Ol i lusim bikpela mani tru long woa.

•   “Long graun olgeta, mani ol i tromoi long ol samting bilong ol militeri em i go antap tru inap long mak bilong 2.2 trilion dola taim i gat planti woa i stap long nau.”​—The Washington Post, Februeri 13, 2024.

 I gat planti samting moa ol i lusim na i no mani tasol. Tingim wanpela eksampel: Woa long Yukren.

•   Ol soldia. Sampela saveman i tok olsem klostu 500,000 soldia i bin dai o kisim bagarap long dispela woa stat long taim woa i bin kirap 2-pela yia i go pinis.

•   Ol man nating. Lain Yunaitet Nesen i tok winim 28,000 manmeri i bin dai o ol i bin kisim bagarap. Tasol wanpela i gat namba insait long Yunaitet Nesen i tok: “Long nau yet i hatwok long save long hamas manmeri nating em dispela woa i bin bagarapim tru laip bilong ol.” a

 Ol woa na ol pait i kamap long graun olgeta i bagarapim tru laip na sindaun bilong planti manmeri tru.

•   114 milion. Em namba bilong ol manmeri em woa na pait i kamap long graun olgeta i mekim na ol i mas lusim ol haus bilong ol kirap long Septemba 2023.

•   783 milion. Em namba bilong ol manmeri i stap hangre. “Pasin bilong pait em nambawan bikpela risen na ol man i stap hangre, na winim 70 pesen bilong ol manmeri i stap hangre long graun olgeta, ol i stap long ol ples i gat woa na ol pait.”​—World Food Programme.

 Yu ting woa bai pinis long bihain? Yumi inap bilip olsem bai i gat bel isi? Yu ting ol man bai yusim mani samting bilong dispela graun bilong pinisim pasin bilong i stap hangre na stap rabis? Baibel i tok wanem?

 Baibel i tok profet long woa bai kamap long olgeta hap bilong graun, na em i tok piksa long en olsem man i sindaun long hos na ron i go.

•   “Narapela hos i kam, em wanpela retpela hos, na man i sindaun antap long dispela hos em i kisim namba bilong tekewe bel isi long graun bai narapela man i kilim i dai narapela man, na em i kisim wanpela bikpela bainat.”​—Revelesen 6:4.

 I gat narapela tupela man i sindaun long hos i wok long ron bihainim dispela man i sindaun long hos, dispela tupela man i sindaun long hos i makim hangre na dai i kamap long rot bilong sik na ol narapela samting. (Revelesen 6:5-8) Bilong kisim sampela save moa long dispela tok profet na risen na yumi ken bilip tru olsem truim bilong en i kamap long taim bilong yumi, ritim atikol “Fopela Man Long Hos—Ol i Husat?”

 Klostu nau, ol man bai i no inap tromoi moa bikpela mani samting long baim ol samting bilong woa. Tasol ol man yet i no inap kamapim dispela samting, nogat. Baibel i tok:

•   God bai “mekim i dai ol pait i kamap long olgeta hap bilong graun.”​—Buk Song 46:9.

•   God bai pinisim ol samting nogut em woa i save kamapim. “Em bai mekim drai aiwara i stap long ai bilong ol, na bai i no gat dai moa, na ol bai i no bel hevi moa na krai moa, na ol bai i no inap pilim pen gen. Ol dispela samting bilong bipo ol i pinis olgeta.”​—Revelesen 21:4.

•   God bai mekim ol man i sindaun bel isi tru inap oltaim oltaim. “Ol manmeri bilong mi bai stap long wanpela ples i gat bel isi long en, long ol ples we i gat gutpela sindaun na ol gutpela ples malolo.”​—Aisaia 32:18.

 Baibel i tok profet olsem ol woa na ol samting yumi lukim long nau i soim olsem dispela taim bilong bel isi bai kamap klostu tru.

 Olsem wanem God bai kamapim dispela taim bilong bel isi long bihain? Em bai mekim long rot bilong gavman bilong em long heven, o Kingdom. (Matyu 6:10) Bilong kisim save long dispela Kingdom em i wanem samting na ol wok em bai mekim bilong helpim yu, watsim dispela sotpela vidio Kingdom Bilong God Em i Wanem Samting?