ʻI he hoko ko e Kau Fakamoʻoni ʻa Sihova, ʻoku mau fepōtalanoaʻaki fiefia mo e kakai ʻo e lotu kotoa pē felāveʻi mo e meʻa ʻoku nau tui ki aí, ka ʻoku ʻikai te mau ʻalu ki he lotu ʻa e niʻihi ʻoku ʻikai ke mau tui tataú. ʻOku fakahaaʻi ʻe he Tohi Tapú ko e Kalisitiane moʻoní ʻoku “fehokotaki lelei fakataha,” pea ko e konga mahuʻinga ʻo e fehokotaki ko iá ko e fāʻūtaha ʻi he tuí. (ʻEfesō 4:​16; 1 Kolinitō 1:​10; Filipai 2:2) ʻOku kau ki ai ʻa e meʻa lahi ange ia ʻi hono poupouʻi ʻo e mahuʻinga e ngaahi ʻulungaanga leleí hangē ko e ʻofa, manavaʻofa mo e fakamolemole. ʻOku fakatefito ʻemau tui fakalotú ʻi he ʻilo totonu mei he Tohi Tapú, he ka ʻikai ia ʻe kulanoa ʻemau tuí.​—Loma 10:​2, 3.

 ʻOku fakahoa ʻe he Tohi Tapú ʻa e kau fakataha ʻi he lotu mo e niʻihi ʻo e ngaahi tui kehé ʻo hangē ha haʻi ʻoku hōhoatamakí, ʻa ia ko ha kehekehe pehē ʻe lava ke maumau ai ʻa e tui ʻa ha Kalisitiane. (2 Kolinitō 6:​14-​17) Ko ia ai, naʻe ʻikai ke fakangofua ʻe Sīsū ʻe ne kau ākongá ke nau lotu tuifio. (Mātiu 12:30; Sione 14:6) Hangē pē ko iá, naʻe tapui ʻe he Lao ʻa e ʻOtuá, fakafou ʻia Mōsese, ke kau ʻa e kakai ʻIsilelí he lotu ʻa e ngaahi kaungāʻapí. (ʻEkisoto 34:11-​14) Ki mui aí, naʻe ʻikai tali ʻe he kau ʻIsileli faitōnungá ʻa e fie tokoni naʻe mei fakatupunga ai haʻanau kau fakataha mo e faʻahinga ʻo e ngaahi tui kehé.​—ʻĒsela 4:​1-3.

 ʻIo. Hangē ko e ʻapositolo ko Paulá, ʻoku mau mahuʻingaʻia ke ʻiloʻi e anga ʻo e fakakaukau mo e tui ʻa e “kakai tokolahi ʻe ala lavá” ʻi heʻemau ngāue fakafaifekaú. (1 Kolinitō 9:​19-​22) ʻI heʻemau fetalanoaʻakí, ʻoku mau feinga loto-moʻoni ke fakahāhā ʻa e “fakaʻapaʻapa loloto” ki he niʻihi kehé.​—1 Pita 3:​15.