Ko e Hā ʻa e ʻUhinga ʻo e Moʻuí?
Tali ʻa e Tohi Tapú
Ko e fehuʻi fekauʻaki mo e ʻuhinga ʻo e moʻuí ʻoku faʻa ʻeke ia ʻi he founga lahi, hangē ko ení: Ko e hā ʻoku tau ʻi heni aí? ʻOku ʻi ai ha taumuʻa ʻeku moʻuí? ʻOku fakahaaʻi mai ʻe he Tohi Tapú ko e taumuʻa ʻetau moʻuí ke fakatupulekina ha vahaʻangatae mo e ʻOtuá. Fakakaukau ki he ngaahi moʻoni mātuʻaki mahuʻinga ʻoku ʻomai ʻi he Tohi Tapú.
Ko e ʻOtuá ʻa hotau Tokotaha-Fakatupú. ʻOku pehē ʻi he Tohi Tapú: “Ko ia [ʻOtua] ʻa e tokotaha naʻá ne ngaohi kitautolú, ʻo ʻikai ko kitautolu.”—Saame 100:3; Fakahā 4:11.
ʻOku ʻi ai ʻa e taumuʻa ʻa e ʻOtuá ki heʻene meʻa fakatupu kotoa pē, kau ai mo kitautolu.—ʻAisea 45:18.
Naʻe fakatupu kitautolu ʻe he ʻOtuá mo ha “fiemaʻu fakalaumālié,” ʻo kau ai ʻa e holi ke maʻu ha moʻui mohu ʻuhinga. (Mātiu 5:3) ʻOkú ne loto ke tau fakalato ʻa e holi ko iá.—Saame 145:16.
ʻOku tau fakalato ʻetau fiemaʻu fakalaumālié ʻaki ʻetau fakatupulekina ha vahaʻangatae mo e ʻOtuá. Neongo ko e foʻi fakakaukau ʻo e hoko ko ha kaumeʻa ʻo e ʻOtuá ʻe hā ngali taʻemalava ki he niʻihi, ka ʻoku ʻomai ʻe he Tohi Tapú kiate kitautolu ʻa e fakalototoʻa ko ení: “ʻUnuʻunu ofi ki he ʻOtuá, pea te ne ʻunuʻunu ofi mai kiate kimoutolu.”—Sēmisi 4:8; 2:23.
Ke hoko ko e kaumeʻa ʻo e ʻOtuá, kuo pau ke tau moʻui ʻo fehoanaki mo ʻene taumuʻa kiate kitautolú. ʻOku fakahaaʻi mai ʻi he Tohi Tapú ʻa e taumuʻa ko ení ʻi he Tangata Malanga 12:13: “Ke ke manavahe ki he Otua, bea ke fai ki he ene gaahi fekau: he oku katoa i he mea ni ae gaue totonu ae tagata.”—Paaki Motuʻa.
ʻI he kahaʻú, ʻe lava ke tau hokosia kakato ai ʻa e ʻuluaki taumuʻa ʻa e ʻOtuá kiate kitautolú, ʻi he taimi te ne toʻo ʻosi atu ai ʻa e faingataʻá pea foaki mai ʻa e moʻui taʻengata ki hono ngaahi kaumeʻá, ʻa e faʻahinga ʻa ia ʻoku nau lotu ange kiate iá.—Saame 37:10, 11.