Uthenga wamampha utuliya kwaku Yehova, Chiuta walikondwa, yo wakhumba kuti mabanja ngakondwengi. (1 Timote 1:11) Iyu ndiyu wakwambisa nthengwa. Kutorana mwakulondo marangu kutovya kuti banja lije malu ngakwenere kuleriyamu ŵana. Akhristu atenere kulondo marangu ngakwawu pa nkhani yakulembesa nthengwa.​—Ŵerengani Luka 2:1, 4, 5.

Kumbi Chiuta watiyiwona wuli nthengwa? Iyu wakhumba kuti munthulumi ndi munthukazi wo atorana angalekananga cha kwa umoyu wawu wosi. Yehova wakhumba kuti ŵanthu akutorana agomezgekengi ku munyawu yo akutorana nayu. (Aheberi 13:4) Iyu watinkha ukongwa kuti ŵanthu amalisengi nthengwa zawu. (Malaki 2:16) Kweni iyu wazomereza kuti Mkhristu wangamalisa nthengwa ndipu wangato pamwenga kuyirwa so asani yo wakutorana nayu wachita ureŵi.​—Ŵerengani Mateyu 19:3-6, 9.

Yehova wakulenga anthulumi ndi anthukazi kuti awovyanengi mu nthengwa. (Genezesi 2:18) Munthulumi yo ndi mutu wa banja, watenere kuja panthazi pa nkhani yakuphwere banja laki mwakuliŵavu ndipuso mwauzimu. Watenere kwanja muwolu waki ndi mtima wosi. Munthulumi ndi munthukazi atenere kwanjana ndi kutumbikana. Chifukwa chakuti wosi mbambula kufikapu, munthulumi ndi munthukazi akhumbika kusambira kugowokiyana. Venivi ndivu vingawovya ukongwa kuti akondwengi mu banja.​—Ŵerengani Aefeso 4:31, 32; 5:22-25, 33; 1 Peturo 3:7.

Asani mukumana ndi masuzgu mu nthengwa yinu, mosi mwaŵaŵi mutenere kuyesesa kuti muchitiranengi vinthu  mwachanju. (1 Akorinto 13:4, 5) Mazu ngaku Chiuta ngazomerezapu cha kuti ŵanthu apatukanengi nge nthowa yakumalisiya masuzgu mu nthengwa.​—Ŵerengani 1 Akorinto 7:10-13.

Yehova wakhumba kuti mwaŵana mukondwengi. Iyu watikupaskani ulongozgi wamampha ukongwa wo ungakuwovyani kuti mukondwengi. Wakhumba kuti musambiri zeru kwa apapi ŵinu kweniso musambirepu kanthu pa vo akumanapu navu pa umoyu wawu. (Akolose 3:20) Yehova yo ndi Mulengi winu wakhumba so kuti mukondwengi pakuchita vinthu vo iyu ndi Mwana waki akhumba.​—Ŵerengani Wakutawula 11:9–12:1; Mateyu 19:13-15; 21:15, 16.

Mutenere kugwira ntchitu mwaphamphu kuti musaniriyi ŵana ŵinu chakurya, pakuja ndi vakuvwala. (1 Timote 5:8) Kweni kuti ŵana ŵinu akondwengi, mutenere so kuŵasambiza kuti ayanjengi Chiuta ndipuso asambirengi vakukwaskana ndi iyu. (Aefeso 6:4) Asani ŵana ŵinu awona kuti yimwi mutanja Chiuta, kuŵengi kwambula kusuzga kuti nawu amuyanjengi. Asani mugwiriskiya ntchitu Mazu ngaku Chiuta pakuŵasambiza, ŵana ŵinu asuzgikengi cha kukuvwiyani.​—Ŵerengani Dotoronome 6:4-7; Nthanthi 22:6.

Vija umampha ukongwa asani mutiŵachiska ŵana ŵinu ndi kuŵawonga pa vamampha vo achita. Asani anangisa akhumbika kuŵapasa chilangu ndipuso kuŵachenya. Venivi vingawovya ŵana kuti aleki kuja ndi mijalidu yo yingachitiska kuti alekengi kukondwa. (Nthanthi 22:15) Kweni mungaŵalanganga mwaukali cha pamwenga mwankhaza.​—Ŵerengani Akolose 3:21.

Akaboni aku Yehova ŵe ndi mabuku nganandi ngo ngakupangikiya kuti ngawovyengi apapi ndi ŵana. Fundu za mumabuku yanga zituliya mu Bayibolu.​—Ŵerengani Masalimo 19:7, 11.