Olsem wanem? Yu luksave olsem long nau em i hatwok moa long save long wanem tok em i tru na wanem tok em i giaman? Long nau ol man i larim filings na tingting bilong ol yet i stiaim ol samting ol i bilip long en, na ol i no larim tok i tru na ol samting i bin kamap tru i stiaim bilip bilong ol. Long olgeta hap bilong graun long nau, planti man i bilip olsem i no gat tok i tru.

 Ol man long bipo i holim wankain tingting olsem. Inap olsem 2,000 yia i go pinis, Gavana Pontius Pailat Bilong Rom i givim dispela askim long Jisas olsem: “Tok i tru em wanem samting?” (Jon 18:38) Pailat i no wet long harim bekim, tasol dispela askim em i bikpela samting. Baibel i kamapim gutpela bekim, na em inap helpim yu long luksave long wanem ol tok em i tru na wanem ol tok em i giaman long nau we ol manmeri i paul nabaut.

Yu ting yumi inap painim tok i tru?

 Yes. “Tok i tru” em hap tok Baibel i yusim bilong stori long ol samting i tru na ol pasin i stret em yumi mas bihainim. Baibel i skulim yumi olsem God Jehova a em i As bilong tok i tru. Baibel i tok em i “God bilong mekim pasin tru tasol.” (Buk Song 31:5) Tok i tru i stap long Baibel i kam long God. Tok i tru em i wankain long lait bikos em inap stiaim yumi i go long rot em yumi mas bihainim.​—Buk Song 43:3; Jon 17:17.

Hau yu ken painim tok i tru?

 God i no laik bai yumi bilipim nating ol tok bilong Baibel, nogat. Em i invaitim yumi long bihainim gutpela tingting taim yumi skelim ol dispela tok, na yumi no larim filings bilong yumi i stiaim yumi long bilipim nating ol tok. (Rom 12:1) Em i laik bai yumi save long em na laikim em long “long tingting olgeta” bilong yumi, na em i laik bai yumi pruvim long yumi yet olsem tok bilong Baibel yumi lainim em tok i tru.​—Matyu 22:37, 38; Aposel 17:11.

Husat em i as bilong ol tok giaman?

 Baibel i tok olsem birua bilong God, em Satan, em i as bilong ol tok giaman. Baibel i kolim em olsem “papa bilong pasin giaman.” (Jon 8:44) Em i bin mekim ol tok giaman long God taim em i toktok wantaim fes man na meri. (Stat 3:1-6, 13, 17-19; 5:5) Kirap long dispela taim bipo na i kam, Satan i wok yet long spredim ol tok giaman long God na em i pasim ol manmeri long save long tok i tru long God.​—Revelesen 12:9.

Wai na planti man i save mekim pasin giaman long nau?

 Long haptaim nau yumi stap long en, em Baibel i kolim olsem “taim bilong las de,” Satan i wok long giamanim ol manmeri winim olgeta narapela taim bipo. Planti man i mekim pasin giaman bilong paulim ol narapela na kisim ol samting bilong ol. (2 Timoti 3:1, 13) Na tu, pasin giaman i pulap long planti lotu long nau. Baibel i bin tok profet olsem long taim bilong yumi, ol man bai “kisim ol tisa husat bai mekim ol tok em yau bilong ol i sikirap long harim,” na “ol bai i no laik harim moa tok i tru, nogat.”​—2 Timoti 4:3, 4.

Wai na tok i tru em i bikpela samting?

 Ol man i mas save long tok i tru na bai ol i ken trastim narapela narapela. Sapos i no gat trast, ol man bai i no pas gut wantaim na stap wanbel. Baibel i tok God i laik bai yumi mas lotuim em long pasin i tru. Em i tok: “Ol man i lotuim [God], ol i mas lotuim em long strong bilong holi spirit na long pasin i tru.” (Jon 4:24) Bilong kisim save long hau tok i tru bilong Baibel i ken helpim yu long luksave na sakim ol bilip giaman bilong ol lotu, ritim ol atikol siris “Ol Tok Giaman Olsem God i No Gat Pasin Laikim.”

Wai na God i laik bai mi save long tok i tru?

 God i laik kisim bek yu, na bilong em i ken mekim olsem yu mas kisim save long tok i tru long em. (1 Timoti 2:4) Sapos yu kisim save long ol lo bilong God long wanem samting i stret na wanem samting i no stret na yu bihainim ol dispela lo, yu bai pas gut wantaim Em. (Buk Song 15:1, 2) God i salim Jisas i kam long graun bilong helpim ol manmeri long kisim save long tok i tru. Em i laik bai yumi mas putim yau long ol tok em Jisas i bin skulim yumi long en.​—Matyu 17:5; Jon 18:37.

Yu ting taim bai kamap we God bai pinisim tru pasin giaman?

 Yes. God i no save amamas long lukim ol man i mekim pasin giaman bilong kisim ol samting bilong ol narapela. Em i tok promis long bagarapim ol manmeri em ol i tingting strong long mekim yet pasin giaman. (Buk Song 5:6) Taim God i mekim olsem, em bai truim tok promis bilong em olsem: “Lips i save mekim tok tru bai stap oltaim oltaim.”​—Provep 12:19.