Taim ol yia i lus, isi isi sampela marit i lusim pasin bilong soim pasin laikim long narapela narapela. Sapos dispela i wok long kamap long marit bilong yu, yu ting i stret long tingting planti?

•  Samting yu mas save

•  Samting yu ken mekim

 Em i bikpela samting long soim pasin laikim na bai marit i stap strong. Wankain olsem yumi save kisim kaikai na wara long olgeta de na bai bodi i stap strong na yumi no sik, wok yet long soim pasim laikim long narapela narapela na dispela bai strongim marit. Maski ol i marit inap planti yia, ol maritman na maritmeri i mas harim na lukim olsem poroman marit i laikim na tingim tru ol.

 Pasin laikim tru i no save tingim em yet. Man i gat pasin laikim tru i save mekim ol samting bilong amamasim narapela. Na em i no mekim tasol long taim we em i pilim olsem em i laik mekim, nogat. Poroman marit husat i save tingim poroman bilong em bai wok strong long kisim save long samting narapela i laik bai em i mekim bilong soim pasin laikim na em bai wok strong long inapim.

 Planti taim ol maritmeri i laik bai maritman i soim olsem em i laikim em, tasol ol man i no pilim olsem. Maritman inap laikim tru meri bilong em. Maski man i kamapim olsem em i laikim meri bilong em long kirap na pinis bilong de o paslain long em i slip wantaim em, meri bai holim tupela tingting sapos em i laikim em o nogat. Olsem na em gutpela long soim pasin laikim long olgeta taim.

 Soim pasin laikim long toktok bilong yu. Ol liklik tok olsem “Mi laikim yu” o “Yu dia tumas long mi” inap mekim poroman marit i pilim olsem yu tingim em tru.

 Stiatok bilong Baibel: “Maus i save autim ol tingting i pulap long bel.”​—Matyu 12:34.

 Rot: Yu ken tokim narapela olsem yu laikim em, tasol i gat sampela samting moa yu ken mekim. Raitim ol liklik nout, salim e-mail, o teks mesis.

 Soim pasin laikim long samting yu mekim. Holimpas, kis, o holim han inap soim olsem yu laikim em tru na yu no tok tasol olsem “Mi laikim yu.” Yu inap soim olsem yu tingim tru narapela long taim yu tatsim em, lukluk long em bilong soim olsem yu laikim em, na sampela taim yu givim presen. Na tu, mekim ol samting long helpim meri bilong yu​—ating karim beg, opim dua, wasim plet, wasim klos, o redim kaikai? Long planti, ol dispela samting i no wok nating, nogat, dispela em rot bilong kamapim pasin laikim!

 Stiatok bilong Baibel: “Yumi no ken kamapim pasin laikim long tok o long maus tasol, nogat, yumi mas kamapim tu long ol samting yumi mekim.”​—1 Jon 3:​18.

 Rot: Mekim pasin yu bin mekim long taim yutupela i bin pren bilong soim olsem yu tingim em.

 Makim haptaim long stap wantaim narapela. Long taim yutupela i lusim haptaim long stap wantaim narapela, dispela i strongim marit na i soim poroman marit olsem yu tingim em. Tru em hatwok long makim haptaim long stap wantaim poroman marit sapos yupela i gat ol pikinini o i gat planti wok long mekim long olgeta de. Sapos olsem, ating yutupela i ken plen long mekim liklik samting olsem go wokabaut​—yutupela tasol i ken mekim.

 Stiatok bilong Baibel: “Yupela inap skelim gut wanem ol samting i bikpela samting moa.”​—Filipai 1:​10.

 Rot: Sampela marit husat i save bisi i makim taim long toktok wantaim olsem tupela marit long olgeta nait o long ol wiken.

 Save long poroman marit. Olgeta man i gat narapela narapela tingting long pasin bilong soim olsem yu laikim narapela. Olsem na toktok wantaim long samting yupela i laik bai narapela i mekim long yu bilong soim pasin laikim na sampela samting moa we yupela i laik bai narapela i mekim. Na bihain wok strong long mekim samting poroman bilong yu i laikim. Tingim, em i bikpela samting long soim pasin laikim na bai marit i stap strong.

 Stiatok bilong Baibel: “Man i gat pasin laikim . . . i no save tingim em yet.”​—1 Korin 13:4, 5.

 Rot: No ken tingting tasol long narapela bai soim pasin laikim, askim yu yet, ‘Mi ken mekim wanem na bai poroman marit i ken soim pasin laikim long mi?’