OL MAN I TOK

Planti man i ting olsem ol man inap long stap amamas sapos ol i gat gutpela sindaun na planti mani kago. Na ol i ting ol man i stap rabis i no inap stap amamas, long wanem, i hatwok long ol i go long skul, na kisim gutpela helpim long haus sik samting.

BAIBEL I TOK

Baibel i skulim yumi olsem bilong i stap amamas tru, yumi mas kisim save long Krieta na pas gut wantaim Em. Baibel i tok: “Ol man i hangre long kisim save long God, ol i ken amamas.” (Matyu 5:3) Maski man i gat planti mani kago o nogat, sapos em i hangre long kisim save long God em bai amamas long bihainim tingting bilong Em long ol disisen em i mekim. Na taim em i mekim olsem, em bai kisim save long tok i tru bilong Baibel na bel na tingting bilong em bai stap isi. Dispela inap mekim man i stap amamas tru.

Ol man i kliagut long tok bilong Baibel na ol i bihainim, ol i save long olsem wanem ol inap karim hevi long pasin bilong i stap rabis. Olsem, ol tok lukaut bilong Baibel i helpim ol man long abrusim ol pasin we inap bagarapim helt bilong ol, olsem pasin bilong smok na dring planti alkohol. Sapos man i insait long ol kain pasin olsem, em bai tromoi planti mani, na tu, em i mas baim bikpela mani taim em i go long haus sik.—Sindaun 20:1; 2 Korin 7:1.

Na Baibel i tok lukaut long ol hevi em pasin gridi na pasin bilong laikim tumas mani kago i kamapim. (Mak 4:19; Efesus 5:3) Sapos man i bihainim ol dispela gutpela stiatok bilong Baibel, em bai no tromoi mani long pilai laki, na kisim pasin bilong “laikim tumas mani.” Baibel i tok dispela pasin i “as bilong olgeta kain pasin nogut.” (1 Timoti 6:10) Na tu, Baibel i tok: “Maski man i gat planti samting, em i no kisim laip long ol dispela samting em i holim.” (Luk 12:15) Dispela i skulim yumi olsem maski man i gat planti mani, dispela i no inap helpim em long stap laip. Tasol man i bihainim ol gutpela stiatok bilong Baibel bai i stap amamas tru, long wanem, em i save long as na em i stap laip.

Maski ol man i stap rabis i wok strong long painim kaikai, klos, na haus samting, ol inap long amamas long ol samting ol i gat pinis, bihainim tok bilong Krieta, na mekim laik bilong em. Ol i luksave long tok promis bilong Baibel olsem, “Bikpela yet i givim yumi planti gutpela samting, em i no save larim ol dispela samting i givim hevi long yumi.”—Sindaun 10:22.

SKRIPSA BILONG TINGIM: “Ol man i hangre long kisim save long God, ol i ken amamas.”—Matyu 5:3.

BAIBEL I TOK

Ol gavman na oganaisesen bilong graun i no inap tru long pinisim hevi bilong i stap rabis. Long wanem, ol bikman bilong gavman i gat pasin gridi na ol i mekim ol samting bilong helpim ol yet. Tasol klostu nau God bai bagarapim ol dispela gavman. (Saveman 8:9) Krieta bilong yumi bai pinisim olgeta gavman bilong dispela graun husat i gat pasin bilong tingim ol yet. Na long rot bilong Kingdom bilong Em, em wanpela gavman long heven, God bai givim ol man olgeta samting ol i nidim. Baibel i tok promis olsem King long Kingdom Bilong God bai sori long ol man i stap rabis na em bai stretim ol hevi bilong ol. Baibel i tok: “[God] i save helpim ol rabisman i singaut long em. . . . Em i save sori long ol manmeri i no gat strong na i stap rabis. Na ol manmeri i no gat samting em i save kisim bek ol.”—Song 72:12-14.

Paradais bai kamap long graun, na olgeta man bai gat haus na kaikai, na bai yu no lukim wanpela man i stap rabis. Long buk Aisaia long Baibel, God i tok promis long lain bilong em olsem, “ol manmeri bilong mi bai i wokim ol haus na stap long ol. Na bai ol i planim ol gaden wain na wokim wain na dring. . . . Bai ol i amamas long ol samting ol yet i bin hatwok long kamapim.” (Aisaia 65:21, 22) Ol man bai i no wok hat long painim kaikai na haus samting, nogat. Jehova bai redim “bikpela kaikai tru” na givim planti gutpela samting long lain bilong em.—Aisaia 25:6.

BILONG WANEM EM I BIKPELA SAMTING?

Taim ol man i tingim ol tok promis bilong God long gutpela taim bai kamap bihain we ol bai i no stap rabis moa, dispela i helpim ol long save olsem God i tingim tru ol na klostu nau ol bai gat gutpela sindaun. Ol i bilip na wet long lukim truim bilong ol tok promis bilong Baibel, na dispela i helpim ol long karim ol hevi bilong nau.

SKRIPSA BILONG TINGIM: “[God] i save helpim ol rabisman i singaut long em. . . . Em i save sori long ol manmeri i no gat strong na i stap rabis. Na ol manmeri i no gat samting em i save kisim bek ol.”—Song 72:12, 13.