Fa Mokapelo wa Gago a Ratana
GO BOTLHOKO fa o nyetse motho a bo a tswa a ya go ratana le motho yo mongwe. Mme go na le batho ba ba kgonang go itshwarela bakapelo ba bone ba bo ba leka go baakanya lenyalo. * Le fa lenyalo le ka siama kgotsa dilo tsa pala, kgang eo e sa ntse e tla utlwisa yo o diretsweng phoso botlhoko. Batho bao ba ka dirang gore ba kgone go itshoka le fa go le botlhoko?
DITEMANA TSA BAEBELE TSE DI KA GO THUSANG
Baebele e gomoditse banyalani ba le bantsi ba ba diretsweng phoso. Batho bano ba ithutile gore Modimo o tlhaloganya botlhoko jo ba leng mo go jone.—Malaki 2:13-16.
“Fa dikakanyo tsa me tse di tlhobaetsang di ne di ntsifala, . . . dikgomotso tsa gago di ne tsa simolola go tshwara moya wa me ka tlekeetso.”—Pesalema 94:19.
Bill a re: “Fa ke bala temana eno, e ne e kete Jehofa o sidila maikutlo a me fela jaaka rre a sidila ngwana yo o utlwileng botlhoko.”
“[Modimo] o tla dira ka boikanyegi le motho yo o ikanyegang.”—Pesalema 18:25.
Go ile ga feta dikgwedi monna wa ga Carmen a ratana le mosadi yo mongwe. Carmen o ile a itse ka kgang eo mme a re: “Le fa monna wa me a ile a ratana le mosadi yo mongwe, ke ne ke itse gore Jehofa o a nthata e bile ga a kitla a nkutlwisa botlhoko.”
“Lo se ka lwa tlhobaela ka sepe, mme mo go sengwe le sengwe ka thapelo le mokokotlelo . . . a dikopo tsa lona di itsisiwe Modimo; mme kagiso ya Modimo e e gaisang kakanyo yotlhe e tla disa dipelo tsa lona.”—Bafilipi 4:6, 7.
Sasha a re: “Fa ke bala temana eno kgapetsakgapetsa e bile ke rapela, Modimo o nthusa gore ke kgone go itshoka.”
Batho ba re buileng ka bone ba kile ba batla go itlhoboga. Mme ba ile ba ithuta go tshepa Jehofa Modimo le go tshepa Lefoko la gagwe Baebele. Bill a re: “Go tshepa Modimo go ile ga dira gore ke lemoge gore le fa ke utlwisitswe botlhoko, go sa ntse go na le motho yo o nkgathalelang. Le fa ke ne ke ‘tsamaya mo mogogorong wa moriti wa loso,’ Modimo o ne a na le nna.”—Pesalema 23:4.
^ ser. 4 Go bona tshedimosetso ya gore a o ka tlhala kgotsa a o ka mo itshwarela, bala makasine wa Tsogang! ya May 8 1999, ya setlhogo se se reng “Fa Molekane a sa Ikanyege.”
Tse Dingwe Tse O ka Di Kgatlhegelang
TORA YA TEBELO
A Modimo o Kgona go go Utlwela Botlhoko?
Baebele ya re Modimo o bona dilo tse di re diragalelang, o a re tlhaloganya e bile o re utlwela botlhoko.
TORA YA TEBELO
Go Dira Gore lo Tshepane Gape
TORA YA TEBELO
Go Tswelela Pele ka Botshelo Jwa Gago Morago ga Tlhalo
Mo e ka nnang batho botlhe ba ba tlhadileng ba lemoga gore go thata le go feta go tswelela ka botshelo go na le kafa ba ne neng ba lebeletse ka teng. Kgakololo ya Baebele e e mosola e ka go thusa go lebana le kgwetlho ka katlego.
