Gavening Bodi em wanpela liklik grup bilong ol strongpela Kristen em ol i save givim tok bilong stiaim ol Witnes Bilong Jehova i stap long olgeta hap bilong graun. Wok bilong ol i gat tupela hap bilong en.

•   Ol i lukautim wok bilong redim ol tok em Baibel i as bilong en i save kamap long ol pablikesen, long ol miting, na long ol skul bilong ol Witnes Bilong Jehova.​—Luk 12:42.

•   Ol i lukautim wok bilong ol Witnes Bilong Jehova long olgeta hap long rot bilong stiaim wok autim tok na ol i go pas tu wok bilong yusim ol donesen.

 Gavening Bodi i bihainim pasin em “ol aposel na ol hetman long Jerusalem” long taim bilong ol Kristen long bipo i bin mekim, em ol i bin wokim ol bikpela disisen bilong helpim ol kongrigesen Kristen olgeta. (Aposel 15:2) Olsem ol dispela aposel na ol hetman long bipo, ol man insait long Gavening Bodi, ol i no lida bilong oganaisesen bilong mipela. Ol i larim tok bilong Baibel i stiaim ol na ol i luksave olsem Jehova God i makim Jisas Krais long i stap Het bilong kongrigesen.​—1 Korin 11:3; Efesus 5:23.

 Ol brata insait long Gavening Bodi em Kenneth Cook, Jr., Gage Fleegle, Samuel Herd, Geoffrey Jackson, Stephen Lett, Gerrit Lösch, Mark Sanderson, David Splane, na Jeffrey Winder. Ol i mekim wok long hetkota bilong mipela long Warwick, long New York, long Amerika.

 Gavening Bodi i gat 6-pela komiti. Olgeta wan wan bilong ol dispela brata i insait long wanpela o sampela bilong ol dispela komiti.

•   Komiti Bilong Ol Kodineta: Dispela komiti i lukautim ol samting long sait bilong ol kot keis, na helpim ol bratasista long olgeta hap long taim bilong disasta, taim ol man i mekim nogut long ol Witnes Bilong Jehova bikos long bilip bilong ol, na taim ol narapela hevi i painim ol Witnes Bilong Jehova.

•   Komiti Bilong Lukautim Ol Wokman: Dispela komiti i lukautim lain i wok long Betel.

•   Komiti Bilong Wokim Ol Buk Samting: Dispela komiti i lukautim wok bilong wokim na salim ol buk na nius bilong Baibel i go long olgeta hap, na tu, em i lukautim wok bilong sanapim ol haus bilong mekim lotu, ol trenslesen ofis, na ol brens.

•   Komiti Bilong Wok Autim Tok: Dispela komiti i lukautim wok bilong mipela long autim “gutnius bilong Kingdom.”​—Matyu 24:14.

•   Komiti Bilong Wok Tisa: Dispela komiti i lukautim wok bilong redim ol tok bilong Baibel i save kamap long ol miting, ol skul, na ol odio na vidio program.

•   Komiti Bilong Raitim Tok: Dispela komiti i lukautim wok bilong redim ol tok bilong Baibel i save kamap long ol buk na nius na ol pablikesen i stap long websait bilong mipela na em i lukautim tu wok bilong trenslesen.

 Na tu, long olgeta wik Gavening Bodi i save bung bilong skelim ol samting bilong helpim oganaisesen. Long ol dispela miting ol i save skelim ol tok bilong Baibel na larim holi spirit bilong God i stiaim ol na bai ol i ken wanbel wantaim na wokim ol disisen.​—Aposel 15:25.

 Ol dispela brata ol i strongpela Kristen em ol i save helpim ol komiti bilong Gavening Bodi. (1 Korin 4:2) Ol i gat save pinis long mekim wok long komiti ol i insait long en, na ol i save go long miting bilong en long olgeta wik. Tru ol dispela man i no save insait long wok bilong wokim ol disisen, tasol ol i save kamapim sampela tingting bilong ol na givim sampela infomesen, mekim ol samting em komiti i wanbel long en, na sekim hau ol dispela samting i wok long go het. Gavening Bodi i save makim ol tu long go lukim ol bratasista long ol narapela hap bilong graun o long givim ol tok long ol kain bung olsem annual miting o gretiuesen bilong Skul Gileat.