Ba Daiane Mbaakamboni ba Jehova alimwi mbakambausi baciindi coonse ku Brazil. Buzuba bumwi, nobakali kwaambila bamwi mulumbe wamu Bbaibbele afooni, bakabandika abanabukwetene bacili bana-bana bamwi ibakatondezya luyandisisyo. Banabukwetene aaba bakaambila ba Daiane kuti balongela kubusena buli kulamfwu ikutakwe malaiti aintaneti. Kuyungizya waawo, kunyina Bakamboni ba Jehova ibakkala ooko. Aboobo, kutegwa bazumanane amibandi yamu Bbaibbele, banabukwetene aaba bakapa ba Daiane namba yafooni yaabuleya yakumunzi nkobali kuyookkala, mpoonya bakazuminana buzuba alimwi aciindi nobani kubandika.

 Aciindi ncobakazuminana, ba Daiane bakatuma mpoonya banabukwetene bakaingula! Kwansondo zyobilo zyakatobela, bakabandika ziindi zyotatwe afooni.

 Pele kuzwa waawo, banabukwetene tiibakali kwiingula fooni. Kakunyina kutyompwa, ba Daiane bakazumanana kutuma afooni iilya ziindi zyotatwe munsondo, mpoonya bakali kubandika amuntu uuli woonse waingula. Cakazwa mpawo ncakuti, ba Daiane bakatalisya ziiyo zya Bbaibbele zinji kubantu bakumunzi ooko.

 Buzuba bumwi, ciindi ba Daiane abalumi babo nobakali kusololela ciiyo ca Bbaibbele kumwaalumi umwi afooni, musololi wacikombelo umwi wamumunzi wakabamvwa kababandika. Wakaswena afwaafwi asikwiiya kutegwa aumvwisye kabotu mubandi. Mpoonya wakalomba kuti abandike aba Daiane alimwi abalumi babo. Wakakkomana kapati anzyaakamvwa cakuti awalo wakali kuyanda ciiyo ca Bbaibbele!

 Mukuya kwaciindi, ba Daiane alimwi abalumi babo bakali kusololela ziiyo zya Bbaibbele zili 6 afooni kumunzi ooko, kubikkilizya akumusololi wacikombelo. Basikwiiya bamwi bakatalika kale kujanika kumiswaangano ya Bunakristo kwiinda mukubelesya fooni njoona yakubuleya. Mane buya umwi wabo wakapanga bbeenci kutegwa basikwiiya kabakkala ciindi cakwiiya.

 Ba Daiane alimwi abalumi babo balalumba kucoolwe ncobakajisi cakukambauka mulumbe wa Bwami kumunzi ooyu. Ba Daiane bakaamba kuti, “Jehova ulakonzya kubikka bubambe bwakuti bantu boonse basikilwe makani mabotu, tacikwe makani ankobakkala.”