Mabisiketi nga Tagalu Tangu
NICK yo waja ku Oregon, U.S.A., wangulemba kuti: “Kukwamba kwa chaka cha 2014, ndingwamba kwenda ndi tagalu tangu tiŵi timanatimana asani ndiluta kuchiyenda mutawuni. Kanandi Akaboni asanirikanga mukati mwa tawuni ndipu amanga pafupi ndi timashelufu tawu ta mabuku. Yiwu avwalanga umampha, atawuzganga kweniso kumwemwete weyosi yo wajumphanga.
“Akaboni achitiyanga vamampha ŵanthu pe cha, kweni ndi tagalu tangu viyo. Zuŵa linyaki Elaine yo wanguma pafupi ndi kashelufu kaki, wangutipaska mabisiketi tagalu tangu. Kutuliya penapa, asani te pafupi kufika pa kashelufu, tagalu tangu takhumbanga kuluta kwa Akaboni kuti akatipaski mabisiketi.
“Myezi yinandiku yingujumphapu. Tagalu tangu takondwanga kurya mabisiketi nga Akaboni ndipu ini ndakondwanga kukambiskana nawu mwakudumuwa. Kweni ndakhumbanga cha kukambiskana nawu vinandi. Ndenga ndi vyaka vakujumpha 70, ndipu ndaziŵanga umampha cha vo Akaboni agomezganga. Chifukwa chakuti ndinguguŵa ndi matchalitchi nganandi, ndinguŵanaŵana kuti mbumampha kuti ndisambirengi waka Bayibolu pakundija.
“Pa nyengu yeniyi, ndawonanga Akaboni mumalu ngakupambanapambana nga tawuni, ama pafupi ndi timashelufu tawu. Nawu so nyengu zosi ŵenga amasangu. Nyengu zosi amukanga mafumbu ngangu kutuliya mu Bayibolu ndipu venivi vinguchitiska kuti ndiyambi kuŵagomezga ukongwa.
“Zuŵa linyaki Elaine wangundifumba kuti: ‘Kumbi mugomezga kuti vinyama ndi mphasu yakutuliya kwaku Chiuta?’ Ini ndingumuka kuti, ‘Hinya, ndigomezga!’ Pavuli paki, Elaine wanguŵerenga nani Yesaya 11:6-9. Kwambiya penapa, ndakhumba kusambira Bayibolu, kweni ndakhumbanga mbwenu cha kuto buku lelosi la Akaboni kuti nkhaŵerengi.
“Mu mazuŵa ngakulondopu, ndingukondwa kukambiskana mwakudumuwa fundu zakovya ndi Elaine kweniso mulumu waki Brent. Yiwu angundikambiya kuti nkhaŵerengi Mateyu mpaka Machitidu kuti ndivwisi vo kuja Mkhristu wauneneska kung’anamuwa. Ndivu ndinguchita nadi. Pati pajumpha nyengu yimanavi, ndinguzomera kusambira Bayibolu ndi Brent kweniso Elaine. Umu mwenga mu chihanya mu chaka cha 2016.
“Ndakhumbisiskanga kusambira Bayibolu sabata yeyosi kweniso kuluta ku maunganu ku Nyumba ya Ufumu. Ndakondwanga ukongwa kusambira uneneska chayiwu wo Bayibolu likamba. Pati pajumpha chaka, ndingubatizika kuja Kaboni. Sonu nde ndi vyaka 79, ndipu ndikondwa ukongwa kuti ndi kusaniya chisopa cha uneneska. Yehova wanditumbika chifukwa wandizomereza kuja mubanja laki la pacharu chosi.”
Mungayanja Kuŵerenga so Nkhani Izi
MAFUMBU NGO ŴANTHU AFUMBA KAŴIKAŴI
Kumbi Sambiru la Bayibolu lo Akaboni aku Yehova Achitiska Ntchinthu Wuli?
Kuziya mu pulogilamu yawezi ya kusambira Bayibolu ndi Akaboni aku Yehova, mungagwiriskiya ntchitu Bayibolu lelosi. Mungadaniyaku banja linu losi pamwenga mabwezi nginu pa sambiru.
