Men Gwatemalanyň günbatar daglyk ýerlerindäki Akula diýen çet şäherde dünýä indim. Aslym maýa taýpasynyň aýzel tiresinden. Men ispançany hem-de öz tirämiziň dilini gowy bilýärdim. Men Gwatemalada 36 ýyllap dowam eden raýatlyk urşy döwri dünýä indim. Şol uruşda biziň tirämizden köp adamlar gyryldy.

Çaga wagtymyz bir gezek doganym granat oýnap ýördi. Ýaňky granat ýaryldy, doganym aradan çykdy, men bolsa kör boldum. Şonda men dört ýaşymdadym, doganym hem ýedi ýaşyndady. Bütin çagalygym Gwatemala şäherindäki kör çagalaryň mekdebinde geçdi. Ol ýerde men Braýl elipbiýinde okamagy öwrendim. Mugallymlar meni beýleki çagalar bilen gepleşdirmeýärdiler. Çagalar hem menden gaçýardy. Mugallymlaryň näme üçin şeýdýändigine hiç düşünmeýärdim. Men ýekesireýärdim. Ýylda iki aý rugsat berlende, öýe gaýdyp, ejemi görmäge sabyrsyzlyk bilen garaşýardym. Ejem mähirlidi, diňe ol meniň ýagdaýyma düşünýärdi. Ýöne 10 ýaşymda ejem hem aradan çykdy. Meniň üçin tutuş dünýä ýumrulan ýaly boldy. Sebäbi meni söýüp, aladamy edýän ýekeje ynsan ejemdi.

11 ýaşymda dogduk şäherime dolanyp, öweý agamyň öýünde ýaşap başladym. Olar meniň iýjegimi, içjegimi, geýjegimi ýetirip dursalar-da, mähre, söýgä zardym. Käte men aglap, Hudaýdan: «Näme üçin ejem ýogaldy? Men näme üçin kör boldum?» diýip soraýardym. Dogan-garyndaşlaram, tanyş-bilişlerem bu Allatagalanyň islegi diýýärdiler. Şondan soň men Hudaýy rehimsiz, doňýürek, adalatsyz hasaplap başladym. Men janymdan doýup, ölesim gelýärdi. Ýöne munuň hiç alajyny tapamokdym.

Kör bolanym üçin başgalaryň kömegine mätäç bolýardym. Üstesine, ýüregim ýaralydy, sähel zady göwnüme alýardym. Çagakam erbet adamlar meni birnäçe gezek zorlapdylar. Men o hakda hiç kime aýtmaýardym, sebäbi tarapymy tutjak adam ýokdy. Adamlar meniň bilen kän bir gepleşmeýärdiler, şonuň üçin menem onçakly gepläp baramokdym. Men dünýäden doýan ýaly ýaşaýardym, hiç kime ynanmaýardym.

Bir gezek mekdepde arakesme wagty Ýehowanyň Şaýady bolan bir är-aýal ýanyma geldi. Olara maňa nebsi agyrýan bir mugallymym  haýyş edipdir. Şonda olar ölen adamlaryň direljekdigini, körleriň gözleriniň açyljakdygyny Mukaddes Kitapdan okap berdiler (Işaýa 35:5; Ýahýa 5:28, 29). Olaryň aýdanlary gulagyma hoş ýakdy. Men geplemsek bolmamsoň, olar bilen gürleşmek birbada gaty kyn boldy. Ýöne olar şonda-da yzygider ýanyma gelip, Mukaddes Kitapdan sapak geçdiler. Olar örän mähirli, sabyrlydylar. Olar maňa okuw geçmek üçin daglyk ýerlerden 10 kilometr ýol söküp gelýärdiler.

Öweý doganym olaryň salykatly geýinýändigini, ýöne onçakly bir baý däldigini gürrüň berýärdi. Olar hal-ýagdaýymy sorap durýardylar, sowgatjyk getirip berýärdiler. Başga hiç bir dindäki adamlar şeýle söýgini, mähri görkezmeýärdiler.

Men Braýl elipbiýinde çykarylan edebiýatlaryň kömegi bilen, Mukaddes Kitaby öwrendim. Mukaddes Kitabyň dogrudygyna düşünsem-de, käbir zatlara ýürekden ynanmaýardym. Meselem, Hudaýyň hut meniň aladamy edýändigine we başgalaryň hem meni gowy görýändigine hiç ynanyp bilmeýärdim. Ýehowanyň erbetlige näme üçin ýol berýändigine düşünýärdim, ýöne Ýehowany söýgüli Ata hökmünde göz öňüme getirmek kyn boldy *.

Mukaddes Kitaby öwrenip, kem-kemden garaýşymy üýtgetdim. Meselem, Ýehowanyň azap çekýän adamlaryň derdine gowy düşünýändigini bildim. Ýehowa azap çekýän gullukçylary barada şeýle diýýär: «Halkymyň... çekýän jebrini gördüm... Olaryň ejir çekýänini bilýärin» (2 Musa 3:7). Ýehowanyň aladaçyl Hudaýdygyny bilip, oňa ömrümi bagyş edesim geldi. Şonuň üçinem 1998-nji ýylda suwa çümdürilip, Ýehowanyň Şaýady boldum.

Suwa çümdürilenime ýarym ýyl geçensoň, Eskuintla şäherinde körler üçin ýörite okuw geçirildi. Bir ýaşuly dogan ýaşaýan ýerimden ýygnak geçirilýän ýere barmak üçin gaty kösenýändigimi bilipdir. Iň golaýdaky ýygnaga barmak üçin maňa okuw geçen är-aýalyňky ýaly daglyk ýerlerden uzak ýoly geçmelidim. Kör adam üçin şeýle ýoly geçmek gaty kyndy. Ýaşuly meni ýygnak duşuşygyna äkidip getirer ýaly Eskuintlada ýaşaýan bir maşgala haýyş etdi. Olar meniň maşgalam ýaly bolup galdy.

Dogan-uýalaryň eden kömeginiň, ýagşylygynyň sany-sajagy ýok. Olar hemişe aladamy edýärdiler. Ine, hakyky dine uýýan adamlar şeýle bolmaly eken! (Ýahýa 13:34, 35).

Men indi betbagt däl, ýaşamaga umydym bar. Ýehowa uzak wagtly gulluk edip, şägirt taýýarlamak işine gatnaşýaryn. Men bar ünsümi kynçylygyma bermän, adamlara Hudaý barada öwredýärin. Men häzir ýygnakda ýaşuly bolup gulluk edýärin we jemagat nutuklary bilen çykyş edýärin. Şeýle-de kongreslerde müňlerçe adamlaryň öňünde nutuk bilen çykyş etdim. Ýehowa üçin şunça işleri edip bilýändigime begenýärin.

2010-njy ýylda Salwadorda geçirilen «Gullugy kämilleşdiriş mekdebinde» (häzirki Hoş habarçylar mekdebi) okadym. Mekdep maňa ýygnakdaky borçlarymy has gowy ýerine ýetirmäge kömek etdi. Dogrudanam, Ýehowa islendik adamy ukyply edip bilýär. Men mekdepde okap, Ýehowanyň meni söýýändigine we gadyrymy bilýändigine hasam göz ýetirdim.

Isa pygamber: «Bermek almakdan has bagtly edýändir» diýdi (Resullar 20:35). Indi menden bagtly adam ýok. Men öň ejiz, kömege mätäç adamdym. Indi bolsa özüm adamlara kömek edýärin.