Peepe. Bbayibbele litondeezya kuti Leza wakalenga bantu kuswaanizya ‘amisyobo’ iisiyene-siyene yabanyama, minsamu azilimwa. a (Matalikilo 1:12, 21, 25, 27; Ciyubunuzyo 4:11) Alubo litondeezya kuti bantu boonse bakazwa kuli Adamu aEva, bazyali besu bakusaanguna. (Matalikilo 3:20; 4:1) Bbayibbele talizuminani pe amuzeezo wakuti Leza wakabelesya nzila yakulisandukila kuti alenge zintu zisiyene-siyene. Nikuba boobo, Bbayibbele talikazyani pe abasayensi baamba kuti, chintu chimwi achimwi chipona chilakonzya kuba aamisyobo iisiyene-siyene.

•  Bamwi basyomaanzi?

•  Njiisyo yakulisandukila ileendelana na azyaambwa aaBbayibbele?

•  Kusiyana kwaminsamu iikozyenie naakuti banyama kweendelana aandawu nkuzijanika, zyaamba kuti nga zyalisandukila na?

 Bantu basyoma kuti Leza wakabelesya nzila yakulisandukila kukulenga zintu, bali aamizeezo iisiyene-siyene atala akuti wakazichita biyeni. Kweendelana abbuku litegwa Encyclopædia Britannica, bamwi basyoma kuti kuzyalana kwazintu njiinzila Leza njabelesya kuti zintu zilisandukile.

 Bamwi basyoma njiisyo yakulisandukila bayeeya kuti:

•   Zintu zyoonse zipona zyakazwa kuli chimwi chintu cheendelana aanchincho chakaliwo kuzwa chiindi.

•   Chintu chimwi chilakonzya kuchincha kuti chibe chimwi chintu chisiyene ambuchibede.

•   Leza nguwe uupa kuti zintu zilisandukile.

 Bbuku lyaMatalikilo litondeezya kuti Leza wakalenga zintu nkinkaako, muzeezo ooyu ukazyania azyaambwa muBbayibbele. Nikuba Jesu wakatondeezya kuti nzilyaamba bbuku lyaMatalikilo atala akulengwa kwazintu nzyachoonzyo. (Matalikilo 1:26, 27; 2:18-24; Matayo 19:4-6) Bbayibbele litondeezya kuti, Jesu katanaza aanyika wakali kukkala kujulu aLeza alubo wakagwasya Leza kulenga “zintu zyoonse.” (Johane 1:3) Nkinkaako, njiisyo yakuti Leza wakabelesya nzila yakulisandukila kuti alenge zintu tayiyendelani pe azyaambwa muBbayibbele.

 Bbayibbele talitubuzyi pe kuti misyobo iisiyene-siyene yachintu chimwi yeelede kusiyana zisikaali. Pesi lilazumina kuti munsamu uumwi ulakonzya kusiyana mbichani kweendelana ankujanika. Alubo banyama bakozyenie balakonzya kuba aamisyobo iisiyene-siyene chiindi nibazyalana. Nikuba kuti bamwi babonaanga kusiyana ooku zyaamba kuti chintu eecho ngachalisandukila pesi teembubo pe nkaambo nga teekwapangwa chimwi chintu chisiyene achakalengwa aaLeza.