God i wokim bodi bilong yumi long pasin we em inap stretim em yet. Taim man i no gat sik i katim, sikirapim, o sutim wanpela hap bilong bodi, bodi “i save bihainim sampela wei bilong stretim ol bikpela na liklik sua.” (Johns Hopkins Medicine) Kwiktaim bodi i mekim sampela samting bilong stopim blut, mekim ol rop bilong blut i go bikpela, stretim ol sua, na strongim skin.

TINGIM: Sapos Krieta i wokim bodi bilong yumi bilong stretim em yet, yu ting yumi ken bilip long ol tok promis bilong em long helpim yumi long taim yumi bel hevi? Man bilong raitim song i tok: “Em i save mekim orait ol manmeri, hevi i bagarapim tingting bilong ol na ol i pilim nogut. Na em i pasim ol sua bilong ol.” (Song 147:3) Tasol sapos yu bel hevi tru long ol samting i kamap long bipo o long nau, olsem wanem yu inap bilip tru olsem Jehova bai givim bel isi long yu?

God i tok promis: “Yupela i no ken pret, long wanem, mi God bilong yupela na mi stap wantaim yupela. Bai mi mekim yupela i kamap strong na bai mi helpim yupela.” (Aisaia 41:10) Taim man i save olsem Jehova i tingim em, em bai i stap bel isi na i gat strong long karim kain kain traim. Aposel Pol i kolim dispela bel isi olsem “bel isi bilong God i winim tru tingting bilong man.” Pol i tok: “God i givim pawa long mi, na long dispela rot mi gat strong long mekim olgeta samting.”—Filipai 4:4-7, 9, 13.

Ol tok bilong Baibel i helpim yumi long strongim bilip long ol tok promis bilong Jehova long ol manmeri long bihain. Olsem, Revelesen 21:4, 5 (tok i stap long neks pes) i tokim yumi long samting em bai mekim na risen na yumi ken bilip long em:

• “Em bai mekim drai aiwara” long ai bilong ol man. Jehova bai pinisim olgeta pen na hevi na bel hevi, maski ol narapela i ting em i no bikpela samting.

• “Man i sindaun long sia king” long heven, em King i Gat Olgeta Strong husat i wokim olgeta samting bai yusim strong na namba bilong em long pinisim ol pen na hevi na givim helpim yumi nidim.

• Jehova i tok ol promis bilong em “i tru olgeta.” Dispela i makim olsem, em i tingim gutnem bilong em olsem God tru na truim ol promis bilong em.

“‘Na em bai mekim drai aiwara i stap long ai bilong ol, na bai i no gat dai moa, na ol bai i no bel hevi na krai moa, na ol bai i no inap pilim pen gen. Ol dispela samting bilong bipo ol i pinis olgeta.’ Na Man i sindaun long sia king i tok: ‘Harim! Mi mekim olgeta samting i kamap nupela.’ Na em i tok moa: ‘Yu mas raitim ol dispela tok, long wanem, ol man inap bilip tru long ol dispela tok na ol dispela tok i tru olgeta.’”—Revelesen 21:4, 5.

Ol samting long yunives na ol tok bilong Baibel i tokaut long pasin bilong Papa bilong yumi long heven. Ol samting God i wokim i helpim yumi long kisim save long em olsem wanpela gutpela Pren, Baibel i kamapim klia dispela na i tok: “Yupela i mas i go klostu long God, na em bai kam klostu long yupela.” (Jems 4:8) Aposel 17:27 i tok: “Em i no stap longwe long yumi olgeta wan wan.”

Taim yu lusim haptaim long kisim save long God, bilip bilong yu bai go bikpela olsem em i “save wari long [yu].” (1 Pita 5:7) Wanem ol gutpela samting i kamap long dispela kain pasin bilong bilip long Jehova?

Tingim stori bilong Toru long Japan. Mama Kristen i mekim bikpela long em, tasol em i insait long wanpela lain raskol em ol i kolim yakuza, ol Mafia Bilong Japan. Em i tok, “Mi bilip olsem God i heitim mi, na mi pilim olsem dai bilong lain mi stap pren wantaim ol, moa yet ol lain mi laikim, em panismen bilong mi.” Toru i tok, wok bilong mi na tingting mi gat i mekim na mi “no bel sori na pilim tingting bilong narapela.” Em i tingim wok bilong em na i tok, “Mi laik dai taim mi yangpela yet bihain long mi kilim wanpela husat i gat biknem winim mi, na long dispela rot mi bai kisim biknem.”

 Taim Toru na meri bilong em, Hannah, i stadi long Baibel, Toru i mekim ol bikpela senis long laip na tingting bilong em. Hannah i tok: “Mi lukim man bilong mi i mekim ol senis.” Nau Toru i bilip na tok: “I gat God husat i save tingim tru yumi olgeta wan wan. Em i no laik bai wanpela i dai, na em i redi long fogivim ol man i tanim bel tru long ol rong ol i mekim. Em i save putim yau long ol samting yumi no inap tokim ol narapela na ol narapela i no inap kliagut long en. Klostu nau, Jehova bai pinisim olgeta pen na hevi yumi karim. Long nau, em i save helpim yumi long ol rot yumi no ting long en. Em i laikim yumi na em i save helpim yumi taim yumi bel hevi.”—Song 136:23.

Olsem ekspiriens bilong Toru, taim yumi save olsem God inap—na klostu nau em bai mekim—pinisim olgeta hevi na aiwara long ai bilong ol man, dispela i helpim yumi long stap gut long nau, na tu, yumi bilip tru na wet long gutpela laip long bihain. Yes, maski yumi stap long graun we i pulap long ol pen na hevi, yumi inap kisim helpim long pasin laikim bilong God.