IKUTI NAA mwakafwidwa muyandwa wanu, ambweni andinywe mulakonzya kulimvwa munzila ziindene-indene mbuli: kuusa, kulendelelwa alimwi akumaninwa maano. Ambweni mulakonzya kunyema, kulipa mulandu alimwi akuyoowa. Mane buya ambweni mulakonzya kutalika kudooneka naa cilagwasya kuzumanana kupona.

Amuzyibe kuti kulila tacilubide pe. Citondezya buyo mbomwali kumuyanda sikwaazwa. Nokuba boobo, sena cilakonzyeka kujana luumbulizyo ciindi nomuli mubuumba?

Nokuba kuti inga calibonya mbuli kuti buumba oobo tabukonzyi kumana, mulakonzya kujana luumbulizyo kwiinda mukubelesya nzila eezyi zitobela:

AMULILE CIINDI NOMULIMVWA KUTI MUYANDA KULILA

Bantu baliindene mbobalila alimwi abulamfwu bwaciindi ncobalila. Pele kulila kulakonzya kumugwasya kuyoya kubuumba buzwide mumoyo. Ba Vanessa ibaambidwe kale, bakaamba kuti: “Ndakali kwiile kulila nkaambo ndakali kuyanda kucesya kucisa nkondakamvwide mukati.” Ba Sofía ibakafwidwa mwanookwabo musimbi cakutayeeyela, bakaamba kuti: “Ndayeeya cakacitika, cilandicisa kapati, inga cili mbuli kuti ndidonkola cilonda cilaamasina akucisanzya. Nokuba kuti cilacisa citaambiki, pele cipa kuti cilonda cipone.”

AMUBANDIKE AMUNTU UMWI KUJATIKIZYA NZYOMUYEEYA AMBOMULIMVWA

Masimpe kuti, zimwi ziindi inga mwayanda kuba nyolikke. Pele buumba buli mbuli cintu cilema kapati ncomutakonzyi kunyamuna nyolikke. Jared uujisi myaka  yakuzyalwa iili 17, walo iwakafwidwa bausyi, wakaamba kuti: “Ndakali kubaambila bamwi kujatikizya mbondakali kulimvwa. Tandizyi naa nzyondakali kwaamba zyakali kulimvwisya, pele cakandigwasya kapati kwaambila bamwi mbondakali kulimvwa.” Ba Janice ibaambwa mucibalo cakusaanguna, bakayungizya kwaamba bubotu bumbi nobakati: “Kubandika abamwi cakanduumbulizya kapati. Ndakalimvwa kuti bantu bamwi bakalizyi mbondakalimvwide alimwi akuti tiindakali ndelikke munkondo eeyi.”

AMUZUMINE KUGWASYIGWA

Dokota umwi wakaamba kuti: “Basikufwidwa ibazumina kugwasyigwa abalongwe alimwi abanamukwasyi kuzwa ciindi nobafwidwa buyo muyandwa wabo, kanji-kanji balacikonzya kuzumanana kuliyumya mubuumba kakunyina buyumuyumu.” Amubazyibye balongwe banu ncobakonzya kucita kutegwa bamugwasye; kweelede kuti inga bayanda kumugwasya pele ambweni tabazyi mbobakonzya kucita oobo.—Tusimpi 17:17.

AMUSWENE KULI LEZA

Ba Tina bakaamba kuti: “Ciindi balumi bangu nobakafwa akaambo kabulwazi bwakkansa, tiindakacili kukonzya kubaambila mapenzi aangu, zintu nzyondakali kulibilika alimwi ambondakali kulimvwa, aboobo zyoonse ndakali kwaambila buyo Leza. Abuzuba ndakali kusaanguna kupaila kulomba kuti andigwasye kuliyumya buzuba boonse. Leza wakandigwasya munzila zinji kapati.” Ba Tarsha ibakajisi myaka yakuzyalwa iili 22 ciindi banyina nobakafwa, bakaamba kuti: “Kubala Bbaibbele buzuba abuzuba kwakanduumbulizya kapati. Kwakandigwasya kuba acintu cimwi cikkomanisya cakuzinzibala kuyeeya.”

AMWEEZYEEZYE MBOCIYOOBA AAKUBUSYIGWA MUYANDWA WANU

Ba Tina bakazumanana kwaamba kuti: “Kumatalikilo, bulangizi bwabubuke kunyina nobwakali kunduumbulizya pe nkaambo ndakali kuyanda buyo balumi bangu alimwi abalo bana bangu bakali kuyanda buyo kubona bausyi kabali baumi. Pele lino kakwiindide myaka yone, ndakatalika kububikkila maano bulangizi oobu. Lino bulanduumbulizya kapati, bulandigwasya kubikkila maano kuzintu zikkomanisya ziboola kumbele alimwi bulandigwasya kuliyumya. Ndilaakweezyeezya kubonana alimwi abalumi bangu, eeci cindipa kuba aluumuno lwamumizeezo alukkomano.”

Ambweni tamukonzyi kulimvwa kuumbulizyigwa kubuumba bwanu mpoonya-mpoonya. Nokuba boobo, ncobakaamba ba Vanessa cilakonzya kumukulwaizya. Bakaamba kuti: “Inga mwayeeya kuti kunyina nobuyakumana buumba, pele mukuya kwaciindi bulatalika kuceya asyoonto-syoonto.”

Kamuyeeyede kuti, nokuba kuti tamukonzyi kuleka kumuyeeya muyandwa wanu, bwini mbwakuti cilagwasya kuzumanana kupona. Kwiinda mukugwasyigwa a Leza, mulakonzya kuzumanana kukkomana abalongwe alimwi akuba abuumi bulaampindu. Ciinda kubota ncakuti, ino-ino Leza uyoobabusya bafwide. Uyanda kuti mukabatambule bayandwa banu alimwi. Mpoonya kucisa ooko ikuli mumoyo wanu kuyoomana mane kukabe kutamani.