God tru em i Krieta bilong olgeta samting. Em i no gat kirap bilong em, na em i no gat pinis bilong em. (Song 90:2) Em i As bilong ol gutpela nius i stap long Baibel. (1 Timoti 1:11) God i givim laip long yumi, olsem na yumi mas lotuim em wanpela tasol.​—Ritim Revelesen 4:11.

I no gat wanpela man i bin lukim God bikos em i Spirit, dispela i makim olsem em i winim tru ol man bilong graun. (Jon 1:18; 4:24) Tasol yumi ken kisim save long ol pasin bilong God long rot bilong ol samting em i wokim. Olsem, ol kain kain prut na plaua i kamapim klia pasin laikim na savetingting bilong em. Na sais bilong yunives i tokaut long bikpela strong bilong em.​—Ritim Rom 1:20.

Yumi inap kisim bikpela save moa long pasin bilong God long rot bilong ritim Baibel. Olsem, Baibel i tokaut long ol samting God i laikim na ol samting em i no laikim, pasin em i mekim long ol manmeri, na ol samting em i mekim taim ol manmeri i mekim gutpela pasin o pasin nogut.​—Ritim Song 103:7-10.

Jisas i tok: “Papa bilong mipela long heven, nem bilong yu i mas i stap holi.” (Matyu 6:9) Maski God i gat planti biknem, em i gat wanpela nem tasol. Long olgeta wan wan tokples, i gat narapela narapela pasin bilong kolim dispela nem. Long Tok Pisin yumi save kolim “Jehova.” Tasol sampela i kolim olsem “Yawe.”​—Ritim Mak 12:29.

Planti Baibel i rausim nem bilong God na putim Bikpela o God. Tasol taim ol i bin raitim Baibel long bipo, nem bilong  God i stap inap olsem 7,000 taim. Jisas i kamapim nem bilong God taim em i skulim ol manmeri long God.​—Ritim Jon 17:26.

Lukim vidio Yu Ting God i Gat Nem?

Olsem wanem? Ol pen na hevi i stap nau i makim olsem God i no tingim yumi? Sampela man i tok olsem God i larim ol pen na hevi i painim yumi bilong traim yumi, tasol dispela em i no tru.​—Ritim Jems 1:13.

God i larim yumi yet long makim wanem samting yumi laik mekim. Yumi amamas long i stap fri bilong makim olsem yumi laik lotuim God o nogat. (Josua 24:15) Tasol planti man i save mekim ol pasin nogut long ol narapela, olsem na planti pen na hevi i stap. Jehova i bel hevi taim em i lukim kain pasin i no stret.​—Ritim Stat 6:5, 6.

Jehova em i God husat i save tingim yumi. Em i laik bai yumi stap amamas. Klostu nau, em bai pinisim pen na hevi, na ol manmeri husat i save mekim ol dispela pasin. Tasol inap sampela haptaim em i larim pen na hevi i stap. Long Stadi 8, bai yumi kisim save long as na em i mekim olsem.​—Ritim 2 Pita 2:9; 3:7, 13.

Jehova i singautim yumi long go klostu long em long rot bilong beten. Em i tingim yumi wan wan. (Song 65:2; 145:18) Em i redi long lusim rong bilong yumi. Em i luksave long hatwok yumi mekim bilong amamasim em, maski sampela taim yumi popaia. Olsem na maski yumi sinman, yumi ken pas gut wantaim God.​—Ritim Song 103:12-14; Jems 4:8.

Jehova i bin givim laip long yumi, olsem na yumi mas laikim em moa yet, winim ol narapela. (Mak 12:30) Taim yu kamapim olsem yu laikim God long rot bilong kisim save long em na mekim ol samting em i tokim yu long mekim, orait bai yu go klostu moa long em.​—Ritim 1 Timoti 2:4; 1 Jon 5:3.