Naʻe fakahoko ʻe Sihova a ko e ʻOtuá ʻa e ʻuluaki malí. ʻOku tala mai ʻe he Tohi Tapú kia kitautolu naʻá ne ngaohi ʻa e ʻuluaki fefiné pea “ʻomi ia ki he tangatá.” Naʻe fiefia lahi ʻa ʻĀtama ko ia naʻá ne pehē: “Ko e fai ko eni ko e hui mei hoto hui, mo e kakano mei hoto kakano.” (Sēnesi 2:22, 23) ʻOku finangalo ai pē ʻa Sihova ke hoko ʻo fiefia ʻa e kakai nofo malí.

ʻI he taimi naʻá ke mali aí, naʻá ke fakakaukau nai ʻe hoko ʻo haohaoa ʻa e meʻa kotoa. Ko hono moʻoní, neongo ʻa e feʻofaʻaki moʻoni ʻa ha husepāniti mo ha uaifi, ʻe kei ʻi ai pē ha ngaahi palopalema. (1 Kolinitō 7:28) ʻI he polosiua ko ení, te ke ʻiloʻi ai ʻa e ngaahi tefitoʻi moʻoni ʻi he Tohi Tapú ʻa ia kapau te ke ngāueʻaki, ʻe lava ke hoko ai hoʻo nofo malí mo e fāmilí ʻo fiefia.—Saame 19:8-11.

MEʻA ʻOKU LEAʻAKI ʻE HE TOHI TAPÚ: Ko e husepānití ko e ʻulu ia ʻo e fāmilí.​—ʻEfesō 5:23.

Kapau ko e husepāniti koe, ʻoku ʻamanekina mai ʻe Sihova ke ke tokanga fakaalaala ki ho uaifí. (1 Pita 3:7) Naʻá ne ngaohi ia ko e tokoni kiate koe, pea ko hono finangaló ke ke tōʻongafai kiate ia ʻi he ngeia mo e ʻofa. (Sēnesi 2:18) Kuo pau ke ke mātuʻaki ʻofa lahi ʻi ho uaifí peá ke loto-lelei ke fakamuʻomuʻa ʻa e lelei ʻaʻaná ʻi he lelei ʻaʻaú.—ʻEfesō 5:25-29.

Kapau ko e uaifi koe, ʻoku ʻamanekina mai ʻe Sihova ke ke fakaʻapaʻapa loloto ki ho husepānití pea tokoni kiate ia ke fakakakato hono fatongiá. (1 Kolinitō 11:3; ʻEfesō 5:33) Poupouʻi ʻene ngaahi filí pea ngāue fāitaha ʻaufuatō mo ia. (Kolose 3:18) ʻI hoʻo fai peheé, te ke hoko ai ʻo fakaʻofoʻofa ʻi he vakai mai ʻa ho husepānití pea mo Sihova.—1 Pita 3:1-6.

MEʻA ʻE LAVA KE KE FAÍ:

• ʻEke ki ho hoá ki ha founga ʻe lava ke ke hoko ai ko ha  husepāniti pe uaifi lelei ange. Fanongo lelei, pea fai ʻa e meʻa ʻe lava ke ke fakalakalaka aí

• Hoko ʻo anga-kātaki. ʻE fiemaʻu ʻa e taimi kiate kimoua fakatouʻosi ke ako ki he founga te mo fakatou fiefia aí

MEʻA ʻOKU LEAʻAKI ʻE HE TOHI TAPÚ: ʻOku fiemaʻu ke ke tokanga ki he meʻa ʻoku mahuʻingaʻia ai ho hoa malí. (Filipai 2:3, 4) Tōʻongafai ki ho hoá ʻo hangē ha koloa mahuʻinga, pea manatuʻi ʻoku fiemaʻu ʻe Sihova ʻene kau sevānití ke nau hoko ʻo “anga-fakaalaala ki he tokotaha kotoa pē.” (2 Tīmote 2:24) “ʻOku ai ha taha ko ʻene faʻa lau ʻoku hange ko e hokohokai ha heleta: Ka ko e ʻelelo ʻo e poto ko e meʻa faitoʻo.” Ko ia ai, filifili lelei hoʻo ngaahi leá. (Palōveepi 12:18) ʻE tokoniʻi koe ʻe he laumālie ʻo Sihová ke ke lea fakataha mo e anga-lelei mo e ʻofa.—Kalētia 5:22, 23; Kolose 4:6.

MEʻA ʻE LAVA KE KE FAÍ:

• Lotu ki ha tokoni ke ke hanganaki nonga ai pē mo maʻu ha fakakaukau fakapotopoto ki muʻa ke ke lāulea fakataha mo ho hoá ki ha ngaahi meʻa ʻoku mafatukituki

• Fakakaukau lelei fekauʻaki mo e meʻa te ke leaʻakí mo e founga ke ke leaʻaki ai iá

MEʻA ʻOKU LEAʻAKI ʻE HE TOHI TAPÚ: ʻI he taimi ʻokú ke mali aí, ʻokú ke hoko ʻo “kakano pē taha” mo ho hoá. (Mātiu 19:5) Neongo  ʻoku mo kei toko ua pē pea mo maʻu nai ha ngaahi fakakaukau kehekehe. Ko ia ai, ʻoku fiemaʻu ke ke ako ke mo hoko ʻo fāitaha ʻi hoʻomo fakakaukaú mo e ngaahi ongoʻí. (Filipai 2:2) Ko e fāitahá ʻoku mātuʻaki mahuʻinga ia ʻi hono fai ʻo e ngaahi filí. ʻOku pehē ʻe he Tohi Tapú: “ʻOku tuʻu ʻa e ngaahi tuʻutuʻuni ko e pou ʻe he faleʻi.” (Palōveepi 20:18) Tuku ʻa e ngaahi tefitoʻi moʻoni ʻi he Tohi Tapú ke ne tataki kimoua ʻi hoʻomo fai fakataha ʻa e ngaahi fili mahuʻingá.—Palōveepi 8:32, 33.

MEʻA ʻE LAVA KE KE FAÍ:

• Vahevahe hoʻo ngaahi ongoʻí mo ho hoá, ʻo ʻikai ko ha ngaahi fakamatala pe ngaahi fakakaukau pē

• Tala ki ho hoá ki muʻa ke ke fai ha ngaahi tukupā