Pa nyengu ya mulili wa COVID-19, abali ndi azichi ŵidu asintha nthowa zawu zakupharazgiya anyawu uthenga wakupembuzga wa mu Bayibolu. Mumalu mwakupharazga pamalu po pasanirika ŵanthu anandi pamwenga kuluta kunyumba ndi nyumba, yiwu apharazga kuziya pa foni ndipuso kulemba makalata. a Ŵanthu anandi awonga phamphu lawu ndipu pe ukaboni wakuti Yehova waŵatumbika ukongwa. (Nthanthi 16:3, 4) Tiyeni tiwoni vo abali ndi azichi achita muchirwa chinyaki.

 Mulili wechendayambi, Helen nyengu zosi wayendiyanga munthukazi munyaki ndipu wangumupempha kuti wasambirengi nayu Bayibolu. Nyengu zosi iyu wakananga kusambira Bayibolu. Kwati kwaja zuŵa limoza kuti ŵanthu aleki kwendakwenda chifukwa cha mulili wa COVID-19 uyambi, Helen wangumupaska Bayibolu ndi buku lakuti Kumbi Tingasambiranji m’Bayibolu? Mu nyengu ya lokudawuni, Helen wangupempha so msungwana munyaki kuti wasambirengi nayu Bayibolu, ndipu wangumukambiya kuti asambirengi kuziya pa foni. Pa nyengu iyi, msungwana uyu wanguzomera kusambira Bayibolu. Iyu wangukondwa ndi vo angukambiskana ndipu wangumupempha Helen kuti asambirengi zuŵa lelosi! Munthukazi yo wangwamba kuchita maunganu nga Chikhristu nyengu zosi kuziya pafoni. Kusazgiyapu yapa, wagwiriskiya ntchitu vo wasambira mu Bayibolu kweniso kupharazgiya anyaki vo wasambira.

 Nge chigaŵa cha uteŵeti wawu, Akaboni mu mpingu unyaki angulembe apolisi a muchigaŵa chawu makalata ngakuwonga ntchitu yakuzirwa yo agwira. Apolisi anguzizwa ŵati awona makalata ngo. Mpolisi munyaki wangukambiya Jefferson, mura wa mumpingu kuti: “Ndaŵanaŵananga kuti Akaboni aku Yehova atinkhana ndi apolisi.” Jefferson wangumukonkhoske umampha kuti mbuneneska cha. Apolisi angukondwa ndi fundu zamampha zo zenga mu makalata ngo, mwakuti angungakhoma pageti lakuselere kupolisi. Mpolisi munyaki wangukamba so kuti: “Venivi viwovyengi ŵanthu anyaki kuti atiwonengi mwakwenere.”

 Edna ndi Ednalyn wosi mbapayiniya a nyengu zosi. b Chifukwa chakuti alivi intaneti munyumba mwawu, afiska cha kuchita maunganu nga mpingu kuziya pa vidiyokomferensi. So angumbiya aneba ŵawu wo Mbakaboni cha, ndikuŵapempha kuti aŵalumikiziyengi ka Wi-Fi munyumba mwawu ndipuso kuti aŵalipirengi. Mwalisungu munthukazi yo wanguzomera kuti waŵalumikiziyengi kwawezi. Edna ndi Ednalyn ŵati amudaniya kumaunganu munthukazi yo wanguza kuzichita nawu maunganu. Pasonu panu a neba ŵawu, mwana wawu ndi azuku ŵawu asambira Bayibolu ndi Akaboni ndipuso nyengu zosi asanirika pa maunganu nga Chikhristu.

 Abali ndi azichi angudaniyaku ŵanthu wo aja nawu pafupi, wo agwira nawu ntchitu ndipuso ŵanthu anyaki kuti azivwisiyi nkhani yo yingukambika kuziya pa vidiyokomferensi. Ellaine yo wagwira ntchitu kuchipatala pakwamba wagongowanga kuŵadaniyaku kumaunganu anyaki wo wagwira nawu ntchitu. Iyu waŵanaŵananga kuti panyaki madokotala nganyaki ngangakamba viheni vakukwaskana ndi Akaboni. Kweni iyu wanguŵalembe mameseji ngaubwezi madokotala nganyaki ngo wagwiranga nawu ntchitu kuchipatala. Ellaine wagongowanga kudaniyaku madokotala ngaŵi wo ndi banja, kumaunganu. Wati waŵanaŵaniya kweniso kuyipemphere nkhani yeniyi, wanguŵalembe meseji yakuŵadaniya ku maunganu. Muwolu waki wangumuka kuti: “Mukhumba kuti ndisere muchisopa chinu?” Ellaine wangumuka kuti maunganu yanga nga munthu weyosi, nga Akaboni aku Yehova pe cha. Mawa laki, Ellaine wanguzizwa wati wawona kuti banja ili ndilu linguchelera kulumikiza maunganu! Iyu wangukamba kuti: “Maunganu ngechendamali ndingulonde meseji kutuwa ku munthukazi, yakuti: ‘Yaka nkhakwamba kupanga maunganu ndi Akaboni aku Yehova. Ngenga umampha ukongwa. Ndakondwa nangu ukongwa. Ndawonga ukongwa pakundidaniyaku.’”

 Ellaine wangudaniyaku madokotala 20 kumawunganu ndipu vakukondwesa kuti madokotala 16 ngangulumikiza ku maunganu. Ellaine wangukonkhoska mazu ngo Paulo wangukamba, ngakuti: “Nde wakukondwa kuti ‘ndinguchita chiganga’ pakupharazga ‘uthenga wamampha waku Chiuta ku ŵanthu wo agwira ntchitu.”—1 Atesalonika 2:2.

 Weyosi wasuzgika ukongwa ndi mulili. Kweni abali ndi azichi ŵidu pa Chirwa chenichi kweniso kwekosi alutirizga kukondwa ndipuso kuja ndi maŵanaŵanu ngamampha mwakuchita vo angafiska pakupembuzga ndi kovya anyawu.—Machitidu 20:35.