KUTI kakuli wakafwidwa, amwi anduwe ulalendelelwa, ulakataazikana alubo zilakuchisa. Chimwi chiindi ulakonzya kuyoowa, kulipa mulandu akunyema. Amwi nga walibuzya kuti, buumi buchigwasya na?

Kulila teekubi pe, chimwi chiindi kulakonzya kutola chiindi chilamfu. Kulila kutondeezya mbuwakali kumuyanda sikufwa. Niinzi zikonzya kukuumbulizya?

Nikuba kuti ulakonzya kubonaanga kuchisa nkulikumvwa mumoyo takuzoomani pe pesi zintu zitobela zilakonzya kukuumbulizya:

LIPE CHIINDI CHAKULILA

Bantu balila munzila zisiyene-siyene, bamwi balakonzya kutola chiindi chifwiifwi kabali kuyeeya muntu wakafwa pesi bamwi batola chiindi chilamfu. Kulila kulakonzya kugwasya muntu kuti atontozye machise aali mumoyo. Vanessa iwaambwa kumatalikilo aachiiyo eechi wakati: “Ndakali kulila kuchitila kuti nditontozye machise aakali mumoyo.” Sofía wakafwidwa mukulanaakwe katachisidwe wakati: “Kuyeeya atala azyakachitika kwakali kundichisa. Kuchisa nkundakali kumvwa kwakali mbuuli kwakusanzigwa chilonda amaanzi alaamunyo. Nisimpe kuti kusanzigwa chilonda amaanzi alaamunyo kuchisa zitaambiki pesi kupa kuti chipone.”

 BUZYA BAMWI ZINTU ZILIKUKUKATAAZYA

Chimwi chiindi ulakonzya kumvwa kuyanda kuba awulikke. Pesi weelede kuyeeya kuti chaala chimwi tachijayi njina, nkinkaako weelede kuba aabamwi. Jared iwakafwidwa wisi kalaamakole aali 17, wakati: “Ndakabuzya bamwi mbundakali kulimvwa alubo eezi zyakatontozya machise aakali mumoyo wangu. Kulakonzeka kuti nzindakali kwaamba teezyakali kumvwika pe pesi kubuzya bamwi kwakandigwasya.” Janice iwaambwa muchiiyo chakusaanguna wakati: “Kubuzya bamwi zindikataazya kwakandigwasya loko. Bakali kundimvwisisisya alubo ndakamvwa kanditalendeledwe pe.”

ZUMINA KUGWASIGWA

Umwi dokotela wakati: “Muntu wakafwidwa weelede kuzumina kuti beenzinyina azibbululu bamugwasye. Kuchita oobo kulakonzya kumugwasya kuti alisimye.” Beenzinyokwe ngabayanda kukugwasya pesi ngatabazi kuti mpali mpuyanda kugwasigwa, nkinkaako weelede kubabuzya.—Tusimpi 17:17.

LANGILA KULI LEZA KUTI AKUGWASYE

Umwi mwanakazi uutegwa Tina wakati: “Mulumaangu naakafwa aabulwazi bwakkensa, ndakabona kuti Leza nguwe luzutu ngundakali kukonzya kubuzya zintu zyakali kundikataazya. Buzuba abuzuba ndakali kukumbila Leza kuti andigwasye kuti ndilisimye. Leza wakandigwasya munzila zyiingi loko.” Tarsha naakafwidwa banyina kali aaminyaka iili 22 wakati: “Kubala Bbayibbele kwakandigwasya loko nkaambo nzindakali kubala zyakanduumbulizya.”

YEEYA CHIINDI BANTU NIBAYOOBUSIGWA

Tina wakayungizya kuti: “Kumatalikilo bulangilizi bwakuti bantu bayoobusigwa, teebwakandigwasya pe nkaambo ndakali kuyanda mulumaangu alubo bana bangu bakali kuyanda wisi. Pesi lino kwayinda makole aali 4 kuzwa mulumaangu naakatusiya, bulangilizi oobu bulikundigwasya kuti ndilisimye. Ndilangilila chiindi nindiyoomubona lubo mulumaangu alubo bulangilizi oobu bulanduumbulizya.”

Kuchisa nkulikumvwa mumoyo kulakonzya kutola chiindi chilamfu. Nzyakaamba Vanessa zilakonzya kukugwasya. Wakati: “Ulakonzya kubonaanga tukoofwa walisimya pesi mukuya kwachiindi zintu zilakonzya kusaanguna kubota.”

Nikuba kuti kuchisa nkulikumvwa kulakonzya kutola chiindi chilamfu pesi tazyaambi kuti buumi tabuchigwasyi pe. Leza ulakonzya kukupa bulangilizi bwabuumi bulikabotu kunembo. Bulangilizi oobo bupa kuti tubotelwe. Muchiindi chifwiifwi chili kunembo, Leza uyoobusya bantu bakafwa alubo uyanda kuti tuzoobabone lubo babbululu besu. Kuchisa nkutumvwa akaambo kakufwidwa kuyoomana.