Kumbi Chiuta Wasanirika Peposi?
Vo Bayibolu limuka
Chiuta wawona chechosi ndipuso wachita vinthu peposi po wasankha. (Nthanthi 15:3; Aheberi 4:13) Kweni Bayibolu likambapu cha kuti Chiuta wasanirika peposi pamwenga mu chinthu chechosi. Mumalu mwaki, lilongo kuti iyu ndi munthu ndipu we ndi malu ngo waja.
Mo Chiuta waliri: Chiuta ndi mzimu. (Yohane 4:24) Ŵanthu angamuwona cha. (Yohane 1:18) Viwona vakukwaskana ndi Chiuta vo ŵanthu wo azumbulika m’Bayibolu anguwona, vilongo kuti iyu we ndi malu chayingu ngo waja. Vilongo cha kuti Iyu waja peposi.—Yesaya 6:1, 2; Chivumbuzi 4:2, 3, 8.
Malu ngo Chiuta waja: Chiuta waja ko kuja vakulengeka vauzimu ndipu kwenuku kupambana ukongwa ndi malu ngo ŵanthu aja. Kumalu ngo kuja vakulengeka vauzimu, ndiku Chiuta we ndi “malu ngaki ngakuja, kuchanya.” (1 Ŵakaronga 8:30) Bayibolu likamba kuti nyengu yinyaki vakulengeka vauzimu “vinguluta kuchiwoneke pamasu paku Yehova.” a Ivi vilongo kuti Chiuta we ndi malu ngaki chayingu ngo waja.—Jobu 1:6.
Asani Chiuta wasanirika peposi cha, kumbi wangandiphwere nadi ini?
Hinya. Chiuta waphwere ukongwa munthu weyosi. Chinanga kuti waja kuchanya ko kuja vakulengeka vauzimu, Chiuta wawona ŵanthu wo akhumba nadi kumukondwesa ndipu watiŵawovya. (1 Ŵakaronga 8:39; 2 Mikoka 16:9) Wonani mo Yehova walongore kuti waŵanaŵaniya ŵanthu ŵaki wo atimusopa ndi mtima wosi:
Asani mupemphera: Yehova wangavwa vo mukamba nyengu yeniyo mupemphera.—2 Mikoka 18:31.
Asani mwasuzgika maŵanaŵanu: “Yehova wepafupi ndi akusweka mtima. Iyu wataska wo asuzgika mumtima.”—Sumu 34:18.
Asani mukhumba ulongozgi: Yehova “wazakukupaskani zeru ndi kukulongozgani” kuziya mu Mazu ngaki, Bayibolu.—Sumu 32:8.
Fundu zaboza zo ŵanthu akamba zakukwaskana ndi ko Chiuta wasanirika
Fundu yaboza: Chiuta wasanirika peposi muchilengedu.
Fundu yauneneska: Chiuta waja pacharu chapasi cha pamwenga mu chinthu chechosi cho wakulenga. (1 Ŵakaronga 8:27) Mbuneneska kuti nyenyezi ndipuso vinthu vinyaki vo wakulenga “vipharazga unkhankhu waku Chiuta.” (Sumu 19:1) Kweni Chiuta waja mu vinthu vo wakulenga cha nge mo wachitiya munthu yo wapenta vinthu. Chinanga kuti ve viyo, chinthu cho munthu wapenta chingatiwovya kuziŵa vinthu vinyaki vakukwaskana ndi munthu yo wakuchipenta. Mwakuyana waka, vinthu vo tiwona muchilengedu vititiwovya kuziŵa “mijalidu yaki yambula kuwoneka,” nge nthazi, zeru ndi chanju.—Aroma 1:20.
Fundu yaboza: Chiuta watenere kusanirika peposi pamwenga mu chinthu chechosi kuti waziŵengi vinthu vosi kweniso kuti waje wanthazi ukongwa.
Fundu ya uneneska: Mzimu wakupaturika ndi nthazi yo Chiuta wagwiriskiya ntchitu. Iyu wagwiriskiya ntchitu mzimu wakupaturika wenuwu kuti waziŵi vinthu pamwenga kuchita chechosi cho wakhumba. Wangachita ivi kwekosi ndipuso pa nyengu yeyosi kwambula iyu kusanirikaku.—Sumu 139:7.
Fundu yaboza: Lemba la Sumu 139:8 lilongo kuti Chiuta wasanirika peposi chifukwa likamba kuti: “Asani ndingaluta kuchanya, yimwi mwazamukuŵa kweniko. Ndipu asani ndingayala bedi langu ku Masanu, wonani! namwi mwazamukuŵa kweniko.”
Fundu ya uneneska: Lemba ili likamba malu ngo Chiuta wasanirika cha. Kweni ndi ndakatulu, ndipu ling’anamuwa kuti palivi malu ngo isi tingaŵa ko Chiuta wangatondeka kutiwovya.
a Bayibolu likamba kuti zina laku Chiuta ndi Yehova.
Mungayanja Kuŵerenga so Nkhani Izi
FUNDU ZAKUKHUMBIKA UKONGWA ZO BAYIBOLU LISAMBIZA
Kumbi Chiuta Waliku Nadi?
Wonani ukaboni wo usimikiziya kuti mphakuvwika kugomezga kuti Chiuta waliku nadi.
MAFUMBU NGO BAYIBOLU LIMUKA
Kumbi Mzimu Wakupaturika Ntchinthu Wuli?
Pe vifukwa vakuvwika vo Bayibolu lizumbuliya kuti mzimu wakupaturika ndi “manja” ngaku Chiuta
MAFUMBU NGO BAYIBOLU LIMUKA
Kumbi Chiuta Wangamuka Pempheru Langu?
Kumbi Chiuta watitiŵanaŵaniya nadi?
KUKONKHOSKA MAVESI NGA MU BAYIBOLU
Kukonkhoska Lemba la Yesaya 41:10—“Ungawopanga Cha, Pakuti Nde Nawi”
Yehova wanguwereza fundu yimoza mu nthowa zakupambanapambana kuti waŵasimikiziyi kuti waŵawovyengi.
VAKUKWASKANA NDI ISI
Pemphani Kuti Musambirengi Bayibolu
Kambiskanani fumbu la mu Bayibolu pamwenga ziŵani vinandi vakukwaskana ndi Akaboni aku Yehova.