MAY 6, 2024
RUSSIA

“Yehova Ngwakunozgeka Kutiwovya Kuti Tikunthiyepu Suzgu Yeyosi”

JULANI

Pambula kuswera yapa, Khoti la Muchigaŵa cha lo Khorolskiy Muchigaŵa cha Primorye liperekengi cheruzgu pa mulandu wa Mubalir Boris Andreyev, Mubali Anatoliy Li ndi Mzichi Nataliya Sharapova. Loya waboma wechendakambi cheruzgu wakhumba kuti ŵanthu yaŵa apaskiki.

Vakukwaskana ndi Ŵanthu Yaŵa

Boris Andreyev

Chaka cho Wakuwiya: 1951 (Ku Monastyrishche, Muchigaŵa cha Primorye)

Mbiri Yaki: Wagwiranga ntchitu ndi ŵanthu wo atovya asani pachitika vinthu vamabuchibuchi

Chifukwa chakuti Akaboni angugwiriskiya ntchitu Bayibolu pakumuka mafumbu ngaki wangukondwa ukongwa chifukwa wangusaniya uneneska. Wakubatizika kuja Kaboni waku Yehova mu 2004

Wakutolana ndi Aleksandra mu 2020

Vo Muwolu Waku Boris Aleksandra a Wangumuka Wati Wafumbika

Kumbi mulumu winu wakuwovyani wuli kuti munkhunthiyepu nyengu yakusuzga yeniyi?

Ndikumbuka zuŵa linyaki lo lenga lakusuzga ukongwa Boris ŵati amumanga. Ndingutimbanyizgika ukongwa ndipu ndinguliya. Ndingumulembe kalata Boris kumukonkhoske vo vinguchitika kweniso mo ndinguvwiya. Iyu wangundipembuzga kweniso wangundikambiya kuti wavwisa mo ndivwiya. Kweni chakukhumbika ukongwa ntchakuti, wangundikumbusa masuzgu ngosi ngo tingukumana nangu kuvuli kweniso mo Yehova wangutiwovye kuti timalani nangu. Venivi ndivu ndakhumbikiyanga nadi ndipu vingundiwovya ukongwa kuziŵa kuti Yehova wazakutijowopu cha.

Anatoliy Li

Chaka cho Wakuwiya: 1985 (Uzbekistan)

Mbiri Yaki: Wangwenda mumatchalitchi nganandi kweni wangumukika cha mafumbu ngo wenga nangu. Wangwamba kusambira Bayibolu ndi Akaboni aku Yehova ndipu wangukondwa kuziŵa uneneska wa mu Bayibolu. Wangubatizika mu 2010

Wakutolana ndi Raisa mu 2011

Vo Muwolu Waku Anatoliy Raisa b Wangumuka Wati Wafumbika

Kumbi Yehova wakuwovyani wuli limoza ndi mulumu winu?

Pechendajumbi nyengu yitali, wati waŵikika mujeri kulindiziya mulandu waki Anatoliy wangundikambiya kuti watindifipiya ukongwa mtima chifukwa nde ndija. Wechendamangiki, zuŵa lelosi taŵerenganga Bayibolu kweniso tapempheriyanga limoza. Kweni wanguleka kufipa mtima wati waziŵa kuti abali atindiwovya kweniso atindipaska vo ndikhumbikiya. Tosi tajiwone tija kuti Yehova watitiphwere nadi ndipu wazakutijowopu cha.

Nataliya Sharapova

Chaka cho Wakuwiya: 1972 (Kazakhstan)

Chaka cho Wakuwiya: Wangukumana ndi Akaboni 1995 ndipu wanguzomera kusambira Bayibolu. Iyu wanguziŵa kuti Bayibolu ndi Mazu ngaku Chiuta. Wangubatizika mu 2012

Vo Anyina aku Nataliya a Nina c Angumuka Ŵati Afumbika

Kumbi ntchinthu wuli cho chitimuwovya Nataliya kulutirizga kuja ndi maŵanaŵanu ngakwenere po we mujeri kulindiziya mulandu waki?

Mwana wangu munthukazi wangukumana ndi masuzgu nganandi po wenga mujeri kulindiziya mulandu waki. Mujeri mufunda ukongwa. Iyu wasuzgikanga so ndi mutu kanandi. Nyengu zinyaki asani wayamba kugongowa, iyu wagomezganga kuti Yehova ngwakunozgeka kumuwovya kuti wakunthiyepu suzgu yeyosi. Iyu wangukamba kuti: “Ndiziŵa kuti ndijengi kunu kwa umoyu wangu wosi cha. Yehova watindiwovya kuti ndije wakuzika ndipu ndewakunozgeka kulindiza.” Masuzgu ngo Nataliya wakumana nangu ngamuwovya kuti waje pa ubwezi wakukho ndi Yehova. Iyu watijivwa nge kuti Yehova watimuko mumanja ngaki.

Nge mo Yehova wangumukiya mapempheru ngaku Anatoliy, Boris ndi Nataliya, nasi tigomezga kuti iyu walutirizgengi kumuka mapempheru ngidu asani takumana ndi masuzgu ndipu watipasengi nthazi kuti tifiski kukunthiyapu.—Masalimo 20:1.

Nyengu Kweniso vo Vinguchitika

Pa 28 July 2022

Angumujuliya mulandu
Pa 6 ctober 2022

Nyumba 12 zingufufuzika muchigaŵa cha Yaroslavsky. Boris ndi Nataliya anguŵaŵika mujeri kulindiziya mulandu wawu
Pa 7 October 2022

Boris ndi Nataliya angumusamisiya mujeri linyaki wachilindizga mulandu waki
Pa 12 October 2022

Anatoliy wanguŵikika mujeri kulindiziya mulandu waki
Pa 13 October 2022

Anatoliy angumusamusiya mujeri linyaki wachilindizga mulandu waki
Pa 5 ctober 2023

Atamba kumumba mulandu

a b c Pa nyengu yo anozganga nkhani iyi, Mubali Andreyev, Mubali Li ndi Mzichi Sharapova wosi ŵenga kuti aŵikika kali mujeli kulindiziya mulandu wawu ndipu penga pakusuzga kuti akonkhoski ŵija vo atingi amukengi.

NKHANI