CIINDI musololi wacikombelo umwi uutegwa William Bedell naakaunka ku Ireland mu 1627, wakajana bukkale bugambya kapati. Cisi ca Ireland, imuvwulide Bakatolika cakali kweendelezyegwa a Britain icisi civwulide ba Protestanti. Ba Protestanti Ibakasanduka bakalilisandulwide kale Bbaibbele mumyaambo yoonse iyakali kubelesyegwa mu Europe. Nokuba boobo, kunyina naba omwe iwakali kuyanda kulisandulula mumwaambo waci Irish.

Bedell wakali kulimvwa kuti bantu babelesya mwaambo waci Irish “tiibakali kuyandika kuti mane baiye Chingisi buya kutegwa bacikonzye kubala Bbaibbele.” Aboobo wakayeeya kuti Bbaibbele lisandululwe mumwaambo waci Irish. Pele wakakazyigwa citaambiki, kwaambisya kuzwa kuli ba Protestanti. Nkaambo nzi ncaakakazyigwa boobo?

Bedell wakalisungula kwiiya mwaambo waci Irish. Naakaba mupati-pati wacikolo ca Trinity College mu Dublin, wakakulwaizya basicikolo kubelesya mwaambo waci Irish alimwi aleelyo naakaba bishopo waku Kilmore. Bwini mbwakuti, ciindi ba Queen Elizabeth I baku England nobakatalisya cikolo ca Trinity College, bakacita oobo kutegwa kube basololi ibakonzya kuyiisya balelwa babo mulumbe wamu Bbaibbele mumwaambo wabo. Bedell wakasolekesya kutegwa makanze aaya azwidilile.

Bunji bwabantu ibakali kukkala ku Kilmore bakali kwaambaula mwaambo waci Irish. Aboobo Bedell wakayandisisya kuba abasololi ibakali kukonzya kwaambaula mwaambo waci Irish. Kulombozya kwakwe wakakwaamba kweelana amajwi aamwaapostolo Paulo aali mulugwalo lwa 1 Bakorinto 14:19 aamba kuti: “Mumbungano inga ndayandisya kwaamba majwi aali musanu aamvwika, kutegwa ndiyiisye bamwi, kwiinda kuti ndaambe majwi aali 10,000 mumwaambo uutazyibidwe,” nkokuti mwaambo bantu ngobatamvwisyi.

Pele bantu ibakali mubweendelezi bakasoleka canguzu kuti bamulesye Bedell. Kweelana abasikwiiya zyakaindi, bamwi bakali kwaamba kuti ikubelesya mwaambo waci Irish “kwakali kubikka Cisi muntenda” alimwi bamwi bakali kwaamba kuti “tiicakali kweendelana amakanze aa Mfwulumende.” Bamwi bakali kuyeeya kuti bantu baku England bakali kuyanda kuti bantu ibaambaula mwaambo waci Irish bakkale kakunyina ncobazyi. Mane buya kwakabikkidwe mulawo wakuti ba Irish bacileke kwaambaula mwaambo wabo akuleka zilengwa zyabo kutegwa baiye Chingisi akutobela nzila azilengwa zya Bangisi.

Bedell taakayoowa akaambo kamizeezo yakudyaaminina iili boobo. Kumatalikilo aamwaka wa 1630, wakatalika mulimo wakusandulula Bbaibbele kuzwa mu Bbaibbele lyamu Chingisi (busanduluzi bwa King James Version bwamu 1611) kutola mumwaambo waci Irish. Wakali kuyanda kusandulula Bbaibbele ilyakali kukonzya kumvwigwa abantu banji. Wakali kulimvwa kuti, bacete tabakonzyi kubala Magwalo kutegwa bajane nzila iisololela kubuumi butamani ikuti naa Bbaibbele kalisisidwe kulimbabo.—Johane 17:3.

Bedell tanaakali wakusaanguna kuzyiba kaambo aaka. Myaka iisika ku 30 iyakaindide, bishopo aumwi wazina lya William Daniel, wakabona mbocakali ciyumu kumuntu uuli woonse kwiiya Bbaibbele ncoliyiisya ikuti “kalili mumwaambo ngwatazyi.” Daniel wakalisandulwide kale Magwalo aa Banakristo aa Chigiriki mumwaambo waci Irish. Mpoonya Bedell wakatalika mulimo wakusandulula Magwalo aa Chihebrayo. Aboobo Bbaibbele liitwa kuti Bbaibbele lya Bedell lilabikkilizya abusanduluzi bwa William Daniel ibwakasaanguna kulembwa. Kweelana azintu mbozyakaba, Bbaibbele lya Bedell, nkokuti Ibbaibbele lyakusaanguna likkwene mumwaambo waci Irish, nde Bbaibbele lilikke lyakaliko mumwaambo waci Irish kwamyaka iili 300.

Bedell, syaazibwene mumwaambo waci Hebrayo wakalomba baalumi bobilo ibakali ba Irish kutegwa bamugwasye kusandulula kuzwa mu Chingisi kutola muci Irish. Mulimo nowakali kuyaabuyaambele, Bedell antoomwe abagwasyi bobilo ibakali kusyomwa, bakabeleka canguzu kusinizya izyakalembwa kuti zyakali kabotu kutobelezya kapango-akapango. Kutegwa basinizye nzyobakalemba, bakali kukozyanisya abusanduluzi bwaci Italian ibwakalembwa a Giovanni Diodati waku Switzerland, mpoonya a Bbaibbele lyakuti Septuagint lyamu Chigiriki alimwi a Bbaibbele liyandika kapati lyakaindi lyaci Hebrayo.

Bantu aaba bakatobela busolozi bwabasanduluzi ba King James Version (bunji bwabo balangilwa kuti bakalizyibidwe a Bedell) balo ibakabikkilizya azina lya Leza limugeme mumasena mumwi mu Bbaibbele lyabo. Mucikozyanyo, mulugwalo lwa Kulonga 6:3, izina lya Leza bakalilemba kuti “Iehovah.” Malembe aakusaanguna aa Bedell aliyobwedwe mu Marsh’s Library, Dublin, ku Ireland.—Amubone kabbokesi kakuti “Bedell Ulayeeyegwa Alimwi Ulizyibidwe.”

Bedell wakaumanizya mulimo wakwe wakusandulula Bbaibbele mu 1640. Pele taakacikonzya kulimwaya mpoonya-mpoonya. Ino nkaambo nzi? Kaambo kamwi nkakuti, wakacili kukazyigwa. Basikumukazya bakamwaamba zibi sikusandulula ngwaakali kusyoma Bedell, kabalangila kuti mulimo wakwe ulabula mpuwo. Mane buya bakamwaanga calunya akumubikka muntolongo. Kuyungizya waawo, mu 1641 Bedell wakajanika akati kabantu bajayi alimwi ibatakali kwiiyanda myaambo imwi kunze buyo lya Chingisi. Ba Irish bakubusena ooko bakamukwabilila Bedell kwaciindi cili mbocibede nokuba kuti wakali kuzwa ku England, nkaambo bakabona kuti wakali kubabikkila maano. Nokuba boobo, mukuya kwaciindi, basikalumamba bazangi bakamwaanga mubusena bubyaabi kapati. Eeci cakapa kuti afwambaane kufwa mu 1642. Aboobo wakafwa kalitanamwaigwa Bbaibbele ndyaakasandulula.

Kwakasyeede buyo asyoonto kuti mulimo ngwaakabeleka Bedell unyonyoonwe ciindi bantu nobakabba muŋanda yakwe akwiinyonyoona. Mucoolwe, mweenzinyina wakacikonzya kwaagwisya mapepa oonse ngaakasandulwide. Mukuya kwaciindi, Narcissus Marsh, walo iwakazooba bishopo mupati waku Armagh alimwi acikombelo ca Church of Ireland wakaabweza. Mpoonya wakalimwaya Bbaibbele lya Bedell mu 1685 kwiinda mukugwasyigwa asyaazibwene mumakani aasayaansi Robert Boyle.

Ibbaibbele lya Bedell tiilyakaba ampuwo kapati. Nokuba boobo, lyakagwasya kapati mukumvwisya Bbaibbele, kwaambisya kubantu baambaula mwaambo waci Irish—kutali buyo ku Ireland pele aku Scotland alimwi amumasena aambi manji. Lino bakali kukonzya kuzuzikizya nzyobayandika kumuuya ciindi nobabala Jwi lya Leza mumwaambo wabo.—Matayo 5:3, 6.

Ibbaibbele lya Bedell lyazumanana kugwasya bantu bayandisya kasimpe kucita oobo kusikila lino. Mwaalumi umwi iwaambaula ci Irish iwakaiya cini Bbaibbele ncoliyiisya wakati: “Notwakabala Bbaibbele lya Bedell, twakaamvwa majwi aamu Bbaibbele mumwaambo wesu. Eeci ncecakagwasya kuti mebo amukwasyi wangu twiiye kasimpe kajanika mu Magwalo.”