Bayibolu likambapu chechosi cha chakukwaskana ndi Sanda yo yisungika ku Turin. Ŵanthu anandi aŵanaŵana kuti salu iyi ndi sanda yo angukulungamu Yesu Khristu. Venivi vachitiska ŵanthu anyaki kuwona kuti sanda iyi ntchimoza mwa vinthu vakupaturika kwa Akhristu. Pasonu panu, salu iyi ye mu tchalitchi cha Katolika ku Turin mu charu cha Italy ndipu yikusungika mwakuvikilirika mu bokosi la pachanya ukongwa.

 Kumbi Bayibolu likambapu kuti Yesu wangukulungika mu Sanda yo yikusungika ku Turin? Awa.

 Wonani vinthu vitatu vakukwaskana ndi sanda yeniyi vo visuskana ndi vo Bayibolu likamba.

1.   Sanda yeniyi mu utali yendi masentimita 442 ndipu mu ufupi masentimita 113. Kweniso yendi kachigamba kamasentimita 8 ko akukasonere mu utali mwaki.

    Vo Bayibolu likamba: Thupi laku Yesu angulikulunga musalu yimoza pe cha kweni zinandi. Ndipu mutu waki anguwukulunga musalu yinyaki. Yesu wati wayuskika yumoza mwa akusambira ŵaki wanguluta ku muunda ndipu “wangusaniyamu salu.” Bayibolu likamba so kuti: “Salu yo yingukulungika kumutu kwaki yenga limoza ndi salu zinyaki cha, kweni yinguzingika ndipu yenga pamphepeti pakuyija.”—Yohane 20:6, 7.

2.   Sanda yeniyi yikubikiliya ndi ndopa chifukwa angukulungamu thupi lo angulisambika cha.

    Vo Bayibolu likamba: Yesu wati wafwa, akusambira ŵaki angunozga thupi laki “mwakukoliyana ndi mudawuku wo Ayuda achitanga pakuŵika maliru.” (Yohane 19:39-42) Mudawuku wenuwu wasazgangapu kusambika thupi kweniso kupaka mafuta ngakununkhira ŵechendaliŵiki. (Mateyu 26:12; Machitidu 9:37) Mwaviyo, viwoneke limu kuti akusambira aku Yesu angulisambika thupi laki ŵechendalikulungi mu salu.

3.   Sanda yaku Turin yikudindika chithuzi cha munthu. Buku linyaki likamba kuti: “Chithuzi ichi chilongo kuti thupi lamunthu yo anguligoneka lwandi limoza la sanda kweni mu utali, kuti lwandi linyaki la mu utali mwaki achidinkhisi. Ndipu lwandi lenili angulisazgiyaku sanda yinyaki yikulu nge yeniyi kuti yikwani thupi losi.” Encyclopædia Britannica.

    Vo Bayibolu likamba: Akusambira aku Yesu angukambisana za nyifwa yaki, kusoŵa kwa thupi kweniso vo anthukazi angukamba vakukwaskana ndi ‘chiwona cha angelu wo anguŵakambiya kuti iyu ngwamoyu.’ (Luka 24:15-24) Asani sanda yaku Turin ndiyu angukulungamu nadi Yesu, akusambira ŵaki atingi akambiskanengi za sanda yo kweniso za chithuzi cho chingudindika pa salu yeniyi. Mwaviyo, Bayibolu likamba cha kuti angukambiskanapu nkhani yeniyi.

 Awa. Chinanga kuti yenga nadi sanda yo angukulungamu Yesu kweni kuyitumbika kwatingi kuŵengi kunanga mbwenu. Wonani fundu za m’Bayibolu zo zikonkhoska chifukwa cho tikambiya viyo.

1.   Vakwenere cha. Yesu wangukamba kuti: “Chiuta ndi Mzimu ndipu wo atimusopa atenere kumusopa mu mzimu ndi mu uneneska.” (Yohane 4:24) Kusopa kwauneneska kukhumbika cha kugwiriskiya ntchitu vikozgu.

2.   Vakuzomerezgeka cha. Marangu 10 ngo Chiuta wangupaska Ayisraele ngazomerezga cha kusopa ngoza. (Marangu 5:6-10) Mwakuyanana ŵaka, Bayibolu likambiya Akhristu kuti: “Jivikiliyeni ku angoza.” (1 Yohane 5:21) Ŵanthu anyaki angakamba kuti sanda iyi ndi ngoza cha kweni ntchikozgu ŵaka cha vinthu vo agomezga. Chinanga kuti veviyo chikozgu chituŵa ngoza asani munthu watichitumbika. a Mwaviyo, munthu yo wakhumba kukondwesa Chiuta watenere cha kujipereka pamwenga kutumbika chikozgu chechosi kusazgapu salu yeniyi.