Taim yu laik save long wanpela, namba 1 samting yu bai askim, “Wanem nem bilong yu?” Sapos yu givim dispela askim long God, em bai tok wanem?

“Mi Jehova. Dispela em nem bilong mi.”—Aisaia 42:8.

Dispela nem i bikpela samting long God yet. I no gat wanpela man i givim nem long God; em i makim dispela nem bilong em yet. Jehova i tok: “Dispela em i nem bilong mi inap oltaim oltaim, na ol lain pipol i kamap bihain bihain i mas tingim mi long dispela nem.” (Kisim Bek 3:15) Long Baibel, nem bilong God i stap planti taim moa winim ol biknem bilong em, olsem God i Gat Olgeta Strong, Papa, Bikpela, o God, na i stap planti taim moa winim ol narapela nem, olsem Abraham, Moses, Devit, o Jisas. Na tu, em laik bilong Jehova long olgeta man i mas save long nem bilong em. Baibel i tok: “Ol manmeri i ken save olsem yu, nem bilong yu, Jehova, yu wanpela tasol yu God Antap Tru na yu bosim olgeta hap bilong graun.”—Buk Song 83:18.

Dispela nem i bikpela samting long Jisas. Long beten em planti man i kolim Papa Bilong Mipela o Beten Bilong Bikpela, Jisas i skulim ol disaipel long beten long God olsem: “Nem bilong yu i mas i stap holi.” (Matyu 6:9) Jisas yet i beten long God olsem: “Papa, litimapim nem bilong yu.” (Jon 12:28) Jisas i tingim wok bilong litimapim nem bilong God i namba wan samting long laip bilong em, dispela em risen na long beten em i tok: “Mi bin kamapim nem bilong yu long ol na mi bai kamapim moa yet.”—Jon 17:26.

Dispela nem i bikpela samting long ol man i save long God. Ol lain bilong God long bipo i kliagut olsem nem bilong God bai banisim na kisim bek ol. “Nem bilong Jehova i olsem wanpela strongpela taua. Ol stretpela man i save ron i go insait long en na em i banisim ol.” (Provep 18:10) “Olgeta manmeri i singaut long nem bilong Jehova, em bai kisim bek ol.” (Joel 2:32) Baibel i soim olsem nem bilong  God i tokaut long ol man i lotuim em. “Olgeta manmeri bai wokabaut long nem bilong god bilong ol yet, tasol mipela bai wokabaut long nem bilong Jehova, God bilong mipela, inap oltaim oltaim.”—Maika 4:5; Aposel 15:14.

Dispela nem i makim God wanpela tasol. Planti saveman i tok nem Jehova i makim “Em i Mekim i Kamap.” Jehova God i kamapim mining bilong nem bilong em taim em i kolim ol dispela tok long Moses bilong makim em yet: “Mi Bai Kamap Wanem Wanem Kain Mi Laikim.” (Kisim Bek 3:14) Nem bilong God i no kamapim klia tasol wok bilong em olsem Krieta bilong olgeta samting na ol i stap, nogat. Nem bilong em i kamapim klia strong na save bilong em long mekim em yet, na tu, ol samting em i wokim i kamap wanem wanem kain bilong inapim ol samting em i tingting pinis long kamapim. Ol biknem inap kamapim namba, wok bos, na strong bilong God, na nem bilong em, Jehova, dispela nem tasol i makim em i husat, na em bai kamap wanem wanem kain.

Nem bilong God i soim olsem em i laikim yumi. Mining bilong nem bilong God i kamapim klia olsem oltaim em i laikim ol samting em i wokim, na yumi ol man tu. Na tu, God i kamapim nem bilong em long yumi na dispela i soim olsem em i laik bai yumi save long em. Paslain long yumi askim long nem bilong em, em yet i go pas long tokim yumi. Em i klia tru, God i laik bai yumi tingim em olsem Man i stap tru na yumi inap i go klostu long em, na i no olsem wanpela god yumi no inap i go klostu long em na em i stap longwe tru.—Buk Song 73:28.

Taim yumi yusim nem bilong God dispela i soim olsem yumi laikim em. Yumi ken tok piksa olsem, ating yu tokim wanpela em yu laik kamap pren bilong em olsem em i mas singautim yu long nem tru bilong yu. Bai yu pilim olsem wanem sapos em i no laik kolim nem bilong yu? Ating bihain bai yu tingting olsem em i laik tru long kamap pren bilong yu o nogat. Dispela i wankain long God. Jehova i tokim yumi long nem bilong em, na em i kirapim yumi long yusim. Taim yumi mekim olsem, yumi soim Jehova olsem yumi laik i go klostu long em. Em yet i luksave tu long “ol man i tingim tingim [o, “laikim tumas,” futnot] nem bilong em”!—Malakai 3:16.

Namba 1 samting long kisim save long God, em yumi mas save long nem bilong em. Na tu, yumi mas kisim save long Man i holim dispela nem. Yumi mas save long em i wanem kain man tru.