MU 1991, Bakamboni ba Jehova mucisi ca Russia bakakkomana kapati ciindi mulimo wabo iwakakasyidwe kwaciindi cilamfwu nowakazumizyigwa amulawo. Kuciindi eeco, mbasyoonto ibakali kuyeeya kuti mweelwe wa Bakamboni wakali kukonzya kuyungizyika kusika kubantu babalilwa ku 170,000 mazuba aano! Akati kabakambausi ba Bwami ibabeleka canguzu, kuli Bakamboni bamwi ibazwa muzisi ziindene-indene ibakaunka ku Russia kuyoogwasyilizya mumulimo wakutebula kwakumuuya. (Mt. 9:37, 38) Amuleke lino tubandike makani aajatikizya bamwi babaabo.

Ciindi mulimo nowakazumizyigwa mu Russia, ba Matthew ibakazwa ku Great Britain bakajisi myaka yakuzyalwa iili 28. Lyamuswaangano wacooko mwaka ooyo, kwakaambwa makani aakatondezya kuti mbungano zyaku Eastern Europe zyakali kuyandika kugwasya nkaambo zyakalibulide. Mucikozyanyo, mwaambi wakaamba mbungano ya St. Petersburg, ku Russia, yalo iyakajisi buyo mukutausi omwe pele tiiyakajisi mwaalu naba omwe. Nokuba boobo, basikumwaya bakali kusololela ziiyo zya Bbaibbele zinji! Ba Matthew bakaamba kuti: “Naakamana makani, ndakali kwiile kuyeeya kujatikizya cisi ca Russia, aboobo ndakapaila kuli Jehova kumwaambila cacigaminina makanze ngondakajisi aakulongela nkuko.” Ba Matthew bakayobola mali aali mbwaabede, bakasambala zintu zimwi nzyobakajisi, mpoonya bakalongela ku Russia mumwaka wa 1992. Ino zintu zyakabeendela buti?

Ba Matthew bakaamba kuti: “Ndakajisi buyumuyumu amwaambo, eeci cakali kupa kuti kacindiyumina kubandika makani aakumuuya.” Buyumuyumu abumwi bwakali bwakujana ŋanda. Bakaamba kuti: “Ndakali kulonga-longa alimwi tandiyeeyi naa ziindi zyongaye nzyondakalonga.” Nokuba kuti bakajana buyumuyumu buli boobu, ba Matthew bakaamba kuti: “Kulongela kucisi ca Russia cakali cakusala ciinda kubota ncondakacita mubuumi bwangu. Kwiinda mukubelekela kokuno ndaiya kusyoma Jehova cakumaninina alimwi akubona mbwasololela munzila ziindene-indene.” Mukuya kwaciindi ba Matthew bakasalwa kuba mwaalu mpoonya akuba mupainiya waalubazu alimwi lino babelekela kuofesi yamutabi iili munsi-munsi adolopo lya St. Petersburg.

Mu 1999, ba Hiroo bakamanizya lwiiyo lwa Cikolo Cakwiiya Mulimo mu Japan kabajisi myaka yakuzyalwa iili 25, mpoonya mukwesu umwi iwakali kubayiisya mucikolo  eeci wakabakulwaizya kuyoobelekela kunze aacisi mumulimo wakukambauka. Ba Hiroo bakamvwide kuti cisi ca Russia cakalibulide kapati, mpoonya bakatalika kwiiya mwaambo waci Russian. Mpoonya alimwi kuli cintu acimwi ncobakacita. Bakaamba kuti: “Ndakaunka ku Russia akukkala nkuko myezi iili cisambomwe. Akaambo kakuti kulatontola kapati ciindi camupeyo mu November, ndakaunka mumwezi ooyu kutegwa ndikabone naa ndakali kukonzya kukkala mubusena butontola.” Nobakamana kukkala muciindi eeci camupeyo, bakapiluka ku Japan kwalo nkobakatalika kupona buumi buuba-uba, kutegwa bayobole mali mabotu-botu akujokela ku Russia—kuyookkalila limwi.

Ba Hiroo lino bakkwanya myaka iili 12 mucisi ca Russia alimwi mumyaka eeyi babeleka mumbungano izili mbozibede. Zimwi ziindi kwakali kujanika kuti mbabakali baalu balikke mumbungano ibakali kulanganya basikumwaya ibainda ku 100. Mumbungano imwi, nsondo ansondo mbabakali kweendelezya zibeela zinji mu Muswaangano wa Mulimo, bakali kweendelezya Cikolo Camulimo Weendelezyegwa a Leza, Ciiyo ca Ngazi Yamulindizi, alimwi akweendelezya Ciiyo Cabbuku ca Mbungano kutubunga twiindene-indene tosanwe. Alimwi bakali kucita anyendo zyabweembezi zinji. Kuyeeya myaka eeyo yamusyule, ba Hiroo bakaamba kuti: “Cakali cintu cikkomanisya kapati kugwasya bakwesu abacizyi kutegwa bayume kumuuya.” Ino kubelekela kubusena kubulide basikumwaya kwakabagwasya buti? Bakaamba kuti: “Ndakaunka kucisi ca Russia kandili mwaalu alimwi kandili mupainiya, pele lino ndilimvwa kuti ndendilyo nondaba acilongwe cini-cini a Jehova. Ndaiya kumusyoma Jehova cakumaninina mumbazu zyoonse zyabuumi bwangu.” Mumwaka wa 2005, ba Hiroo bakakwata ba Svetlana, alimwi boonse bobilo bazumanana kubeleka mulimo wabupainiya.

Ba Matthew, ibajisi myaka yakuzyalwa iili 34 alimwi abasyoonto babo ba Michael, ibajisi myaka yakuzyalwa iili 28, bazwa kucisi ca Canada. Boonse bobilo bakaswaya cisi ca Russia alimwi bakagambwa kapati kubona bantu ibajisi luyandisisyo ibakali kujanika kumiswaangano pele kwakali buyo bakwesu basyoonto ibakali kukonzya kubayiisya Bbaibbele bantu aaba. Ba Matthew bakaamba kuti: “Bantu ibakajanika kumiswaangano kumbungano njondakaswaya bakali 200, pele miswaangano yoonse yakali kweendelezyegwa buyo amwaalu omwe ucembeede alimwi amukutausi mukubusi omwe. Eeci cakandipa kuba amakanze aakulongela nkuko kutegwa ndikagwasye bakwesu aaba.” Mumwaka wa 2002, bakalongela ku Russia.

Nokwakainda myaka yone, ba Michael bakalongela ku Russia alimwi bakajana kuti kwakacili kuyandika bakwesu abamwi. Mbwaanga bakali bakutausi, bakapegwa mukuli wakulanganya maakkaunti, mabbuku, alimwi azilawo. Alimwi bakalombwa kubeleka mulimo walo kanji-kanji uucitwa amulembi wambungano, kwaamba makani aabuleya, alimwi akugwasyilizya kulibambila miswaangano yabbazu alimwi amumulimo wakuyaka Maanda aa Bwami. Noliba lino, mbungano zinji ziciyandika lugwasyo. Nokuba kuti kulanganya milimo yiindene-indene kuyandika kubeleka canguzu, ba Michael, ibaalu lino, bakaamba kuti: “Kugwasya bakwesu cindipa kukkutila kapati. Nenzila yiinda kubota yakubelesya buumi bwangu!”

Mukuya kwaciindi, ba Matthew bakakwata ba Marina, mpoonya ba Michael bakakwata ba Olga. Banabukwetene aaba, antoomwe ababelesi banji ibalyaabide, bazumanana kugwasya mbungano.

Mumwaka wa 1994, ciindi ba Tatyana nobakajisi myaka yakuzyalwa iili 16, bapainiya baalubazu ibali cisambomwe ibakazwa ku Czech Republic, Poland, alimwi aku Slovakia, bakatalika kubeleka mumbungano yabo mucisi ca Ukraine. Mukuyeeya bapainiya aaba, ba Tatyana bakaamba kuti: “Aaba bakali bapainiya basungu ibakali kusikilika alimwi ibakali babombe, alimwi bakalilizyi kabotu Bbaibbele.” Bakabona Jehova mbwaakabalongezya akaambo kakulyaaba kwabo, aboobo bakayeeya kuti babe mbuli mbabo.

Akaambo kakukulwaizyigwa acikozyanyo cabapainiya aaba, ciindi nozyakali kujalwa zikolo ba Tatyana bakali kuunka abamwi mumasena aakumunzi mucisi ca Ukraine alimwi acisi ca Belarus, masena alo Bakamboni nkobatakaningasika. Bakali kuzikkomanina kapati nyendo eezyo zyabukambausi cakuti bakaba amakanze aakuyungizya mulimo wabo kwiinda mukulongela ku Russia. Cakusaanguna,  bakaunka kuyooswaya mucizyi iwakazwide kunze aacisi alimwi akuyoolangaula mulimo iwakali kukonzya kubagwasyilizya mumulimo wabo wabupainiya. Mpoonya mumwaka wa 2000, bakalongela ku Russia. Sena cakabayumina?

Ba Tatyana bakaamba kuti: “Akaambo kakuti tiindakali kukonzya kubbadelela ŋanda, ndakali kubbadelela buyo luumu yomwe muŋanda mobakali kukkala bamwi. Eeci tiicakali cuuba-uba pe. Kwakali ziindi zimwi nondakali kulombozya buyo kupiluka kucisi cesu. Pele Jehova lyoonse wakali kundigwasya kubona kuti ndakali kuyoogwasyigwa ikuti ndazumanana amulimo wangu.” Sunu, ba Tatyana mbaamisyinali mucisi ca Russia. Bakaamba kuti: “Myaka yoonse njondakkala okuno ndajana zintu zibotu alimwi abalongwe banji. Kwiinda zyoonse, myaka eeyi lusyomo lwangu lwayumizyigwa.”

Ba Masako ibazwa kucisi ca Japan, lino ibajisi myaka yakuzyalwa yamuma 50, lyoonse bakalijisi makanze aakuba misyinali, pele akaambo kakuciswa, tiicakali kulibonya mbuli kuti inga cakonzyeka. Nokuba boobo, ciindi nobakalibonya kuti kwaba kucinca, bakasala kulongela ku Russia akugwasya mumulimo wakutebula. Nokuba kuti cakali ciyumu kujana ŋanda iili kabotu alimwi amulimo, bakacikonzya kuligwasyilizya mumulimo wabupainiya kwiinda mukutalika kuyiisya mwaambo waci Japanese alimwi akubeleka mulimo wakusalazya. Ino ncinzi icabagwasya kuti bazumanane mumulimo wabo wakukambauka?

Kuyeeya myaka yamusyule yiinda ku 14 yakubelekela ku Russia, ba Masako bakaamba kuti: “Lukkomano ndondijana mumulimo wakukambauka lulandigwasya kulwana buyumuyumu mbondiyaanya. Kukambauka mumasena mubulide basikumwaya ba Bwami kulayumya kapati alimwi kulapa kukkomana kapati mubuumi.” Bakayungizya kuti: “Kubona Jehova mbwaandisanina, mbwaandisamika, alimwi akundipa aakukkala, ndicibona kuba maleele aamazuba aano.” Kunze aakubelekela mumasena aabulide ku Russia, ba Masako alimwi bakatola lubazu mumulimo wakutebula mucisi ca Kyrgyzstan. Kuyungizya waawo, bali kucikonzya kugwasyilizya tubunga tubelesya mwaambo wa Chingisi, ci Chinese alimwi amwaambo wa Uighur. Lino balabeleka kabali bapainiya mu St. Petersburg.

Akaambo kapenzi lyakujana mali, kanji-kanji mikwasyi imwi ilongela kuzisi zimbi kutegwa icikonzye kujana zintu zyakumubili nzyoiyandika. Pele mbubwenya mbuli  Abrahamu alimwi a Sara bansiku, mikwasyi imwi ilongela kunze aacisi akaambo kambaakani zyakumuuya. (Matl. 12:1-9) Amumvwe makani aajatikizya ba Mikhail alimwi aba Inga, banabukwetene ibazwa kucisi ca Ukraine ibakalongela kucisi ca Russia mumwaka wa 2003. Tiilyakalampa pe, bakajana bantu ibakali kulangaula kasimpe kamu Bbaibbele.

Ba Mikhail bakaamba kuti: “Ciindi cimwi twakakambauka mubusena Bakamboni mobatakaningasika. Mwaalumi uucembeede wakajalula cijazyo akutubuzya kuti: ‘Sena muli bakambausi?’ Ciindi notwakaingula kuti inzya, wakaamba kuti: ‘Ndakalizyi kuti bumwi buzuba muyoosika. Tacikonzyeki kuti majwi aa Jesu atazuzikizyigwi.’ Mpoonya mwaalumi ooyu wakazubulula lugwalo lwa Matayo 24:14.” Ba Mikhail bakayungizya kuti: “Mubusena oobu, alimwi twakajana kabunga kabamakaintu bacikombelo ca Baptist ibakali kubalilwa kukkumi, bakali bantu basyomeka ibakafwide nyota yakasimpe. Bakajisi bbuku lya Mulakonzya Kupona Kukabe Kutamani mu-Paradaiso Aanyika alimwi nsondo ansondo bakali kulibelesya kwiiya Bbaibbele. Kwamawoola manji twakaingula mibuzyo yabo alimwi akwiimba nyimbo zya Bwami ambabo, mpoonya twakalya antoomwe cakulya cakumangolezya. Oolu lweendo lwakali lubotu kapati cakuti tandikalulubi.” Ba Mikhail aba Inga balazumina kuti kubelekela kumasena aabulide basikumwaya ba Bwami kwabapa kuswena kapati kuli Jehova, luyando lwabo kubantu lwakomena, alimwi balongezyegwa kapati akukkutila mubuumi. Lino babeleka mulimo wamubbazu.

Mumwaka wa 2007, ba Yury alimwi aba Oksana, banabukwetene ibazwa kucisi ca Ukraine, lino ibali mumyaka yamuma 30, alimwi amwanaabo musankwa Aleksey, lino uujisi myaka yakuzyalwa iili 13, bakaswaya mutabi waku Russia. Ooku bakabona maapu ya Russia iyakali kutondezya zilawo zipati izyakabulide. Ba Oksana bakaamba kuti: “Notwakabona maapu eeyi, twakazyiba kuti kwakali kuyandika basikumwaya ba Bwami banji kwiinda mbotwakali kuyeeya. Eeci cakatupa kuba amakanze aakulongela ku Russia.” Ncinzi acimbi icakabagwasya? Ba Yury bakaamba kuti: “Kubala zibalo zijanika mumabbuku eesu, zibalo mbuli zyakuti ‘Can You Serve in a Foreign Field?’ (Sena Mulakonzya Kuyoobelekela Kucisi Cimbi?) zyakatugwasya kapati. * Twakaswaya busena bumwi ku Russia ooko ofesi yamutabi nkoyakatulomba kuti tuunke alimwi twakatalika kulangaula ŋanda alimwi amulimo.” Mumwaka wa 2008, bakalongela ku Russia.

Kumatalikilo, cakabakatazya kujana mulimo, alimwi ziindi zinji bakali kulonga-longa aakukkala. Ba Yury bakaamba kuti: “Twakali kupaila kuti tutatyompwi, alimwi twakazumanana amulimo wakukambauka, katujisi lusyomo muli Jehova kuti ulatugwasya. Twakabona Jehova mbwatulanganya ciindi notubikka zintu zya Bwami mubusena bwakusaanguna. Mulimo ooyu wayumya mukwasyi wesu.” (Mt. 6:22, 33) Mbuti kubelekela kubusena kubulide mbokwamugwasya mukubusi Aleksey? Ba Oksana bakaamba kuti: “Kwamugwasya kapati, wakalyaaba kuli Jehova kwiinda mukubbapatizyigwa kajisi myaka yakuzyalwa iili fwuka. Kubona kuti kuyandika bakambausi ba Bwami banji kulamukulwaizya kucita bupainiya bwakugwasyilizya ciindi zikolo nozyajalwa. Tulikkomene kapati kubona busungu alimwi aluyando ndwajisi mumulimo wakukambauka.” Lino ba Yury aba Oksana mbapainiya baalubazu.

Kweelana anzyobakaamba babelesi basikutebula aaba, cilalibonya kuti kulongela kubusena bumwi kutegwa muyungizye mulimo wanu wakukambauka kuyandika kuba alusyomo muli Jehova. Masimpe, aabo ibabelekela mumasena aabulide balayaanya buyumuyumu muzilawo zyabo zipya, pele alimwi balajana lukkomano lupati ilujanwa akaambo kakutola lubazu mumulimo wakwaambilizya makani mabotu kubantu ibayanda kumvwa mulumbe wa Bwami. Sena andinywe inga mwayanda kutola lubazu mumulimo wakuyobolola mumasena muciyandika basikumwaya ba Bwami? Ikuti mwasala kucita boobo, mulakonzya kulimvwa mbobakalimvwa ba Yury ibakaamba kujatikizya kusala kwabo kwakuyoobelekela kubusena kubulide, bakati: “Cintu comwe nconduuside ncakuti ndakamuka.”