OL MAN I NARAKAIN TRU—YUMI SAVE RAIT, PENIM PIKSA, WOKIM OL SAMTING, NA YUMI TINGIM OL BIKPELA ASKIM BILONG LAIP: Bilong wanem God i wokim heven na graun? Yumi kamap olsem wanem? Yumi stap bilong mekim wanem? Wanem samting bai painim yumi long bihain?

Sampela man i no laik mekim ol kain askim, ol i ting i hatwok tru long painim bekim. Ol narapela i tok olsem i no gat wok long mekim ol kain askim bikos laip i kamap long rot bilong evolusen. William Provine em saveman bilong histori na saiens, na em i tok: “I no gat ol god. Olsem na i no gat risen long bilip olsem God i stap, na laip i no gat as bilong en.”

Sampela man i no wanbel long dispela tingting. Ol i luksave olsem i gat ol lo i stiaim ol samting long heven na graun. Ol man i kirap nogut long lukim disain bilong ol samting i gat laip, na sampela i yusim ol dispela disain long wokim ol samting. Ol kain kain disain bilong ol samting God i wokim i helpim ol man long luksave olsem wanpela man i gat bikpela save i bin wokim ol dispela samting.

Dispela i mekim na ol man i bilip long evolusen i senisim tingting bilong ol. Skelim 2-pela eksampel.

DOKTA BILONG KRU, ALEXEI MARNOV. Em i tok: “Ol skul mi go long en i skulim mi olsem i no gat God na ol samting i kamap long rot bilong evolusen. Sapos man i bilip long God, orait em i no gat save.” Tasol long yia 1990, tingting bilong em i senis.

Em i tok: “Mi gat laik tru long save long risen na ol samting i kamap, dispela i makim tu kru bilong yumi ol man. Kru bilong yumi i narapela kain tru long olgeta samting God i wokim long heven na graun. Olsem wanem? God i wokim kru bilong man long kisim save na bihain em bai i dai? Dispela tingting i no stret. Olsem na mi ting: ‘Yumi stap bilong mekim wanem?’ Taim mi skelim gut ol samting, mi luksave olsem i gat Krieta.”

Alexei i laik save long risen na yumi stap laip, na dispela i kirapim em long skelim gut ol tok bilong Baibel. Meri bilong Alexei em wanpela dokta na em i bilip olsem i no gat God. Em i laik kamapim klia olsem bilip bilong Alexei i no tru, olsem na em tu i kirap stadi long Baibel! Long nau, tupela wantaim i bilip long God na kliagut long samting God i tingting pinis long mekim long ol manmeri olsem Baibel i kamapim.

DOKTA HUABI YIN EM WANPELA SAIENTIST. Huabi Yin i stadim saiens, na inap planti yia em i mekim wok painimaut long san bilong yumi.

Huabi i tok: “Taim mipela ol saientis i stadim ol samting i kamap, mipela i painimaut olsem i gat ol lo i stiaim ol samting na ol i wok gut wantaim. Mi tingting: ‘Ol dispela lo i kamap olsem wanem? Sapos yumi inap long kontrolim paia taim yumi kukim kaikai, orait husat tru i putim ol lo we i kontrolim strong bilong san?’ I no longtaim, mi luksave olsem namba 1 ves bilong Baibel i kamapim bekim stret: ‘Bipo bipo tru God i mekim kamap skai na graun na olgeta samting i stap long en.’”—Stat 1:1.

Wok painimaut bilong saiens i mekim na planti askim i kamap, olsem: Ol sel long kru bilong yumi i wok olsem wanem? Olsem wanem san i save hot na givim lait long yumi? Alexei na Huabi i painimaut olsem Baibel i bekim ol bikpela askim olsem: Bilong wanem God i wokim heven na graun? Bilong wanem ol lo i stiaim ol samting long heven na graun? Yumi stap bilong mekim wanem?

Baibel i tok long graun olsem: “[God] i no wokim graun bilong i stap nating. Nogat. Em i bin wokim bilong olgeta samting i ken i stap long en.” (Aisaia 45:18) Olsem na i gat risen na God i wokim dispela graun, neks atikol bai stori long samting God i tingting pinis long mekim bihain, em samting yumi bilip na wet long en.