Ndzi kulele eLos Angeles, California le U.S.A., laha a ku dume hi swidzidziharisi ni mintlawa ya swigevenga. Vatswari va mina va ni vana va tsevu, mina ndzi wa vumbirhi.

Loko ha ha kula Manana a a famba na hina ekerekeni ya evangelical. Hambiswiritano, loko ndza ha ri muntshwa a ndzi hanya vutomi byimbirhi. Hi Sonto yin’wana ni yin’wana a ndzi yimbelela eka khwayere ya le kerekeni. Kambe exikarhi ka vhiki a ndzi tshamela ku ya etiphatini, ndzi tirhisa swidzidziharisi ni ku endla timhaka ta masangu.

A ndzi hatla ndzi hlundzuka ni ku kariha. A ndzi tirhisa xin’wana ni xin’wana leswaku ndzi lwa ni vanhu. Leswi a ndzi swi dyondza ekerekeni a swi ndzi pfunanga nchumu. A ndzi rhandza ku vula leswaku “Ku rihisela i ka Hosi naswona yi tirhisa mina ku rihisela.” Loko ndzi ri exikolweni xa sekondari hi va 1960, ndzi nghenele ntlawa wa tipolitiki lowu a wu tiviwa hi tihanyi loko swi ta emhakeni yo lwela timfanelo ta vanhu. Ndzi tlhele ndzi nghenela nhlangano lowu yimelaka timfanelo ta swichudeni. Minkarhi yo tala loko hi toyatoya, xikolo a xi pfariwa swa nkarhinyana.

Kambe swi tikomba onge ku toyatoya a swi nga ndzi enerisi. Kutani ndzi sungule ku va eka mintlawa leyi vengaka valungu. Hi xikombiso, siku rin’wana mina ni vanghana va mina a hi hlalele tifilimi leti a ti kombisa ndlela leyi mahlonga ya le Afrika a ma xanisiwa ha yona eUnited States. Hi sungule ku bukutela vantshwa va valungu lava a hi ri karhi hi hlalela na vona hikwalaho ko hlundzukisiwa hi leswi a hi swi hlalela. Endzhaku ka sweswo, hi ye etindhawini ta le kusuhi leti ku tshamaka valungu leswaku hi ya va ba.

Loko ndza ha ri jaha, mina ni vamakwavo va mina a hi ri swigevenga leswi nga ni tihanyi. Sweswo swi hi hoxe ekhombyeni ra ku khomiwa hi maphorisa. Ndzisana ya mina a yi ri xirho xa ntlawa lowu a wu dume hi ku endla swilo swo biha swinene naswona ndzi tihlanganise na wona. Vutomi bya mina a byi ya byi nyanya ku biha.

Vatswari va munghana wa mina a va ri Timbhoni ta Yehovha. Va ndzi rhambe eminhlanganweni ya vona kutani ndzi yile. Ndzi swi xiyile leswaku Timbhoni a ti fani ni vanhu van’wana. Ndzi xiye nileswaku hambi ku ri vantshwa va kona va kota ku hlamusela matsalwa ya Bibele. A ndzi tsake ngopfu loko ndzi dyondza leswaku vito ra Xikwembu i Yehovha ndzi tlhela ndzi twa va vulavula hi rona.  (Pisalema 83:18) Eminhlanganweni yoleyo a ku ri ni vanhu vo tala va tinxaka to hambanahambana kambe a ku nga ri na xihlawuhlawu.

Eku sunguleni a ndzi nga swi lavi ku dyondza Bibele ni Timbhoni ta Yehovha kambe a ndzi rhandza ku ya eminhlanganweni ya tona. Hi vusiku byin’wana loko ndzi ye eminhlanganweni ya Timbhoni ta Yehovha, vanghana va mina va ye ekhonsatini. Loko va ri kwalaho, va be muntshwa un’wana kukondza a fa hikuva a a nga lavi ku va nyika baji rakwe ra dzovo. Hi siku leri landzeleke, a va tibuma hileswi va dlayeke munhu. Loko va ri ehubyeni a va nga tivoni nandzu hi leswi va swi endleke. Vo tala va vona va gweviwe vutomi hinkwabyo ejele. A ndzi tsake ngopfu hileswi vusiku byebyo a ndzi nga fambanga na vona. Ndzi nambe ndzi tiyimisela ku cinca vutomi bya mina, ndzi sungula ku dyondza Bibele.

Leswi a ndzi hanya ni vanhu lava a va ri ni xihlawuhlawu, ndzi hlamarisiwe hi leswi a ndzi swi vona eka Timbhoni. Hi xikombiso, loko Mbhoni yin’wana ya mulungu yi endzela entsungeni, a yi siya vana va yona ni ndyangu wun’wana wa vantima. Nakambe ndyangu wun’wana wa valungu a wu tshama ni n’wana wa muntima loyi a a nga ri na ndhawu yo tshama. Ndzi swi vonile leswaku Timbhoni ta Yehovha ti hetisisa marito ya Yesu lama nga eka Yohane 13:35 lama nge: “Hinkwavo va ta tiva leswaku mi vadyondzisiwa va mina, loko mi rhandzana.” Hakunene a ndzi tikumele vamakwavo va ntiyiso.

Loko ndzi ri karhi ndzi dyondza Bibele ndzi swi xiyile leswaku ndzi fanele ndzi hundzula vutomi bya mina. Ndzi hundzukile ivi ndzi sungula ku hanya hi ndlela yo rhula naswona sweswo swi ndzi pfunile evuton’wini bya mina. (Varhoma 12:2) Ndzi endle nhluvuko hakatsongotsongo. Hi January 1974, ndzi khuvuriwile ndzi va Mbhoni ya Yehovha.

Hambiloko se ndzi khuvuriwile, a ndzi fanele ndzi tirha hi matimba leswaku ndzi tshika ximbilwambilwana. Hi xikombiso, siku rin’wana loko ndzi chumayela hi yindlu ni yindlu, ndzi tsutsumise xigevenga lexi a xi yive rhadiyo ya movha wa mina. Loko ndzi ri kusuhi ni ku xi khoma, xi yi cukumetele ehansi ivi xi baleka. Loko ndzi byela van’wana hi mhaka leyi, makwerhu un’wana wa xinuna loyi a hi ri na yena u ndzi vutisile a ku: “Stephen, loko a wu xi khomile xigevenga lexi a wu ta xi endla yini?” Xivutiso xolexo xi ndzi endle ndzi swi xiya leswaku ndza ha fanele ndzi tikarhatela ku hanya hi ndlela yo rhula.

Hi October 1974, ndzi sungule ku heta nkarhi wo tala ndzi ri karhi ndzi dyondzisa vanhu Bibele, n’hweti yin’wana ni yin’wana a ndzi heta tiawara ta 100. Hi ku famba ka nkarhi ndzi kume lunghelo ra ku ya pfuneta entsindza wa misava hinkwayo wa Timbhoni ta Yehovha eBrooklyn le New York. Hi 1978, ndzi tlhelele eLos Angeles leswaku ndzi ya khathalela mana wa mina loyi a a vabya. Endzhaku ka malembe mambirhi, ndzi tekane na Aarhonda. U ndzi seketele swinene ku ongola Manana kukondza a fa. Hi ku famba ka nkarhi, mina na Aarhonda hi ye eXikolweni xa Bibele xa Giliyadi xa Watchtower naswona loko hi heta, hi rhumeriwe ePanama ku ya va varhumiwa.

Ku sukela loko ndzi khuvuriwile, ndzi langutane ni swiyimo swo tala leswi ndzi ringeke leswaku ndzi hlundzuka. Ndzi dyondze ku fambela ekule ni vanhu lava ndzi pfukaka. Vanhu vo tala ku katsa ni nsati wa mina, va ndzi bumabumerile hikwalaho ka ndlela leyi ndzi langutaneke ha yona ni swiyimo sweswo. Hambi ku ri mina ndzi tihlamarile! A ndzi ti bi xifuva hikwalaho ka sweswo. Kambe leswi ko va swikombiso swa leswaku Bibele yi ni matimba ya ku hundzula vanhu.—Vaheveru 4:12.

Bibele yi ndzi pfunile leswaku ndzi hanya vutomi lebyi nga ni xikongomelo ni ku hanya hi ndlela yo rhula. Sweswi a ndza ha bi vanhu kambe ndzi va pfuna leswaku va va ni vuxaka ni Xikwembu. Hambi ku ri khale ka nala wa mina wa le xikolweni ndzi n’wi dyondzise Bibele. Endzhaku ka loko a khuvuriwile, a hi tshama swin’we ekamareni ra le xikolweni. Na sweswi ha ha ri vanghana lavakulu. Mina ni nsati wa mina hi dyondze Bibele ni vanhu vo tlula 80 leswaku va va Timbhoni ta Yehovha.

Ndza n’wi khensa swinene Yehovha hileswi se ndzi hanyaka vutomi lebyi nga ni xikongomelo ni ku tsakela ku va ni vamakwerhu va ntiyiso.