Xikwembu a xi na xihlawuhlawu naswona xi lava ku katekisa vanhu hinkwavo.

Xikwembu xi tshembise muprofeta Abrahama xi ku: “Mindyangu hinkwayo ya misava yi ta tikatekisa ha wena.”—Genesa 12:3.

Hi dyondza yini? Xikwembu xi hi rhandza swinene naswona xi lava ku katekisa hinkwavo lava xi yingisaka, mindyangu hinkwayo, vavanuna, vavasati ni vana.

Xikwembu xi ni tintswalo naswona xi katekisa lava endlaka matshalatshala yo xi tiva.

Lowa Matimba Hinkwawo u nyike muprofeta Muxe matimba yo endla masingita lamakulu. Muxe u khongele a ku: “Ndzi kombela u ndzi tivisa tindlela ta wena, ndzi ku tiva leswaku ndzi kuma ku tsakeriwa ematihlweni ya wena.” (Eksoda 33:13) Xikwembu xi tsakisiwe hi xikombelo xa Muxe kutani xi n’wi katekise hi vutivi lebyi engetelekeke ni ku twisisa tindlela ni timfanelo ta xona. Hi xikombiso, Muxe u dyondze leswaku Muvumbi i “Xikwembu xa tintswalo ni nsovo.”—Eksoda 34:6, 7.

Hi dyondza yini? Xikwembu xi lava ku hi katekisa hinkwerhu, vavanuna, vavasati ni vana ntsena loko hi tikarhatela ku xi tiva kahle. EMatsalweni yo Kwetsima xi hi byela ndlela hi nga xi gandzelaka ha yona ni ndlela leyi xi lavaka ku hi katekisa ha yona.

Hi nga tiphina hi mikateko ya Xikwembu ya hilaha ku nga heriki loko hi dyondza hi leswi Yesu a swi endleke ni ku swi dyondzisa.

Hi nga dyondza swo tala eMatsalweni yo Kwetsima hi vutomi bya Yesu ni leswi a swi dyondziseke. Xikwembu xi nyike Yesu matimba yo endla masingita lamakulu yo tanihi ku hanyisa lava feke mahlo, lava nga twiki ni lava lamaleke. U tlhele a pfuxa ni lava feke. Yesu u kombise mikateko leyi Xikwembu xi nga ta yi tisela vanhu hinkwavo enkarhini lowu taka. U hlamusele ndlela leyi un’wana ni un’wana wa hina a nga ta tiphina ha yona hi mikateko leyi: “Leswi swi vula vutomi lebyi nga heriki, ku nghenisa ka vona vutivi ha wena, Xikwembu xi ri xin’we xa ntiyiso, ni loyi u n’wi rhumeke, Yesu Kreste.”—Yohane 17:3.

Yesu a ri ni ntwelavusiwana, ntsetselelo ni musa. Vavanuna ni vavasati, lavatsongo ni lavakulu, va amukele xirhambo xakwe: “Mi dyondza eka mina, hikuva ndzi ni moya wo rhula ni mbilu yo titsongahata, kutani mi ta kumela mimoya-xiviri ya n’wina ku phyuphya.” (Matewu 11:29) Ku hambana ni lava hi nkarhi wa yena a va khoma vavasati hi ndlela yo biha, Yesu u khome vavasati hi musa a va komba xindzhuti ni xichavo.

Hi dyondza yini? Yesu a rhandza vanhu naswona u hi vekele xikombiso lexinene xa ndlela leyi hi faneleke hi khomana ha yona.

Matsalwa yo Kwetsima ma hi dyondzisa leswaku “kahle-kahle eka hina ku ni Xikwembu xin’we” naswona Yesu Kreste a ri muvulavuleri wa Xikwembu la titsongahataka. (1 Vakorinto 8:6) Yesu u swi veke erivaleni leswaku Xikwembu xi tlakuke ku n’wi tlula naswona xi n’wi rhume la misaveni.—Yohane 11:41, 42; 14:28. *