LONG 1950 samting, ol saientis i kisim save long ol marasin antibaiotik na ol i ting ol dokta inap yusim ol dispela marasin long helpim ol man. Pastaim ol dispela marasin i bin pinisim sik bilong ol man. Tasol taim ol man i wok long kisim planti marasin, nau dispela i kamapim ol nupela baktiria em marasin antibaiotik i no inap long daunim.

Bilong painim ol nupela rot bilong daunim sik, ol saientis i skelim ol samting ol dokta long bipo i mekim bilong daunim sik. Olsem, ol dokta i save tokim ol man long pulim klinpela win na kisim san lait bilong ol i ken gat gutpela helt.

Ol man bilong Inglan i bilip olsem san lait na klinpela win inap long helpim helt bilong ol man. Dokta John Lettsom (1744-1815) i tok win i kam long solwara na san lait inap helpim ol pikinini husat i gat sik TB. Long 1840, Dokta George Bodington i tok planti bilong ol fama, ol man bilong brukim graun, na ol man bilong was long sipsip i no save kisim sik TB. Tasol ol man i lusim bikpela haptaim long stap insait long haus, planti bilong ol i kisim sik TB.

Florence Nightingale (1820-1910) i kisim biknem long stap olsem nes bilong lukautim ol soldia bilong Briten long taim bilong Pait Bilong Kraimia. Em i tok sapos yu go long rum long nait na ol windo i pas inap sampela aua, bai yu luksave olsem rum i pulap long win nogut. Florence Nightingale i tok tu olsem i mas i gat klinpela win insait long rum bilong man i sik, tasol long wankain taim dispela rum i no ken kol tumas. Em i tok moa: “Taim mi lukautim ol sikman mi painimaut olsem i mas i gat klinpela win insait long rum, na tu, i mas i gat lait. . . . Dispela i makim san lait tu.” Planti man long dispela  taim i tok i gutpela long putim ol bet sit na klos samting long san, long wanem, san lait i kilim i dai ol baktiria na long dispela rot ol man bai gat gutpela helt.

Kirap long 1800, save bilong ol saientis i go bikpela, tasol ol tok ol i kamapim i wankain long tingting bilong ol man long bipo. Long 2011 wanpela wok painimaut long Saina  i soim olsem ol skul i gat ol rum slip i stap klostu long narapela narapela i mekim na i no gat klinpela win. Olsem na planti sumatin i kisim olkain sik sotwin samting.

Lain World Health Organization i tok klinpela win i bikpela samting long daunim ol sik. Olsem na long 2009, ol i raitim ol nius i tokaut olsem ol man i mas mekim ol samting bilong pulim klinpela win na bai sik i no ken kalap long ol narapela man long ol ples olsem haus sik samting. *

Ating yu bai tok, ‘Dispela em gutpela tingting.’ Tasol tru tru saiens i sapotim dispela tingting? Olsem wanem klinpela win na san lait inap helpim yumi long abrusim ol sik?

Wanpela wok painimaut long United Kingdom Ministry of Defence i helpim yumi long kisim sampela save moa. Ol saientis i mekim wanpela wok painimaut long save sapos ol man i tromoi wanpela bom nogut long London na dispela i kamapim ol binatang bilong givim sik, orait win nogut inap stap hamas haptaim. Bilong save long dispela, ol i bungim wanpela kain baktiria (E. coli microorganisms) wantaim haus bilong ol spaida na larim i stap ausait long hap we i gat win. Ol i wokim dispela eksperimen long nait, long wanem, san lait bai kilim i dai ol dispela baktiria. Ol i kisim wanem save long dispela wok painimaut?

Ol i luksave olsem klostu 2-pela aua bihain, olgeta baktiria i dai. Tasol taim ol i larim ol baktiria long wanpela boks na pasim lid bilong boks, bihain long 2-pela aua planti bilong ol dispela baktiria i stap laip yet. Dispela i givim wanem save long yu? Dispela i kamapim olsem win inap long kilim ol binatang i dai. Ol saveman i no save wanem samting stret i stap long win na i save kilim i dai ol binatang. Tasol wok painimaut i soim olsem i gat “marasin i stap long win we i save kilim i dai ol binatang.”

Na tu, san lait i stap olsem marasin bilong kilim i dai ol binatang. Nius Journal of Hospital Infection i tok “planti bilong ol binatang we i save kamapim sik i no inap long stap laip taim san lait i kisim ol.”

Olsem wanem san lait na klinpela win inap helpim yu? Ating yu inap i go ausait long haus na lusim sampela haptaim long pilim hat bilong san na pulim gutpela win. Sapos yu mekim olsem, dispela inap helpim helt bilong yu.