Ndikuwiya kweniso kukuliya mutawuni ya Rome, ndipu tajanga kuchigaŵa cho kwajanga ŵanthu akavu. Ndajanga umoyu wakusuzgika ukongwa. Ama ŵangu akundibala ndaŵaziŵanga cha kweniso ini ndi ada takoliyananga cha. Ndichikuwa ndingwamba kusambira umoyu wauryarya.

Ndichifika vyaka 10 ndipu ndayambapu kali kuba. Ndinguthaŵa panyumba kakwamba ndati ndakwanisa vyaka 12. Ada adanikanga kananandi waka kuti azindiwombo kupolisi. Ndayambananga ndi ŵanthu kaŵikaŵi, ndenga wankhaza kweniso ndingukwiyiya charu chosi. Ndati ndakwanisa vyaka 14 ndingutuliyapu limu panyumba. Ndingwamba kumwa munkhwala wakutimbanyizga wongu kweniso kuja mumisewu. Pakuti ndengavi malu ngakugona, ndajulanga waka galimotu za ŵanthu ndi kugona mwenimo mpaka cha kumatandakucha. Pavuli paki ndapenjanga po pe mpopi kuti ndisambi kumasu ndi kujipuputa waka.

Ndenga kaswiri pa nkhani ya unkhungu. Ndasolonga vinthu muvikwama va ŵanthu kweniso ndabanga munyumba zinandi chinanga zingaŵa zakuvilirika. Ndingwamba kuziŵika kuti nde wakusuzga ndipu ŵanthu anyaki angundipempha kuti ndisere gulu lawu la vigeŵenga. Ndinguwukana cha “mwaŵi” wenuwu wakuti ndiyambi kuba mumabanki. Chifukwa chakuti ndenga mukali ukongwa, ŵanthu anandi mugulu ili angwamba kundipasa ulemu. Ndayendanga cha kwambula futi, ndipu ndiyu yajanga pilu wangu pakugona. Ndewu, munkhwala wakutimbanyizga wongu, kutuka ndipuso ureŵi ndivu venga chakurya changu. Ndatandalanga waka mumanja mwa apolisi chifukwa kumangika yenga nkhani cha kwaku ini. Kujeri kwenga waka nge kumuzi.

Nyengu yinyaki ndati ndatuzgika mujeri, ndinguŵanaŵana kuti nkhawoni ama amana. Kwambula kuziŵa, yiwu limoza ndi ŵana ŵawu ŵawi angusambira Bayibolu ndipu anguja Akaboni aku Yehova. Yiwu angundipempha kuti ndilutiyi nawu limoza ku maunganu ngawu. Ndinguzomera kuti nkhawoni waka vo vichitika. Ndati ndafika ku Nyumba ya Ufumu ndingukaniliya kuti ndijengi pampandu wakuvuli kuti ndiwonengi weyosi yo wasere ndi kutuwa. Pa nyengu iyi, futi yangu yenga mbwenu pathumba.

Unganu wenuwu ungusintha umoyu wangu. Ndikumbuka kuti pa zuŵa ili ndingujivwa nge kuti nde kucharu chinyaki limu. Ŵanthu angunditawuza mwalikondwa kweniso amwemwetiyanga. Pa zuŵa ili Akaboni angundilondere kwambula sankhu ndipu angundilongo chanju chauneneska. Venivi venga vakupambana ukongwa ndi vo ndinguziŵiriya kuwona!

Ndingwamba kusambira Bayibolu ndi Akaboni. Ndichilutirizga kusambira, ndingwamba kuwamu kuti ndikhumbika kusintha. Ndingulondo ulongozgi wa pa lemba la Nthanthi 13:20 lo likamba kuti: “Munthu yo watenda ndi ŵanthu azeru wajengi wazeru, kweni yo wachitiya limoza vinthu ndi ŵanthu akupusa wapwetekekengi.” Lemba lenili lingundiwovya ukongwa kuti ndileki kuchita vinthu ndi gulu la vigeŵenga. Venivi venga vipusu cha, kweni Yehova ndiyu wangundiwovya.

Ndingwamba so kusintha vinthu vinyaki kuti ndiyambi kuwoneka umampha. Ndingufwiyapu mpaka ndinguleka kukweŵa foja ndipuso kugwiriskiya ntchitu munkhwala wakutimbanyizga wongu. Ndingumeta sisi, ndingutaya ndeŵeleri ndipuso ndinguleka kutuka. Kutuwa pa nyengu yeniyi ndingwamba kujiko pa vinthu vinandi.

Kuŵerenga ndipuso kusambira ndaviwonanga kuti ndi ntchitu. Mwaviyo, ndakhumbikanga kujichichizga kuti ndisambirengi Bayibolu ndi kugwiriskiya ntchitu vo ndasambiranga. Kweni chifukwa chakuŵikiyapu mtima, ndingwamba kwanja Yehova, kweniso njuŵi yangu yingwamba kugwira ntchitu ndipu yandisuzganga. Kanandi ndajimbanga mlandu ndipu ndakayikanga kuti Yehova wangandigowoke nadi pa vinthu vosi viheni vo ndachitanga. Kweni ndapembuzgikanga ukongwa ndi nkhani ya Fumu Davidi yo ndinguŵerenga. Yehova wangumugowoke chinanga kuti wanguchita maubudi ngakulungakulu.—2 Samuyeli 11:1–12:13.

Kuti ndiyambi kupharazgiya ŵanthu kunyumba ndi nyumba napu penga so dori. (Mateyu 28:19, 20) Ndawopanga kuti ndamukumana ndi ŵanthu wo ndikuŵachitiyapu vinthu vankhaza! Kweni mantha ngenanga ndingumalana nangu kamanakamana. Ndingwamba kukondwa ukongwa chifukwa cha kovya anyaki kuti asambiri vakukwaskana ndi awusefwi achanju Akuchanya wo atitigowoke ndi mtima wosi.

Kusambira vakukwaskana ndi Yehova kwataska umoyu wangu! Anyangu anandi wo kali ndabiyanga nawu limoza akufwa ndipu anyaki ŵe mujeri. Kweni ini ndija umoyu wakukondwesa ndipu nde ndi chilindizga. Ndasambira kujiyuyuwa, kuvwiya ndipuso kuwuko mtima. Venivi vandiwoyva kuti ndichitengi vinthu umampha ndi ŵanthu. Sonu ndikuto ndipu ndikondwa ndi muwolu wangu wakutowa zina laki Carmen. Tosi tikondwa kusambiza ŵanthu anyaki fundu za mu Bayibolu.

O, ndinguluwa, sonu ndikuleka kuba. Chinanga kuti nyengu zinyaki ndiluta mbwenu kumabanki, kweni ndiluta kuchiba cha, kweni kuchikolopa ndi kupuputa vinthu!