Hulda U Fikelele Leswi A A Swi Lava
LOKO emalembeni lama hundzeke u tshame u endzela xihlala lexitsongo xa Sangir Besar eIndonesia, swi nga endleka u va vonile vamakwerhu vanharhu va xisati va ri eribuweni. Va tiveka ngopfu exihlaleni lexi hikwalaho ka ntirho wa vona wo pfuna vanhu leswaku va twisisa Bibele. Kambe eka xiendlakalo lexi, a va endla ntirho wun’wana lowu hambaneke.
Xihlala xa Sangir Besar en’walungwini wa Indonesia
Xo sungula lexi a va xi endla, a va nghena endzeni ka lwandle ivi va huma ni maribye yo tika va ma veka eribuweni. Man’wana ya maribye wolawo a ma ringana ni bolo ya milenge hi ku kula. Xa vumbirhi, a va tshama eswitulwini leswitsongo leswi endliweke hi mapulanga ivi va fayelela maribye wolawo hi hamula leswaku ma va swiphemu leswitsongo leswi ringanaka ni tandza. Xa vunharhu, a va hoxa maribye wolawo lamantsongo endzeni ka bakiti naswona a va famba hi ndlela leyi nga ni switepisi ku kondza va fika emakaya ya vona. Xo hetelela, a va hoxa maribye wolawo endzeni ka tibege letikulu leti a ti ta khandziyisiwa etilorini leswaku ti ya tirhisiwa eka tikontraka to lunghisa mapatu.
Hulda a ri karhi a hlengeleta maribye eribuweni
Un’wana wa vamakwerhu lava va xisati a ku ri Hulda. Ku hambana ni van’wana, swiyimo swakwe a swi n’wi pfumelela ku heta nkarhi wo tala entirhweni lowu. Hakanyingi mali leyi a a yi hola a yi tirhisela ku hakela swilaveko swa ndyangu wakwe. Kambe sweswi a a lava ku hlayisa yin’wana ya mali yoleyo leswaku a yi tirhisela swin’wana. A a lava tablet leyi a ta nghena hi yona eka app ya JW Library. Hulda a a swi tiva leswaku tivhidiyo ni swin’wana leswi kumekaka eka app leyi, a swi ta n’wi pfuna entirhweni wo chumayela ni ku tlhela swi n’wi pfuna ku hlaya ni ku twisisa Bibele.
Ku ringana n’wheti na hafu, Hulda u tirhe tiawara timbirhi mixo wun’wana ni wun’wana a ri karhi a fayelela maribye yo tala lawa a ma ta hoxiwa ebakini. Eku heteleleni u kume mali leyi ringaneke yo xava tablet.
Hulda ni tablet yakwe
Hulda u ri: “Hambileswi a ndzi karhele ni ku twa ku vava hikwalaho ko fayelela maribye, ndzi hatle ndzi swi rivala hikuva tablet yi ndzi pfunile leswaku ndzi tshama ndzi lunghekele ntirho wo chumayela ni ku lunghiselela tinhlengeletano ta le xikarhi ka vhiki hi ku olova.” Nakambe u vula leswaku eku sunguleni ka ntungu, tablet yi n’wi pfunile swinene tanihi leswi tinhlengeletano ta vandlha a ti khomiwa hi endlelo ra thekinoloji. Hi tsaka na yena Hulda hileswi a koteke ku fikelela leswi a a swi lava.
