CISI ca Azerbaijan ncecipati akati kazisi zyotatwe izili kubusena butegwa Southern Caucasus. Myaka iibalilwa ku 1,000 yainda, bantu banji bamusyobo waci Turkic bakatalika kuboola kuzookkala mucilawo eeci. Bantu aaba bakatalika kwiiya zilengwa zyabantu mbobakajana, mpoonya abalo bantu bamucisi eeci bakatalika kwiiya zilengwa zyabeenzu aaba. Aboobo, tacigambyi pe kuti mwaambo waci Azerbaijani ulikozyenye kapati amwaambo waci Turkish alimwi aci Turkmen.

Bana Azerbaijani balasamausya kapati. Mikwasyi ilikamantene, alimwi banamukwasyi balagwasyanya kapati muziindi zyamapenzi.

Bana Azerbaijani balayandisya kwiimba alimwi akweema. Musyobo wanyimbo umwi iwiitwa kuti mugam, mwiimbi ulaamba kujatikizya kweema kwabana Azerbaijani, kumwi zilimba kazilila. Mwiimbi wiimba lwiimbo lwa mugam weelede kuti kajisi luzyibo kujatikizya musyobo wanyimbo eezyi alimwi akucikonzya kwaanza nyimbo.

 Bana Azerbaijani balauyanda kapati tii. Banywida mututambula alimwi babelesya zikoto zyasyuga zipati, mpoonya banywisya maalmondi, misaansa alimwi atwakulya tumwi. Maanda mobanywida tii alajanika nomuba muminzi.

Cisi nkocili kujwe, kuli Lwizi lwa Caspian, mwalo mujanika nswi ziitwa kuti sturgeon. Inswi iitwa kuti beluga sturgeon ilakonzya kupona myaka iinda ku 100. Muswi wiinda kukomena iwakajatwa wakali kulema makkilogilamu aali 1,297, mpoonya wakali kulampa mamita aali 8.5. Muswi ooyu ulayandika kapati akaambo kamayi aakwe alo aaligwa aitwa kuti black caviar.

Bana Azerbaijani mbakombi ibayandisya kwaamba zya Leza. Bantu banji bakkala mucisi eeci mba Mozilemu. Alimwi muli azikombelo zimbi zyalo zibikkilizya a Bakamboni ba Jehova ibainda ku 1,000 alimwi bunji bwabo mbana Azerbaijani.