Kumbi Bayibolu Likambanji pa Nkhani ya Kuweze Nduzga?

JULANI

Vo Bayibolu limuka

Chinanga kuti munthu wangawona kuti we ndi wanangwa wakuweze nduzga, kweni kuchita venivi kupambana ndi vo Bayibolu likamba. Ilu likamba kuti: “Ungakambanga cha kuti: “Vo iyu wandichitiya ndivu nani ndimuchitiyengi. Ndimuweziyengi chifukwa cha vo wachita.” (Nthanthi 24:29) Bayibolu le ndi ulongozgi wo wawovyapu ŵanthu anandi kuti aleki kuja ndi maŵanaŵanu ngakukhumba kuweze.

Mu nkhani iyi tikambiskanengi vinthu ivi

Kumbi kuŵa ndi maŵanaŵanu ngakukhumba kuweze nduzga nkhuheni wuli?

Asani munthu munyaki wakuguŵiskani pamwenga kukuchitiyani chinthu chinyaki chiheni, ntchachilendu cha kukwiya ndipuso kukhumba kuti munthu yo walangiki chifukwa cha vo wachita. Kweni kuja ndi maŵanaŵanu ngakukhumba kuweze kupambana ndi vo Bayibolu likamba. Ntchifukwa wuli tikamba viyo?

Chiuta wakondwa cha asani ŵanthu akhumba kuti aweze ŵija. Kuziya mu Bayibolu, Yehova a Chiuta wakamba kuti: “Kuweze nduzga nkhwangu, ndazamuweze ndini.” (Aroma 12:19) Bayibolu lichiska weyosi yo wachitirika vinthu viheni kuti wakhumbika kuyesesa kukambiskana mwachimangu ndi munthu yo wamunangiya mumalu mwakukhumba kuweze. (Aroma 12:18) Kweni kumbi munthu wangachita wuli asani palivi nthowa yinyaki yo yingawovya kumalisa suzgu yo mwachimangu pamwenga wakuyesapu kali kuchita viyo kweni vitovya cha? Malemba ngatitichiska kuti tithembengi Yehova kuti ndiyu wazamutuzgapu vinthu vosi vambula urunji.—Salimo 42:10, 11.

Kumbi Chiuta wachitiska kuti ŵanthu alangiki?

Pa nyengu yinu yasonu, Chiuta wazomereza kuti maboma nga ŵanthu ngo ngalamuliya ndingu ngalangengi wo achita vinthu viheni. (Aroma 13:1-4) Kweni panyengu yaki yakwenere, wazamuwoneseska kuti munthu weyosi wachitirika vinthu vaurunji ndipu wazamutuzgapu masuzgu ngosi kwamuyaya.—Yesaya 11:4.

Ndingachita wuli kuti ndileki kuja ndi maŵanaŵanu ngakukhumba kuweze?

Muŵanaŵaniyengepu dankha mwechendachiti chechosi. (Nthanthi 17:27) Ŵanthu wo achita vinthu akwiya, kanandi achita vinthu vo pakumaliya paki atazidandaula navu. Kweni wo aŵanaŵaniyapu dankha nyengu zosi achita vinthu mwazeru.—Nthanthi 29:11.
Muvwisengi nkhani yosi. (Nthanthi 18:13) Munthu yo wachitirika vinthu viheni wangachita umampha kujifumba kuti: ‘Kumbi pe vinthu vinyaki vo ini ndileka kuziŵa vo vinguchitiska kuti munthu uyu wachiti ivi? Kumbi wasuzgika maŵanaŵanu? Pamwenga wachita ivi kwambula kuziŵa?’ Nyengu zinyaki tingaŵanaŵana kuti vo munyidu wachita pamwenga kukamba vadala mphenipo ndi dala cha.

Fundu zaboza zo ŵanthu aŵanaŵana zakukwaskana ndi kuweze nduzga

Fundu yaboza: Bayibolu lizomereza kuweze nduzga chifukwa likamba kuti “jisu kulipa jisu.”—Levitiko 24:20.

Fundu yauneneska: Dangu lakuti “jisu kulipa jisu” lo linguperekeka kwa Ayisirayeli lazomerezanga ŵanthu kuti aweziyengi ŵija cha. Mumalu mwaki, lawovyanga akweruzga kuti aperekengi chilangu chakwenere ku munthu yo wananga. b—Dotoronome 19:15-21.

Fundu yaboza: Pakuti Bayibolu lizomereza cha kuweze nduzga, ndikuti tingajivikiliya cha taŵeni asani ŵanthu atiyukiya.

Fundu yauneneska: Asani ŵanthu amuyukiya, munthu we ndi wanangwa wakujivikiliya pamwenga kupempha chovyu ku boma. Kweni Bayibolu lititikaniza kuchita vinthu vachiwawa kweniso vankhaza.—Nthanthi 17:14.

a Bayibolu likamba kuti zina laku Chiuta ndi Yehova.

b Kuti muziŵi vinandi vakukwaskana ndi dangu ili, ŵerengani nkhani ya mutu wakuti “Kumbi Mazu Ngakuti ‘Jisu Kulipa Jisu’ Ngang’anamuwanji?”