Buzuba abuzuba, mumawofesi aaBakamboni baJehova batambula magwalo miingi azwa kubantu bali mumajele mu-U.S. kabakumbila kugwasigwa kuti bayiye atala aLeza.

Tulazitambula zikumbilo zili boobu, akuchita mabambe aakuti bakwesu bazwa mumbungano zili aafwiifwi bakaswaye bali mumajele, muzibbadela, azimwi ndawu zitazumizigwi kusikwa-sikwa kuti bakabayiisye Bbayibbele.

Muli amwi majele, bakwesu balachitisya miswaangano yambungano mviki amviki. Muchikozyano, muli limwi jele, kwakanjila bantu bali 32 kuti baswiilile nkani yaBbayibbele yabantu boonse.

Mpindu zyakabawo zyakali kusungwaazya loko. Umwi mwaalumi wakasungidwe ku-Indiana alubo wakali wapegwa chisubulo chakukkala mujele kwabuumi bwakwe boonse akaambo kamulandu wakujeya, wakachincha zinoneezya mpawo wakazoobbabbatizigwa akuba Kamboni waJehova.

Umwi lubo mwaalumi wakali mujele pati kuCalifornia, kamboni wakali kumuyiisya Bbayibbele wakati: “Mwaalumi ooyu wachincha loko kuzwa ali nzyaakabede katanayiya kasimpe alubo ulikwiinkilila kunembo kuchincha. Kuchincha nkwaakachita kuti ayelele kubbabbatizigwa kwakali kupati loko.”

Basungwa biingi balikukatambula kasimpe kamuBbayibbele nikuba kuti balizi kuti kuchita eezi kulakonzya kubanjizya mupenzi. Muchikozyano, bamwi bakali basiya tubunga twazigwebenga bakeelede kubikkwa abalikke naakuti kulonzelwa kulaamwi majele kuchitila kuti bakwabililwe.

Bbayibbele lili aanguzu zyakuchincha buumi bwabantu zyakuti bapati bamajele balikubotelwa loko. Bamwi bapati bamajele bakapa Bakamboni baJehova masetifiketi aakulumba akaambo kamulimu wabo ooyu wakulipeda kugwasilizya bantu bali mumajele.