Boza: Akaboni aku Yehova achita cha Khrisimasi chifukwa chakuti Yesu atimugomezga cha.

 Fundu Yauneneska: Te Akhristu. Tigomezga kuti tazamulonde umoyu wambula kumala kuporote mwaku Yesu Khristu.—Machitidu 4:12.

Boza: Mupatuwa mabanja nga ŵanthu chifukwa chakuŵasambiza kuti alekengi kuchita Khrisimasi.

 Fundu Yauneneska: Nkhani ya banja titiyiwona kuti njakuzirwa, ndipu tigwiriskiya nchitu Bayibolo kuti tiwovyi mabanja kuja ngakukho.

Boza: Mupambana ndi vinthu vo ŵanthu wo achita Khrisimasi asaniya nge kuja mwachimangu ndi ŵanthu, kukhumbiya charu chinu chimangu ndipuso kulonde vawanangwa.

 Fundu Yauneneska: Nyengu zosi tija umampha kweniso mwachimangu ndi ŵanthu. (Nthanthi 11:25; Ŵaroma 12:18) Mwakuyeruzgiyapu, mo tichitiya maunganu ngidu ndipuso mo tipharazgiya vikoliyana ndi ulongozgi waku Yesu wakuti: “Kwawezi mwalonde, kwawezi paskani.” (Mateyu 10:8) Tiwona so kuti Ufumu waku Chiuta pe ndiwu wazamuwovya ŵanthu kuja ndi wanangwa weneku pacharu chapasi.—Mateyu 10:7.

•   Yesu wakukambapu cha kuti tikumbukengi kuwa kwaki, kweni wangukamba kuti tikumbukengi nyifwa yaki.—Luke 22:19, 20.

•   Akusambira aku Yesu ndipuso Akhristu a m’nyengu ya akutumika, achitanga cha Khrisimasi. Buku linyaki lingukamba kuti ŵanthu angwamba kukondwere kuwa kwaku Yesu kukumaliya kwa chaka cha 243 C.E. Pa nyengu iyi ndipu akusambira wosi afwa.

•   Palivi ukaboni wo ulongo kuti Yesu wanguwa pa 25 December. Ndipu zuŵa laki lakuwiya likulembeka cha m’Bayibolo.

•   Tigomezga kuti Chiuta wazomerezga cha Khrisimasi chifukwa yingwamba ndi ŵanthu wo asopanga angoza kweniso wo achitanga ureŵi.—2 Ŵakorinte 6:17.

 Anandi alutirizga kuchita Khrisimasi chinanga kuti aziŵa kuti yikwamba ndi ŵanthu wo asopanga angoza kweniso kuti Bayibolo lizomerezga cha. Ŵanthu ŵenaŵa akhumbika kujifumba kuti: Nchifukwa wuli Akhristu akhumbika cha kuchita Khrisimasi? Nchifukwa wuli kuchita Khrisimasi ndi nkhani yikulu?

 Bayibolo lititichiska kuti tigwiriskiyengi nchitu vinjeru vidu pakuchita vinthu. (Ŵaroma 12:1, 2) Lititiwovya kuti tiwonengi uneneska kuja wakukhumbika. (Yohane 4:23, 24) Mwaviyo, asani ŵanthu akamba vakukwaskana ndi isi, tivwiya ulongozgi wa m’Bayibolo chinanga kuti angayamba kutiwona nge ŵanthu akujaliya vuli.

 Chinanga kuti tichita cha Khrisimasi, kweni tisankhiya ŵanthu vakuchita cha pa nkhani iyi, chifukwa weyosi we ndi wanangwa wakujisankhiya. Tichitaku cha Khrisimasi asani anyaki achita.