“Ol maritman i mas laikim meri bilong ol olsem ol i laikim bodi bilong ol yet. Man i laikim meri bilong em, em i laikim em yet. Long wanem, i no gat wanpela man i save heitim bodi bilong em yet, nogat. Em i save givim kaikai long en na tingim olsem samting i dia tumas.”—EFESUS 5:28, 29.

Maritman em i het bilong famili. (Efesus 5:23) Tasol gutpela maritman i no save mekim hatpela pasin o bosim strong meri bilong em. Em i save tingim gut meri bilong em na lukautim em long ol samting bilong skin na bel na tingting. Na tu, em i save wok strong long amamasim meri bilong em, na em i no save strong long meri i bihainim laik bilong em long olgeta taim. (Filipai 2:4) Em i save tokim meri bilong em long laik na tingting bilong em, na em i save putim yau taim meri bilong em i toktok. Em i no save “belhat nogut tru” long meri bilong em o paitim em o mekim tok i daunim em.—Kolosi 3:19.

“Maritmeri i mas i gat bikpela rispek long man bilong em.”—EFESUS 5:33.

Taim maritmeri i rispektim man bilong em na sapotim ol disisen bilong em, em i helpim famili long i stap bel isi. Sapos man bilong em i popaia, em i no save daunim man bilong em, nogat, em i save mekim pasin isi na pasin rispek. (1 Pita 3:4) Taim em i laik tokim man bilong em long wanpela hevi, em i save makim gutpela taim long mekim na em i save toktok wantaim man bilong em long pasin rispek.—Eklisiastis 3:7.

“Man bai . . . pas wantaim meri bilong em, na tupela bai kamap wanpela bodi.”—STAT 2:24.

Taim man na meri i marit, tupela i kamap wanpela famili. Olsem na tupela marit i mas mekim ol samting bilong strongim marit bilong ol long rot bilong toktok gut wantaim na mekim ol gutpela pasin long narapela narapela. Na ol i mas stap gut long poroman marit bilong ol na ol i no ken mekim maritpasin wantaim wanpela husat i no poroman marit bilong ol. Man o meri i mekim pasin adaltri, dispela i save givim bikpela pen long poroman marit bilong em. Na dispela i save bagarapim pasin bilong trastim narapela narapela na i save brukim famili.—Hibru 13:4.

“Trenim gut pikinini long rot em i mas bihainim; na maski taim em i kamap lapun em bai no inap lusim dispela trening.”—PROVEP 22:6, futnot.

God i givim wok long ol papamama long skulim ol pikinini bilong ol. Dispela i makim olsem ol i mas skulim ol long ol pasin ol i mas bihainim na ol papamama i mas stap gutpela piksa bilong ol. (Lo 6:6, 7) Taim wanpela pikinini i bikhet, papamama i gat savetingting, ol bai i no inap kros hariap. Papa o mama bai ‘putim yau kwik long harim tok, na i no hariap long mekim toktok, na i no belhat hariap.’ (Jems 1:19) Sapos papa o mama i lukim olsem em i mas stretim pikinini, em i mas mekim long pasin laikim, na em i no ken mekim wantaim belhat.

“Ol pikinini, yupela i mas bihainim tok bilong papamama bilong yupela . . . ‘Onarim papa na mama bilong yu.’”—EFESUS 6:1, 2.

Ol pikinini i mas bihainim tok bilong ol papamama na soim pasin rispek long ol. Taim ol pikinini i soim ona long ol papamama, ol i mekim famili i stap amamas na i stap bel isi wantaim. Ol pikinini i bikpela pinis ol i save soim ona long papamama bilong ol long rot bilong lukautim ol gut. Ol i helpim tu papamama long stretim gut haus bilong ol o helpim ol long sait bilong mani.—1 Timoti 5:3, 4.