Ol Witnes Bilong Jehova i bin yusim planti narapela narapela Baibel taim ol i mekim Baibel stadi bilong ol. Tasol long ol tokples we New World Translation of the Holy Scriptures i stap, mipela i laik yusim dispela Baibel bikos nem bilong God i stap long en, tok i stret, na i klia.

•   Nem bilong God i stap long en. Sampela lain i wokim Baibel ol i no bin givim ona long Man i as bilong ol tok i stap long en. Olsem, wanpela Baibel i gat lista we ol i putim nem bilong winim 70 man em ol i bin insait long wok bilong kamapim dispela Baibel. Tasol dispela Baibel i rausim nem bilong Man i as bilong ol tok i stap long Baibel​—Jehova God!

   Ol man i bin wokim Baibel New World Translation of the Holy Scriptures i putim bek nem bilong God long planti tausen hap we i bin stap long en long Baibel bilong pastaim tru, tasol ol i no laik bai ol man i save long nem bilong ol yet.

•   Tok i stret. Sampela Baibel i no kamapim ol tok we i stret wantaim Baibel bilong pastaim tru. Olsem, long wanpela Baibel trenslesen ol i tanim Matyu 7:13 olsem: “Go insait long liklik geit, bikos geit i go long hel i op tumas na rot i go long en i isi long bihainim.” Tasol Baibel bilong pastaim tru i tok “bagarap,” na i no tok “hel.” Ating ol man i tanim tok bilong dispela Baibel i yusim “hel” bikos ol i bilip olsem ol man nogut bai kisim pen oltaim oltaim long helpaia. Tasol dispela tingting i no stret wantaim tok i stap long Baibel. Olsem na tok bilong Baibel New World Translation i stret, em i tok: “Yupela i mas go insait long liklik geit, long wanem, rot i go long bagarap i bikpela na geit bilong en i op tumas.”

•   Tok i klia. Baibel ol i tanim gut i mas kamapim ol tok i stret, na tu, i mas klia na isi long kisimgut mining bilong en. Tingim wanpela eksampel. Long Rom 12:11, aposel Pol i yusim wanpela tok Grik em mining bilong en i olsem “long spirit i boil.” Tasol ol man bai i no klia long mining bilong dispela tok long tok Inglis bilong nau, olsem na Baibel New World Translation i tanim dispela ves we i isi moa long kisimgut mining bilong en. Em i tok olsem ol Kristen i mas “larim holi spirit i kirapim yupela long givim bel tru long mekim wok.”

 Baibel New World Translation i kamapim nem bilong God, tanim tok i stret, na i klia, na i gat narapela samting i mekim na i narapela kain: Em i fri na ol man i ken kisim. Dispela i mekim na planti milion manmeri inap ritim Baibel long tokples bilong ol yet—dispela i makim tu ol man i no gat mani bilong baim wanpela Baibel