Ol gutpela pasin i wok long pinis. Ol sikman i no gat rispek i bikmaus long ol dokta; ol kastama i no gat rispek long ol woklain long restron; ol bikhet pasindia i paitim ol woklain bilong balus; ol pikinini i wail olgeta na tok bilas, tok nogut, na atektim ol tisa; na sampela politisen i insait long korapsen na ol narapela i strong long makim wanem pasin em gutpela pasin long tingting bilong ol yet.

 Baibel i gat ol gutpela edvais long wanem ol pasin i stret. Baibel i stori tu long risen na planti i no bihainim ol gutpela pasin long nau.

 Ol gutpela pasin i wok long pinis—ol pasin we i orait na i stret—long olgeta hap bilong graun.

•   Wok painimaut long Amerika i soim olsem planti manmeri tru i no moa bihainim ol gutpela pasin olsem ol i bin mekim insait long 22 yia i go pinis.

•   Wanpela sevei ol i mekim long winim 32,000 manmeri long 28 kantri, 65 pesen bilong ol i tok olsem planti manmeri tru long nau i no gat ol gutpela pasin we wanpela man o meri i mas gat, na dispela em nogut moa.

 Baibel i tok profet long ol pasin yumi lukim long nau.

•   “Taim nogut bai kamap long las de. Ol man bai laikim ol yet, gridi, apim nem bilong ol yet, mekim pasin antap; tok nogut, sakim tok bilong papamama, ol bai i no tok tenkyu, . . . ol bai no laikim gutpela pasin, [na] ol bai wail olgeta.”​—2 Timoti 3:1-3, Good News Translation.

 Sapos yu laik kisim sampela save moa long hau dispela tok profet i kamap tru, ritim aitkol “Did the Bible Predict the Way People Think and Act Today?”

 Ol manmeri i no moa mekim ol gutpela pasin long nau, tasol planti milion manmeri i kisim helpim long Baibel long mekim ol gutpela pasin. Ol man inap “trastim ol tok bilong em, nau na i go inap oltaim bihain.” (Buk Song 111:8) Skelim sampela eksampel:

•   Baibel i tok wanem: “Olgeta samting yupela i laik bai ol man i mekim long yupela, yupela i mas mekim long ol.”​—Matyu 7:12..

   Mining: Yumi mekim gutpela pasin long ol narapela na soim rispek long ol, wankain olsem yumi laik bai ol i mekim long yumi.

•   Baibel i tok wanem: “Yupela i rausim pinis pasin giaman, olsem na yupela wan wan i mas mekim tok tru long ol arapela.”​—Efesus 4:25..

   Mining: Yumi mas onest long olgeta toktok na pasin bilong yumi.

 Sapos yu laik kisim sampela save moa long dispela topik, plis ritim:

•   Nius Wastaua nem bilong en “Samting i Stret na i No Stret—Buk Yu Ken Trastim.”

•   Atikol “Pasin Bilong Lukluk Tasol na i No Mekim Wanpela Samting—Baibel Inap Helpim Yumi.”