Kumbi Fundu za mu Bayibolu pa Nkhani ya Chamampha ndi Chiheni Zeche Kugwira Ntchitu?
Ŵanthu anandi kusazgiyapu wo atijidana kuti mbakhristu, awona kuti fundu za mu Bayibolu zakukwaskana ndi kugonana ndipuso nthengwa zikuleka kugwira ntchitu. Matchalichi nganyaki asintha vo asambiza pa nkhani ya cho ntchamampha pamwenga chiheni kuti akoliyani ndi mo vinthu viliri mazuŵa nganu. Kumbi fundu za mu Bayibolu pa nkhani ya chamampha ndi chiheni zeche kugwira mbwenu ntchitu mazuŵa nganu? Hinya. Wonani chifukwa cho tikambiya viyo.
Ŵanthu akhumbika fundu zaku Chiuta pa nkhani ya chamampha ndi chiheni
Taŵanthu tikulengeka kuti tilongozgekengi ndi Mlengi widu. Bayibolu likamba kuti: “Munthu yo watenda walivi nthazi zakunyoloske maphazi ngaki.” (Yeremiya 10:23) Chinanga kuti Yehova * Chiuta wakutilenga kuti tipangengi tija vakusankha, kweni wakutipaska cha mazaza pamwenga nthazi zakuti tijisankhiyengi tija cho ntchamampha ndi chiheni. Mwaviyo, wakhumba kuti tithembengi iyu.—Nthanthi 3:5.
Fundu za mijalidu yamampha zaku Chiuta zisanirika mu Bayibolu. Tiyeni tikambiskani vifukwa viŵi vo tikhumbikiya fundu zenizi.
Chiuta ndiyu wakutilenga. (Salimo 100:3) Nge Mlengi widu, Yehova Chiuta waziŵa vinthu chayivu vo tikhumbika kuti tije akukho mwauzimu kweniso mwakuliŵavu. Iyu waziŵa so vo vingatichitikiya asani tikana kulongozgeka ndi fundu zaki. (Agalatiya 6:7) Kusazgiyapu yapa, Yehova wakhumba kuti tikondwengi ndi umoyu. Ndichu chifukwa chaki Bayibolu likamba kuti iyu ndi Chiuta “Yo watikusambiza kuti vinthu vikuyende umampha, Yo watikulongozga munthowa yo utenere kwendamu.”—Yesaya 48:17.
Maŵanaŵanu ngidu ngangatilandizga. Ŵanthu anandi awona kuti angasankha ŵija cho ntchamampha pamwenga chiheni asani angalondo waka vo mtima wawu waŵakambiya. Kweni Bayibolu likamba kuti “mtima ngwakunyenga ukongwa kuluska chinthu chechosi ndipuso ngwakofya.” (Yeremiya 17:9) Mwaviyo, asani mtima widu ulongozgeka ndi zeru zaku Chiuta cha, ungatichitiska kuti tichiti vinthu vo pakumaliya paki tingadandawula navu.—Nthanthi 28:26; Wakutawula 10:2.
Kumbi alongozgi avisopa akhumbika kususka vo Bayibolu likamba pa nkhani ya chamampha ndi chiheni?
Awa! Mu Bayibolu mwe uneneska wakukwaskana ndi Chiuta kweniso mijalidu yo wakhumba kuti isi tiŵi nayu. (1 Akorinto 6:9-11; Agalatiya 5:19-23) Iyu wakhumba kuti ŵanthu aziŵi uneneska. (1 Timote 2:3, 4) Mwaviyo, alongozgi a matchalichi ngachikhristu akhumbika kusambiza ŵanthu vo Mazu ngaku Chiuta ngakamba.—Tito 1:7-9.
Ŵanthu anandi wo akhumba cha kuvwiya fundu za mijalidu yamampha zo Bayibolu lisambiza, aluta kwa alongozgi avisopa kuti ndiwu ‘akaŵakambiyengi vo akhumba kuvwa.’ (2 Timote 4:3, mazu ngamumphata) Kweni Mazu ngaku Chiuta ngatititcheŵeska kuti: “Soka ŵanthu wo akamba kuti chamampha ntchiheni ndipu chiheni ntchamampha.” (Yesaya 5:20) Mwaviyo, Chiuta wazakuŵamba mulandu alongozgi avisopa wo atiŵasambiza uneneska cha ŵanthu wakukwaskana ndi vo Chiuta wakamba kuti viheni pamwenga vamampha.
Kumbi fundu za mijalidu yamampha za mu Bayibolu zichiska ŵanthu kuja ndi sankhu?
Awa. Ŵanthu wo akhumba kukondwesa Chiuta alondo chakuwoniyapu chaku Yesu Khristu kweniso vo wasambizanga. Iyu wangusambiza wo atimulondo kuti angayeruzganga anyawu cha mumalu mwaki ayanjengi kweniso kutumbika ŵanthu wosi.—Mateyu 5:43, 44; 7:1.
Yesu wangusambiza akusambira ŵaki kuti agwiriskiyengi ntchitu fundu za mijalidu yamampha zaku Chiuta pa umoyu wawu. Kweni wanguŵakambiya so limu kuti ndi wosi cha wo azomerengi kugwiriskiya ntchitu fundu zaku Chiuta pa umoyu wawu. (Mateyu 10:14) Yesu wakuŵazomerezapu cha akusambira ŵaki kuti achitengi ndali pamwenga kuchichizga ŵanthu kuti avwiyengi Chiuta.—Yohane 17:14, 16; 18:36.
Umampha wakugwiriskiya ntchitu fundu za mu Bayibolu?
Ŵanthu wosi wo alondo fundu zaku Chiuta pa nkhani ya chamampha ndi chiheni akondwa ndi vitumbiku vinandi sonu kweniso azamukondwa ukongwa kunthazi. (Salimo 19:8, 11) Vitumbiku venivi visazgapu:
^ Yehova ndilu zina laku Chiuta nge mo Bayibolu likambiya.—Salimo 83:18.
Mungayanja Kuŵerenga so Nkhani Izi
JANI MASU!
Kukhumbika Kwa Kuja Ndi Mijalidu Yamampha
Kusambiza ŵana kuti ajengi ndi mijalidu yamampha, kungaŵawovya kuti vinthu viziŵayendiyengi umampha kunthazi.
ESSENTIAL BIBLE TEACHINGS
Kumbi Ndiyani yo Wakulemba Bayibolu?
Asani likulembeka ndi ŵanthu, kumbi lingakambika kuti mazu ngaku Chiuta? Kumbi Bayibolu le ndi maŵanaŵanu ngakuyani?
