NTIYISO WA MHAKA

Ku vilela ku katsa ku kanakana kumbe ku chava. Leswi hi hanyaka emisaveni leyi cincacincaka, hinkwerhu hi nga ha vilela.

LESWI BIBELE YI SWI VULAKA

Hosi Davhida u tsarile: “Xana ndzi ta sivela moya-xiviri wa mina ku fikela rini, gome leri nga embilwini ya mina ninhlikanhi?” (Pisalema 13:2) I yini leswi pfuneke Davhida leswaku a tiyisela? U khongerile, a tiphofula eka Xikwembu naswona a tshemba hi ku helela leswaku xa n’wi rhandza. (Pisalema 13:5; 62:8) Xikwembu xa hi rhamba leswaku hi xi byela leswi hi vilerisaka. Petro wo Sungula 5:7 yi ri: “Mi lahlela ku vilela hinkwako ka n’wina eka [Xikwembu], hikuva xa mi khathalela.”

Kambe, ku ni leswi hi nga swi endlaka leswaku hi lawula ku vilela ka hina. Hi xikombiso, loko Pawulo mutsari wa Bibele a “vilela hi mavandlha hinkwawo,” u tikarhatele ku chavelela ni ku khutaza lava a va n’wi vilerisa. (2 Vakorinto 11:28) Emhakeni yoleyo, ku vilela kakwe ku pfunile lerova ku n’wi susumetele ku va pfuna. Ku nga endleka leswi fanaka eka hina. Ku va ni langutelo leri hoxeke ni ku nga khathali swi nga kombisa leswaku a wu na rirhandzu.—Swivuriso 17:17.

“Mi nga veki tihlo etimhakeni ta n’wina ntsena, kambe ni le timhakeni ta van’wana.”—Vafilipiya 2:4.

NTIYISO WA MHAKA

Vanhu va nga ha vilela hi swilo leswi va tshameke va swi endla, hi swilo swa nkarhi lowu taka kumbe hi mali. *

LESWI BIBELE YI SWI VULAKA

Ku vilela hi swilo swa khale: Vanhu van’wana va le minkarhini ya vaapostola loko va nga si va Vakreste, a va ri swidakwa, vadyeleri, timbhisa kumbe vaoswi ni makhamba. (1 Vakorinto 6:9-11) Ematshan’weni ya leswaku va hanya hi swona, va hundzukile kutani va tshembela eka musa wa Xikwembu lowukulu, lowu xi wu kombisaka hi ku tirhandzela. Pisalema 130:4 yi ri: ‘Xikwembu xi ni ndzivalelo wa ntiyiso, leswaku xi ta chaviwa.’

Ku nga tiyiseki hi vumundzuku: Yesu Kreste u te: “Mi nga tshuki mi vilela hi siku leri tlhandlamaka, hikuva siku leri tlhandlamaka ri ta va ni mivilelo ya rona.” (Matewu 6:25, 34) Xana a a vula yini? A vula leswaku hi vilela hi swiphiqo swa siku ra namuntlha ntsena. U nga endli leswaku swiphiqo leswi u nga na swona namuntlha swi ku tikela ngopfu, hi ku anakanya hi swa mundzuku, leswi nga ta ku vilerisa ivi u hatlisela ku endla swiboho. Nakambe, tsundzuka leswaku swilo swo tala leswi u vilelaka ha swona hi ku famba ka nkarhi swi nga tikomba swi nga nyawuli.

Ku vilerisiwa hi mali: Wanuna un’wana wo tlhariha u tshame a khongela a ku: “U nga ndzi nyiki vusiwana kumbe rifuwo.” (Swivuriso 30:8) Ematshan’weni ya sweswo, a a lava ku eneriseka, ku nga mfanelo leyi a yi ta endla leswaku a amukeriwa hi Xikwembu. Eka Vaheveru 13:5, ha hlaya: “Mukhuva wa n’wina wa vutomi a wu pfumale rirhandzu ra mali, mi ri karhi mi eneriseka hi swilo leswi nga kona. Hikuva [Xikwembu] xi te: ‘Ndzi nga ka ndzi nga ku tshiki naswona ndzi nga ka ndzi nga ku fularheli.’” Ku hambana ni mali leyi nga hi pfunaka ivi yi hela, Xikwembu a xi va tshiki lava xi tshembaka kutani va hanya vutomi byo olova.

“A ndzi si tshama ndzi vona munhu la lulameke a tshikiwa hi ku helela, hambi ku ri vana vakwe va lava xinkwa.” —Pisalema 37:25.

LESWI VANHU VA SWI VULAKA

Mutsari wa phephahungu ra The Guardian loyi a vuriwaka Harriet Green, eka xihloko xa rona xa 2008 u te: “Hi le ka nguva leyintshwa ya ku vilela. Hi 2014, eka magazini wa The Wall Street, Patrick O’Connor u tsale leswaku “vanhu va le Amerika va vilela ngopfu ku tlula khale.”

LESWI BIBELE YI SWI VULAKA

“Ku vilela embilwini ya munhu hi kona loku nga ta yi tshova, kambe rito lerinene ra yi tsakisa.” (Swivuriso 12:25) Ngopfungopfu “rito lerinene” ri nga kumiwa eka mahungu lamanene ya Mfumo wa Xikwembu. (Matewu 24:14) Mfumo wolowo, ku nga mfumo wa Xikwembu, ku nga ri khale wu ta endla leswi ni un’we wa hina a nga ta ka a nga pfuki a swi endlile, wu ta herisa leswi hi vangelaka ku vilela hinkwako, ku katsa ni vuvabyi ni rifu! “[Xikwembu] xi ta sula mihloti hinkwayo ematihlweni ya [hina], rifu a ri nge he vi kona, hambi ku ri ku kolola, ni xirilo ni xitlhavi a swi nge he vi kona.”—Nhlavutelo 21:4.

“Onge Xikwembu lexi nyikaka ntshembo xi nga mi tata hi ntsako hinkwawo ni ku rhula hi ku kholwa ka n’wina.” —Varhoma 15:13.