Kamoza pa chaka, Akaboni aku Yehova limoza ndi ŵanthu mamiliyoni nganandi wo aŵadana, awungana pacharu chosi chapasi kuti achiti Chikumbusu cha nyifwa yaku Yesu. Yiwu achita venivi mwakukoliyana ndi mo Yesu wangulamuliya. (Luka 22:19) Mwambu wenuwu utitiwovya kuvwisa kukhumbika kwa vo Yesu wanguchita pa nyengu yo wangupereka umoyu waki kuti wawombo ŵanthu. Mwambu wenuwu ulongo so mo sembi yeniyi yititiwovye sonu kweniso mo yazakutiwovye kunthazi.—Yohane 3:16.

 Kwali mwamusanirikapu pa mwambu wenuwu chaka chinu pamwenga cha, kumbi mungayanduwa wuli ndi nyifwa yaku Yesu? Yesu wangusambiza kuti tikhumbika kuchita vinthu viŵi vakukhumbika ukongwa ivi:

1.  1. Kusambira vakukwaskana ndi Chiuta kweniso Yesu. Yesu wangupemphera kwa Awisi a kuchanya ndipu wangukamba kuti: “Azamusaniya umoyu wamuyaya asani aziŵa yimwi Chiuta yija wauneneska, ndi Yesu Khristu yo mungumutuma.”—Yohane 17:3.

2.  2. Kugwiriskiya ntchitu vo musambira. Yesu wangudidimizga kuti tikhumbika kugwiriskiya ntchitu vo wasambizanga pa umoyu widu. Mwakuyeruzgiyapu, wangumaliza Upharazgi wa pa Phiri mwa kuwonga munthu weyosi yo ‘watuvwa mazu ngaki ndi kuchita vo wakamba.’ (Luka 6:46-48) Ndipuso nyengu yinyaki wangukamba kuti: “Asani muziŵa vinthu venivi ndi kuvichita, mujengi akukondwa.”—Yohane 13:17.

 Kumbi mungayanja kusambira vinandi vakukwaskana ndi Chiuta kweniso Yesu? Kumbi mukhumba ulongozgi wo ungakuwovyani kuti mugwiriskiyengi ntchitu vo musambira? Mungasaniya ulongozgi wenuwu mu nthowa izi:

 Kusambira Bayibolu mwakuchita kukambiskana kwawovya ŵanthu anandi kuti aliziŵi umampha Bayibolu ndi kugwiriskiya ntchitu fundu zaki pa umoyu wawu.

•   Lutani pa peji lakuti Munthu Munyaki Wangakuwovyani Kusambira Bayibolu, kuti muziŵi mo mungachitiya venivi.

•   Woneriyani vidiyo ya mutu wakuti Vakukondwesa Kuti Mwayambapu Kusambira Bayibolu, kuti muwoni mo Akaboni aku Yehova asambiziya ŵanthu Bayibolu.

 Akaboni aku Yehova awungana kaŵi sabata yeyosi ko asope, ndipu malu ngenanga atingadana kuti Nyumba ya Ufumu. Pa maunganu ngenanga, tisambira Bayibolu kweniso mo tingagwiriskiya ntchitu fundu zaki pa umoyu widu.

 Munthu weyosi ngwakulondereka; ndipu mukhumbika kuja Kaboni waku Yehova pe cha kuti musanirikepu. Mwakukoliyana ndi mo vinthu vilili ku malu ko muja, mungasankha kuchiwungana nawu pamasu ndi pamasu pamwenga kuziya pa vidiyokoniferensi.

•   Woneriyani vidiyo ya mutu wakuti, Kumbi ndi Vinthu Wuli vo Vichitika pa Nyumba ya Ufumu? kuti muziŵi vo vichitika pa maunganu ngenanga.

•   Fufuzani malu ngakufupi ndi ko muja, kuti musaniyi ko mungachiwungana papeji lakuti, Maunganu nga Mpingu nga Akaboni aku Yehova.

 Nkhani kweniso mavidiyo nganandi ngo nge pa webusayiti yidu yeniyi, ngangakuwovyani kuti muziŵi vinandi vakukwaskana ndi vo Yesu wasambizanga kweniso kuzirwa kwa sembi yaki.

 Mwakuyeruzgiyapu, kuti muziŵi kuti vingachitika wuli kuti ŵanthu mamiliyoni nganandi ayanduwi ndi nyifwa ya munthu yumoza ŵerengani nkhani yakuti, “Kumbi Yesu Wataska Wuli Ŵanthu?” kweniso “Ntchifukwa Wuli Yesu Wangusuzika Ndipuso Kufwa?” pamwenga woneriyani vidiyo yakuti, Kumbi Ntchifukwa Wuli Yesu Wangufwa?