Madián ndi Marcela ajanga umoyu wapachanya ku Medellín, mucharu cha Colombia. Madián wagwiranga ntchitu ya ndalama zinandi mwakuti ajanga munyumba yamampha ukongwa. Kweni pakuŵa ateŵeti aku Yehova Chiuta, chinthu chinyaki chinguŵachitiska kuti awoni so umampha vinthu vo akhumbikanga kuŵika pamalu ngakwamba. Yiwu angukamba kuti: “Mu 2006 tinguluta ku unganu wadera wa mutu wakuti, ‘Khalanibe Ndi Diso la Kumodzi.’ Nkhani zinandi zo zingukambika pa unganu uwu zingudidimiziya kukhumbika kwakuja umoyu wambula kukhumba vinandi kuti titeŵete Chiuta mwakukwana. Tati tamaliza unganu uwu tinguziŵa kuti tachitanga vakupambana ndi vo nkhani zingukamba. Tagulanga vinthu vinandi kweniso tajanga ndi ngongoli zinandi.”

 Unganu wakuchiska wenuwu wati wajumphapu, Madián ndi Marcela angwamba kuja umoyu wambula kukhumba vinandi. Yiwu angukamba kuti: “Tinguleka kugula vinthu vinandi. Tingusamiya mu nyumba yimana, tingugulisa galimotu yidu ndipu tingugula muthuthuthu.” Kusazgiyapu yapa, yiwu anguleka kuluta ku mashopu ngakulungakulu ndi chilatu chakuti aleki kuyeseka kugulanga vinthu vinyaki. Yiwu angwamba kumaliya nyengu yinandi pa kupharazgiya ŵanthu wo ajanga nawu pafupi. Ndipuso achezanga ndi anyawu wo ateŵetiyanga Yehova Chiuta mwaphamphu nge apayiniya apade. a

 Pati pajumpha nyengu yimanavi, Madián ndi Marcela angusankha kuti asazgiyeku uteŵeti wawu mwakusamiya ku mpingu unyaki wa kumuzi, wo wakhumbikanga chovyu. Kuti asami, Madián wanguleka ntchitu. Abwana ŵaki anguvwisa cha chifukwa cho wakhumbiyanga kuleke ntchitu. Mwaviyo, Madián wangufumba bwana waki kuti: “Yimwi mulonde ndalama zinandi, kweni kumbi mukondwa?” Iyu wangumuka kuti awa, chifukwa chakuti wenga ndi masuzgu nganandi ngo watondekanga kumalana nangu. Pavuli paki Madián wangukambiya bwana waki kuti: “Chakukhumbika ukongwa pa umoyu ndi ndalama zinandi zo usaniya cha. Kweni ntchinthu cho chitikuchitiska kuti ujengi ndi likondwa leneku. Kusambiza ŵanthu vakukwaskana ndi Chiuta ndiku kutovya ini ndi muwolu wangu kuti tikondwengi ndipu tikhumba kuti tikondwengi ukongwa mwakumaliya nyengu yidu yinandi pa ntchitu yeniyi.”

 Madián ndi Marcela asaniya likondwa chayilu kweniso akhorwa chifukwa chakuti kuteŵete Chiuta ndiku atikuŵika pakwamba pa umoyu wawu. Kwa vyaka 13 vo vajumpha, yiwu aja achiteŵete ko kukhumbika apharazgi anandi mumipingu ya ku kunkhondi ku Colombia. Ndipu sonu ateŵete nge apayiniya apade.