Bayibolu likamba kuti: “Amoyu aziŵa kuti afwengi, kweni akufwa aziŵa chechosi cha.” (Wakutawula 9:5; Salimo 146:4) Asani munthu wafwa, ndikuti kulivi. Munthu yo wafwa wangaŵanaŵana cha, wangachita chechosi cha kweniso wangavwa chechosi cha.

“Wazamuwere kufuvu”

 Chiuta wangukamba vo vichitika asani munthu wafwa, pa nyengu yo wangulongoro ndi munthu wakwamba Adamu. Chifukwa chakuti Adamu wanguvwiya cha, Chiuta wangumukambiya kuti: “Ndiwi fuvu, wazamuwere kufuvu.” (Genezesi 3:19) Chiuta wechendalengi Adamu “kutuliya kufuvu,” Adamu kwengavi. (Genezesi 2:7) Mwakuyanana ŵaka, Adamu wati wafwa, wanguwere kufuvu ndipu iyu kwengavi.

 Venivi ndivu vichitikiya munthu weyosi yo wafwa. Bayibolu likamba vakukwaskana ndi ŵanthu kweniso nyama kuti: “Vosi vituliya kufuvu, ndipu vosi viwere kufuvu.”—Wakutawula 3:19, 20.

Nyifwa nkhumala kwa vinthu vosi cha

 Kanandi Bayibolu liyeruzgiya nyifwa ndi tulu. (Salimo 13:3; Yohane 11:11-14; Machitidu 7:60) Munthu yo wagona tulu takufwa natu, waziŵa cha chechosi cho chichitika. Mwakuyanana ŵaka, ŵanthu akufwa aziŵa chechosi cha. Kweni Bayibolu lisambiza kuti Chiuta wangayuska ŵanthu wo ŵafwa nge kuti ayuka mu tulu ndipu wangaŵapaska so umoyu. (Yobu 14:13-15) Ku ŵanthu wo Chiuta wazakuŵayuska, nyifwa nkhumala kwa vinthu vosi cha.