Nicolas aCéline bakaswaana buyumu-yumu busiyene aaboobu. Bakakumbilwa kuti balongele kumbungano mpya amutabi wakuFrance. Bakaamba kuti: “Kumasaangunino twakabotelwa, pesi twakazoosaanguna kuyeeya beenzuma. Teetwakalinaba aabweenzuma busimide pe abakombima bamumbungano mpya.” a Katulikulanga-langa atala abuyumu-yumu oobu, nga ulachita biyeni kuti uzwidilile chiindi nwaalongela kumbungano mpya? Bamwi nga balachita biyeni kuti bagwasilizye? Alubo muunzilaanzi mukonzya kusungwaazya bamwi anduwe mukonzya kusungwaazigwa?

MALAYILILE AAKONZYA KUKUGWASYA CHIINDI NWAACHINCHA MBUNGANO

1. Syoma Jehova. (Int. 37:5) Kazumi wakuJapan wakachincha mbungano njaakali kunjilaayo kwaminyaka iisika ku20 chiindi mulumaakwe naakachinchwa ndawu yakubelekela. Kazumi ‘wakayibikka biyeni nzila yakwe mumaanza aaJehova’? Wakaamba kuti: “Ndakabuzya Jehova zyoonse zyakali mumoyo wangu atala akuyoowa nkundakalaako, kulendelelwa azintu zyakali kundikataazya. Chiindi choonse nindakali kuchita oobu, wakali kundipa manguzu ngindakali kuyanda.”

Niinzi nzweelede kuchita kuti uyungizye kusyoma Jehova? Mbuli munsamu mbuuyanda maanzi amanyowa kuti ukomene, andulo lusyomo lwesu luyanda maanzi amanyowa aakukozyanisya kuti lukomene. Nicolas waambwa musule, wakabona kuti kuyeeyesesya atala achikozyano cha-Abbrahamu, chaJesu achaPawulu kulagwasya. Baalumi aaba bakalipeda kusiya zintu zyiingi kuti bachite kuyanda kwaLeza. Kuchita oobo, kwakamugwasya kuti abe aachoonzyo chakuti Jehova wakali kunoomulangania. Kuba aapulogilamu yakubala Bbayibbili akuyeeyesesya atala  anzubala, kulakonzya kukugwasya kuti uzunde mapenzi nguswaana mubuumi alubo ulajana zintu nzukonzya kuzoobelesya kuti uzoosungwaazyanie abamumbungano nkunooli walongela.

2. Uteezyaanisyi mbungano mpya ayachiindi. (Muk. 7:10) Jules naakalonga kuzwa kuBenin kaya ku-United States kuli zintu zyiingi nzyaakeelede kuchincha akaambo kakusiyana kwaziyanza. Wakaamba kuti, “Ndakali kubonaanga ndakeelede kulipandulula kumuntu woonse ngundakali kuswaana.” Akaambo kakuti eezi zyakalisiyene azintu nzyaakazibide, wakasaanguna kulitantamuna kubakwesu abachizi. Naakali kuyabubaziba kabotu bakwesu abachizi, wakachincha maboneno aakwe. Wakaamba kuti: “Lino ndakabona kuti kufumbwa nkutubede munyika, bantu balikozyenie. Balaambuula akuchita zintu munzila iisiyene. Kuba aamaboneno aalikabotu atala anzila bantu mbubabede kulayandikana.” Nkinkaako, uteezyanisyi mbungano mpya ambungano yachiindi. Mbuli mbaakaamba umwi muchizi payona uutegwa Anne-Lise, wakaamba kuti, “Ndakalonga akaambo kakuti ndakali kuyanda kwiiya zintu zipya alubo teendakali kulangilila kuti kumbungano mpya ndikajane zintu kazichitwa mbuli kumbungano yangu yachiindi.”

Ambabo baalu tabeelede kweezyanisya mbungano njibakali kunjilaayo chiindi. Akaambo kakuti bakwesu bakumbungano nkwaakalongela bachita zintu zisiyene abakumbungano yachiindi, tazyaambi kuti zintu nzibachita tazili kabotu pe. Kulayandikana kuti uzibe zyiimo zyakundawu eeyo kutanasala zyakuchita. (Muk. 3:​1, 7b) Kulayandikana kuti ube chikozyano chilikabotu kwiinda kuti upe kuti bakwesu abachizi babe aamaboneno aali mbuli aako.—2 Kor. 1:24.

3. Ba aazyiingi zyakuchita mumbungano mpya. (Flp. 1:27) Kuti muntu walongela kuliimwi ndawu nga ulaazyiingi zyakuchita, pesi kulayandikana kuti tufwambaane kunjila miswaangano abamwi. Bakwesu abachizi bamumbungano mpya ngabayanda kukubona chiindi chiingi kuchitila kuti babe aabweenzuma buli aafwiifwi anduwe akuti bakonzye kukugwasya. Lucinda abana bakwe basimbi babili bakalongela kudolopo pati lyakuSouth Africa, wakaamba kuti: “Ndakasungwaazigwa kuti ndibikkile maanu kukuliswaanizya aamwi ambungano kwiinda mukubeleka changuzu mumulimu wakukambawuka alubo akusandula kumiswaangano. Alubo twakajula mweenya kung’anda yesu kuti bakwesu abachizi kabachitila nkuko muswaangano wamulimu wakukambawuka.”

“Kupona bweelede” mumilimu yabukombi aamwi abakwesu abachizi mumbungano nkuwalongela ninzila iilikabotu iipa kuti “mulwanine lusyomo lwamakani mabotu.” Anne-Lise, waambwa kumasaangunino, baalu bakamusungwaazya kuti akambawukaamwi abamwi mumbungano nkwaakalongela. Kwakaba mpinduunzi? Wakaamba kuti, “Ndakafwambaana kubona kuti nzila eeyi njiyo iikonzya kupa kuti ndiyandwe mumbungano.” Alubo kulipeda kuchita milimu iili mbuli kusalazya akubambulula Ng’anda yaBwaami kutondeezya kuti waabubona mbungano eeyo kayili yako. Kuba aazyiingi zyakuchita kulaamwi abamumbungano mpya kuyoopa kuti ulimvwe kuti njiyo mpuli yako.

 4. Ba aabeenzinyokwe bapya. (2 Kor. 6:​11-13) Kuba aandaba bamwi ninzila iilikabotu yakusaanguna iikonzya kupa kuti ube aabeenzinyokwe. Nkinkaako, kayitanasaanguna miswaangano aniyamana, jana chiindi chakwaambuuzyania aabamwi kuchitila kuti ubazibe kabotu. Beleka changuzu kuti uzibe mazina aabo. Kuyeeya mazina aabantu, kuba muntu uusangalizya alubo uusikika, kupa kuti ube aabeenzinyokwe bapya.

Kwiinda kuti ukataazikane kuti bantu bamumbungano mpya balakuyanda na, iwe lwako zumizya bakwesu abachizi bamumbungano mpya kuti bakuzibe mbubede. Chita mbuli Lucinda, wakaamba kuti, “Twakaba aabweenzuma buli aafwiifwi lino akaambo kakuti twakabweza ntaamu zyakutamba bamwi kung’anda yesu.”

“AMUTAMBULANE”

Kunjila muNg’anda yaBwaami muzwide bantu bapya kulakonzya kuyoosya kuli bamwi. Nkinkaako, niinzi nzweelede kuchita kuchitila kuti bantu balongela kumbungano yako baangunuke? Mwaapostoli Pawulu wakasungwaazya bakombinyina kuti: “Amutambulane mbuli mbaakamutambula Kkristu.” (Rom. 15:7) Kwiinda mukutobelezya chikozyano chaKkristu, baalu balakonzya kugwasya bachili bapya kuti baangunuke. (Langa kabbokesi kati, “ Malayilile Aakonzya Kukugwasya Nwaachincha Mbungano”) Nikuba oobo, bamumbungano boonse kuswaanizya abana, balakonzya kugwasya bachili bapya kuti baangunuke mumbungano.

Kutambula beenzu kuswaanizya kubatamba kumaanda eesu, akubagwasya aazintu nzibayandikana. Muchikozyano, umwi muchizi wakabelesya chiindi chakwe kuti atondeezye umwi muchizi wakachili mupya dolopo alubo akumupandulwida kwakali kujanika moota zyakugada. Kulipeda kwamuchizi ooyu kwakamusungwaazya muchizi ooyu mupya alubo kwakapa kuti aangunuke.

MWEENYA WAKUKOMENA MUBUKOMBI

Chiindi nsozi niiyabukomena nga yalikupula kwazyiindi zyiingi kuti ikonzye kuuluka. Munzila iikozyenie, chiindi nitwalongela kuliimwi mbungano, tweelede kusowa bumwi buntu bukonzya kutukachizya  kutalamuna mababa eesu aakukozyanisya mumulimu waJehova. Nicolas aCéline bakaamba kuti, “Kuchincha ndawu kuyiisya zintu zyiingi. Kuliswaanizya aamwi abantu bapya azimwi zintu zisiyene-siyene, zyakatusungwaazya kuti tube aabuntu bupya.” Jean-Charles, waambwa kumasaangunino wakaamba nzila mpuli yakwe mbuyakagwasigwa, wakati: “Kulonga ooku kwakapa kuti bana besu bakomene mubukombi mumbungano eeyi mpya. Nikwakayinda myeezi miche, mwana wesu musimbi wakapegwa chipanzi chakuchita kumiswaangano yaakati kamviki alubo mwaneesu mulombe wakaba sikupupulula uutanabbabbatizigwa.”

Ani kuti zyiimo zyako kazitakuzumizyi kuchincha mbungano mbuli kulongela kubusena kuyandikana basikupupulula biingi. Ulakonzya kupa kuti mbungano yako mubede ibe mpya kwiinda mukubelesya nzila zyaambwa muchiiyo eechi. Yinkilila kunembo kusyoma Jehova alubo kkala kujisikini kulaamwi abamumbungano yako kwiinda mukupulana kuzwaamwi abamwi mumulimu wakukambawuka alubo kwiinda mukuyanduula beenzinyokwe bapya naakuti kubaziba kabotu aabo mbulaabo kale. Ulakonzya na kugwasya bantu bapya mumbungano azintu nzibayandikana naakuti kugwasya mbuzi kale? Mbukunga luyando ndulo lutondeezya maKkrisu bakasimpe, kuchita oobo kuyookugwasya kuti ukomene mubukombi. (Joh. 13:35) Ulakonzya kuba aachoonzyo chakuti Leza “ulabotelwa azipayizyo zili boobu.”—Heb. 13:16.

Nikuba kuti baswaana buyumu-yumu, maKkristu biingi bakazwidilila, bakachita zyiingi alubo bakabotelwa chiindi nibakalongela kuliimwi mbungano. Anduwe ulakonzya kuchita oobo! Anne-Lise wakaamba kuti, “Kuchincha mbungano kwakandigwasya kuti ndichite zintu zyiingi.” Kazumi lino wakaba aachoonzyo chakuti “kulongela kuliimwi ndawu kukugwasya kubona Jehova mbakugwasya kwiinda mbaakali kuchita chiindi.” Niinzi nzyaakazoowamba Jules? Wakaamba kuti: “Beenzuma bapya mbindakabaabo mumbungano mpya bakandigwasya kuti ndilimvwe kanditalendeleledwe pe. Lino ndiliiyanda mbungano eeyi zyakuti kwiisiya kulandiyumina.”