SKIN bilong palai thorny devil bilong Australia i save pulim wara long kol bilong nait, long taim ples i hat, na tu, long wesan i gat wara. Bihain, wara i ron i go long maus bilong en na bai em i ken dring. Wanem samting i helpim em long mekim olsem? Skin bilong dispela palai i narakain tru na em inap long pulim wara.

Tingim: Skin bilong palai thorny devil i gat planti grile. Long sait sait bilong olgeta grile, i gat ol baret i stap. Sampela saientis i ting taim liklik wara i pas long ol grile, nau ol i save bihainim ol dispela baret namel long ol grile na bai wara inap ron i go long maus bilong palai thorny devil.

Tasol olsem wanem dispela palai i sakim lo bilong graviti taim em i pulim wara long lek i go long olgeta hap bilong bodi na bihain i go long maus bilong en? Na tu, palai thorny devil i save rapim bel bilong en long graun na bai em i ken pulim wara i go long bodi bilong en. Hau em inap mekim olsem?

Wok painimaut bilong ol saveman i helpim ol long stori gut long hau dispela palai i pulim wara. Ol samting i olsem ol liklik baret namel long ol grile long skin bilong palai i join long ol narapela liklik baret i stap aninit long skin bilong en. Skin bilong dispela palai i narakain tru, long wanem, em i no bihainim lo bilong graviti long larim wara i ron i go daun long lek bilong en, nogat. Wara i ron long ol baret long skin bilong en, olsem na skin bilong en i olsem wanpela spans i holim wara.

Janine Benyus em presiden bilong Biomimicry Institute i tok, pasin bilong palai thorny devil long pulim wara inap long helpim ol ensinia long wokim wanpela masin we inap long mekim haus i stap kol maski taim ples i hat, na tu, bilong kisim wara long dring.

Yu ting wanem? Skin bilong palai thorny devil long pulim wara i kamap long rot bilong evolusen? O wanpela i bin wokim?