TA RIVALA
Leswi Endlekaka Le Yuropa
Tiko ra Yuropa leri vanhu va kona a va rhandza vukhongeri ngopfu, sweswi a va ha byi rhandzi ngopfu. Nilokoswiritano, mahungu ya sweswinyana ya le Yuropa ma hlamusela Bibele hi tindlela leti nga ha ku hlamarisaka.
Ndlela Leyi Rito Ra Manana Ri Pfunaka Ha Yona
Vakambisisi va le Milan, eItaly, va gimete hi ku vula leswaku tincece leti tswariwaka nkarhi wa tona wu nga si fika ti va ni rihanyo lerinene loko ti twa marito ya vamana wa tona eka xitirhisiwa lexi bohiwaka eka mahlakala ya mavoko ya tona. Xitirhisiwa lexi xi encenyeta ndlela leyi ricece ri twaka rito ra mana wa rona loko ra ha ri ekhwirini. Hi ku gimeta, nkambisiso wun’wana wu te, “Swi ni vuyelo lebyinene loko tincece leti velekiwaka nkarhi wa tona wu nga si fika titwa marito ya vamana wa tona loko ti ri exibedlhele.”
LESWI BIBELE YI SWI VULAKA: “Ndzi khongotele ni ku miyeta moya-xiviri wa mina ku fana ni n’wana wa ndzumulo ehenhla ka mana wa yena.”—Pisalema 131:2.
Xana U Kurisa Vana Hi Ndlela Ya Vutianakanyi?
Hi ku ya hi nkambisiso lowu endliweke eka vana lava ringanaka 565 va le Netherlands, vana lava vatswari va vona va va tekaka tanihi lava nga va nkoka swinene ku tlula vana van’wana naswona va khomiwaka hi ndlela yo hlawuleka, va ni vutianakanyi ku tlula tintangha ta vona naswona va tilawula va tlhela va tivona va hlawulekile. Mutsari wa ndzavisiso lowu u ri: “Vana va tshemba vatswari va vona loko vava byela leswaku va hlawulekile swinene ku tlula van’wana. Sweswo a swi nge vi swinene eka vona ni le ka vanhu van’wana.”
LESWI BIBELE YI SWI VULAKA: “Ndzi byela un’wana ni un’wana kwalaho exikarhi ka n’wina leswaku a nga tiehleketeleli ku tlula mpimo lowu a faneleke ku tiehleketelela ha wona; kambe a a ehlekete hi xikongomelo xo va ni mianakanyo leyi hlutekeke.”—Varhoma 12:3.
Vanhu Va Malembe Ya Dzana Va Ni Ntshembo Hi Vumundzuku
Vakambisisi va le Yunivhesithi ya Heidelberg eGermany, va vula leswaku hambileswi vanhu lava nga ni malembe ya 100 va vabyaka va tlhela va tsana emirini va swi navela swinene ku hanya. Eka vanhu va mune lava nga ni malembe ya 100 lava ku buriweke na vona, vanharhu va vona va lava ku hanya naswona va ringeta ku tirhisa nkarhi wa vona va endla swilo swa nkoka swinene. Va fikelela tipakani ta vona naswona va ni ntshembo, va vona vutomi byi ri ni xikongomelo, va hisekela vukhongeri va tlhela va tikhoma kahle.
MHAKA YO ANAKANYISISA HA YONA: Hilaha swi kombisiweke hakona eka Eklesiasta 3:11, ku navela ku hanya loku hi tswariweke na kona ku kombisa yini?
U Nga Ha Tsakela
XALAMUKA!
Ku Kurisa Vana Lava Anakanyelaka eMisaveni Leyi Nga Ni Vutianakanyi
Xiya tindhawu tinharhu leti u nga pfunaka vana va wena eka tona leswaku va papalata moya wa vutianakanyi.
XALAMUKA!
Xana U Nga Hanya Nkarhi Wo Tanihi Kwihi?
Ku tiva leswi vangaka vudyuhari ni rifu i xisekelo xo twisisa leswaku hi nga hanya nkarhi wo tanihi kwihi.
