Mbuli mbuwayiiya zili mukabbuku aka, Bbaibbele lilaamalayilile miingi loko aakonzya kukugwasya ampuli yako. Jehova uyanda kuti ubotelwe. Usyomezya kuti, ikuti wabikka kuyanda kwakwe mubusena bwakusaanguna, “zintu eezi zyoonse mulaziyungizizigwa azyalo.” (Matayo 6:33) Mubwini uyanda kuti ube mweenzinyina. Cita zyoonse nzyukonzya kuti usakwide buzolwani bwako aLeza. Eeci ncilongezyo ciinda zyoonse muntu ncakonzya kubaaco.—Matayo 22:37, 38.

NZILYAAMBA BBAIBBELE: “‘Nzoomubeda mbuli Usowanu, anywebo muzoondibeda bana bangu baalumi abanakazi.’ Mbuboobo mbwaamba Jehova Singuzuzyoonse.” (2 BaKorinto 6:18) Leza uyanda kuti ube mweenzinyina ulaafwiifwi anguwe. Kukomba njiimwi nzila yakuzicita eezi. Jehova uyanda kuti ‘kokomba cakutaleka.’ (1 BaTesalonika 5:17) Ulaaciyandisyo cakuswiillila zyoonse zili mukati kamoyo wako azikukatazya. (BaFilipi 4:6) Ikuti kukombaamwi ampuli yako, mpuli yako iyoobona Leza mbwali wacoonzyo kulinduwe.

Weelede kumuswiilila Leza, ikutali kukomba pe akulikke. Ulakonzya kucita eezi kwiinda mukwiiya Jwi lyakwe amabbuku aambuula atalaa zili muBbaibbele. (Intembauzyo 1:1, 2) Yeesesya atalaa nzubala. (Intembauzyo 77:11, 12) Kuswiililla Leza kubikkilizya kunjila miswaangano yabuKristo ciindi coonse.—Intembauzyo 122:1-4.

Kwambuulaa bamwi atalaa Jehova njiimwi nzila iyandikana njokonzya kusimyaayo buzolwani bwako anguwe. Ciindi nuyungizya kucita eezi, uyoolimvwa kulaafwiifwi anguwe.—Matayo 28:19, 20.

NZYOKONZYA KUCITA:

• Buzubaa buzuba, baa ciindi cakubala Bbaibbele acakukomba

• Moonse mumpuli, amubikke zintu zyabukombi mubusena bwakusaanguna kwiinda zyakulikondelezya

NZILYAAMBA BBAIBBELE: “Amuswenenene kuli-Leza, elyo alakwe ulamuswenenena.” (Jakobo 4:8) Mweelede kubaa mabambe akukomba kwanu kwampuli alimwi kamwaatobela ciindi coonse. (Matalikilo 18:19) Pesi kuli zimwi ziyandikana. Mweelede kubikkilizya Leza mubuumi bwenu bwabuzubaa buzuba. Simya buzolwani bwampuli yako aJehova kwiinda mukwaambula atalaa nguwe “ciindi cakukala mun’anda aciindi cakweenda munzila, ciindi cakoona aciindi cakubuka.” (Deuteronomo 6:6, 7) Kanza mbuuli Joshua, wakati: “Pele mebo abasin’anda bangu tulabelekela Jehova.”—Joshua 24:15.

NZYOKONZYA KUCITA:

• Ciindi coonse, baa mabambe akwiiya abikkilizya zintu ziyandwaa umwi awumwi wamumpuli yako