Kae kehe, ko e tokolahi, ʻoku nau veiveiua pe te nau maʻu ʻa e kahaʻu ʻoku nau fiemaʻú. Kuo nau vakai ki hono hanga ʻe he ngaahi meʻa fakafokifā mo hoko taʻeʻamanekiná​—hangē ko e mahaki fakaʻauha COVID-19​—ʻo fulihi ʻa e sōsaietí, uesia ʻa e ʻekonōmiká, pea fakamanamanaʻi ʻenau moʻuí. Ko hono olá, ʻoku nau ongoʻi heʻikai pē ke nau maʻu ha kahaʻu malu.

Koeʻuhi ko e taʻepau ʻa e tuʻungá, ʻoku fekumi vēkeveke ai ʻa e kakaí ki ha meʻa te ne taki atu kinautolu ki ha kahaʻu lelei ange. Ko e niʻihi, ʻoku nau falala ki he ngaahi mālohi taʻehāmaí hangē ko e tufakangá pe vavaló. ʻOku tuli ʻa e tokolahi ki he akó mo e koloá, ʻo fakakaukau ko ha fakapapauʻiʻanga eni te nau maʻu ʻa e meʻa ʻoku nau loto ki aí. Ko e niʻihi ʻoku nau ongoʻi ko e hoko ko ha tokotaha leleí ʻa e meʻa pē ʻoku fiemaʻu ke nau fai ke maʻu ai ha moʻui ʻoku lelei.

ʻE taki atu koe ʻe he ngaahi meʻa ko ení ki he kahaʻu ʻokú ke fiemaʻú? Ke maʻu ʻa e talí, ʻoku fiemaʻu ke ke fakakaukau ki he ngaahi fehuʻi ko ení:

• Ko e hā ʻoku lava moʻoni ke ne tala ho kahaʻú?

• ʻE lava ke fakapapauʻi atu ʻe he akó mo e paʻangá ha moʻui lelei ange?

• ʻI he hoko ko ha tokotaha leleí ko ha fakapapauʻiʻanga ia ki ha kahaʻu malu?

• Te ke maʻu mei fē ha tataki alafalalaʻanga ki ha kahaʻu malu?

ʻI he ʻīsiu ko eni ʻo e Taua Leʻo ʻe lava ke ne tokoniʻi koe, ke maʻu ʻa e talí.