. Wansati yoloye u xiye leswaku John u vaviseke rintiho hiloko a kombela ku n’wi pfuna. U teke bokisi ra yena ra mirhi ya swa vutshunguri kutani a hlantswa mbanga ya John hi murhi wo dlaya switsongwatsongwana a tlhela a n’wi bandicha. Endzhaku, u endlele John tiya ni ku bula na yena hi ndlela ya musa hi Bibele.

Hi nkarhi wolowo langutelo ra John hi Timbhoni ri sungule ku cinca hiloko a n’wi vutisa loko Yesu a ri Xikwembu niloko swi fanerile leswaku Vakreste va khongela eka Mariya ku nga tidyondzo timbirhi ta vukhongeri leti a ti hambanisa yena na tata wakwe. Leswi Mbhoni yoleyo a yi tiva ririmi ra John ra Xigujarati, yi swi kotile ku n’wi hlamula hi ku tirhisa Bibele yi tlhele yi n’wi nyika xibukwana lexi nge, “This Good News of the Kingdom.”

Loko John a hlaya xibukwana lexi, u xiye leswaku a a twa ntiyiso ro sungula evuton’wini bya yena. U ye eka mufundhisi wa yena kutani a n’wi vutisa swivutiso swimbirhi leswi a swi vutiseke Mbhoni liya. Mufundhisi u hatle a hlundzuka hiloko a n’wi hoxa hi Bibele kutani a huwelela a ku: “U nghene hi Sathana! Ndzi kombe laha Bibele yi vulaka leswaku Yesu a hi Xikwembu. Ndzi kombe laha yi nge a hi fanelanga hi gandzela Mariya. Ndzi kombe!” John u tsemiwe nhlana hi matikhomelo ya mufundhisi lerova a kala a ku eka yena, “a ndzi nge he pfuki ndzi wu vekile wa mina eKerekeni ya Khatoliki.” Naswona u endle tano!

John u sungule ku dyondza ni Timbhoni, a seketela vugandzeri bya ntiyiso ni ku tirhela Yehovha. Hi ku famba ka nkarhi swirho swin’wana swa ndyangu wa ka vona swi n’wi landzerile. Hambileswi se ku hundzeke malembe ya 60 kambe nisweswi John wa ha ri na xivati erintihweni ra voko ra yena ra xinene. Wa n’wayitela loko a tsundzuka musa lowu a kombiweke wona, lowu n’wi kokeleke evugandzerini lebyi tengeke.—2 Kor. 6:4, 6.